गोदान दिल्ली/गुवाहाटी, फेब्रुवारि 4: रबिबाराव मिरु सरकारनि नखर मंत्री राजनात सिंह बिथांआ सा-सान्जा राजखान्थि दोलोफोरनि सिगांआव बुंदोंदि बिथांआ नोगोरारि सोदांनाय बिल 2019 नि द्राप्त बिलखौ नोजोर होनानै गुबुन गुबुन राजखान्थि दोलो आरो गुबुन गुबुन समाजआरि आफादफोरजोंबो सावरायगोन।
बिथांनि बेबादि बुंनाय रावआ सा-सान्जा ओनसोलफोराव जेंना गोनां नोगोरारि (सोदांनाय) बिल 2019 खौ लानानै हेंथा धर्ना होनानै सोमावसारबोनाय थानाय राजखान्थि दोलो आरो समाजआरि दोलोफोरखौ गमामायैनो एसेब्लाबो गोजोन्नाय होगोन।
संगमा आरो सा-सान्जा ओनसोलनि गुबुन गुबुन राजखान्थि दोलोफोरनि दैदेनगिरिफोरा मिरु सरकारनि नखर मंत्री राजनात सिंह बिथांखौ गोदान दिल्लीआव थांनानै लोगो हमहैना जेंना गोनां नोगोरारि बिल 2019 खौ बेरेखा खालामना अजद दैखाङो।
सा-सान्जा ओनसोलनि राजखान्थि दोलोफोरजों दाफुंजानाय दोलोखौ मेघालय हादोरसानि गिबि मंत्री कनराड कंगाल सांगमा बिथांआ दैदेनदोंमोन। लोगोसे असम गन परिसदनि दैदेनगिरिफोर आरो बेनिनो आफादगिरि अटुल बरा, प्रपुल्ला कुमार महन्त (बार्ग गिबि मंत्री), केसब महन्त, फानिभुसान चैदरि, आरो बिरेन्ड्र प्रसाद वैस्वा बिथांमोनहा लोगोआव दंफायोमोन।
“मिरु सरकारनि नखर मंत्री राजनात सिंह बिथांआ जोंनो फोरमायदोंदि, बिथांआ नोगोरारि सोदांनाय बिल 2019 नि द्राप्त आयेनफोरखौ लानानै गुबुन गुबुन राजखान्थि दोलोफोरजों सावरायनायजों लोगोसे गुबुन गुबुन समाजआरि आफादफोरजोंबो सावरायगोन, आं सानो बे समाव सावरायनाया मोजां लामाजों थांगोन” होन्ना मेघालया हादोरसानि गिबि मंत्री करनाद सांगमा बिथांआ बुङो।
जों बिथांजों सावरायज्लायनायाव सा-सान्जा ओनसोलाव थानाय सुबुंफोरनि लुबैनायखौ नोजोर होनानै नखर मंत्री राजनात सिंह बिथांनो मोजाङै फोरमायदों, होन्ना बिथां सागमाया बुंबावो।
नखर मंत्री राजनात सिंह बिथांआ सा-सान्जा ओनसोलफोरनि सुबुंनि लुबैनाय आरो सान्नायफोरखौ बुजिदों आरो बेबादियैनो नायगोन होन्ना फोरमायबावो।
मेघालया हादोरसानि गिबि मंत्री बिथांआ बुंबावोदि, “सा-सान्जा ओनसोलफोरनि सुबुंफोरनि नोगोरारि सोदांनाय बिल 2019 खौ बोखांना लाफिनहोनो नाजानाया मोजां फिथाय थायगोन, जों जोंनि थाखोआव हानायमानि नाजागोन, जाहाथे नोगोरारि बिलआ गोजौ थाखोसिम सिगांलांबावा, जोंनिफ्राय बिलखौ हेंथा होनाय आरो हेंथा खालामनाय खामानिफोरा सोलिबायथागोन”।
जथुमानि उनाव एजिपि राजखान्थि दोलोनि दैदेनगिरि अटुल बरा बिथांआ सेंन्टिनलनि खौरांगिरिनि सिगांआव बुङोदि, जों सा-सान्जा ओनसोलाव थानाय सुबुंफोरनि लुबैनाय आरो सान्नायफोरखौ नखर मंत्री राजनात सिं बिथांनो मिथिहोदों। मिरु सरकारा जेरैखि जायामानो नोगोरारि सोदांनाय बिल 2016 खौ बोखांनानै लाफिननांगोन मानोना बे बिलआ संबिजिरनि माकासे फोथायनायफोरखौ सिफायगोन। धोहोरमखौ लानानै आसाम हादोरसाखौ दाफुंनाय जायाखै, रावखौ लानानैसो दाफुंनाय जादों, नाथाय बिलआ धोरोमनि फारसे मुगैनाय दिन्थिफुंदों। सासे गुबुनारिआ गुबुनारिआनो, जुदि बिलखौ आयेन दाफुंगोन अब्ला असमिया रावआ गोमालांगोन, फारसेथिं आसाम हादोरसायाव थांनाय 1951 माइथायनिफ्राय 1971 माइथायनि गेजेराव फैनाय गुबुनारिफोरखौ लाखिनानै दोनखाबाय, बेनि उनाव आरो गुबुनारिफोरखौ लाखिनो हाला, आसाम हादोरसाया गुबुनारिफोरनि न’ नङा, 31 डिसेम्बर 2014 नि उन्निफ्राय जों सासेबो गुबुनारिफोरखौ लाखिनो हाला होन्ना बिथांआ बुंबावो।
फारसेथिं सांगमा बिथांआ जथुमानि उनाव गोदान दिल्लीआव खौरांगिरिफोरनि सिगांआव बुंदोंदि, “मिरु सरकारनि नखर मंत्री राजनात सिंह बिथांआ जोंनि दाबिफोरखौ मोजाङै खोनासंदों आरो फिन्नाय होदों”।
मखनो गोनांदि, सा-सान्जा राजखान्थि दोलोफोरा नखर मंत्री राजनात सिंह बिथांखौ लोगो हमनो थाखाय थांनाय 28 जानुवारिआव सा-सान्जा ओनसोलफोरनि मोन 10 गुबुन गुबुन राजखान्थि दोलोफोरा गुवाहाटी नोगोरमायाव जथुमा खुंफुंनानै लोगो हमनायनि थांखि लादोंमोन। बेबादिनो रबिबाराव बिथांमोनहा गोदान दिल्लीआव थांनानै लोगो हमहोयो आरो जेंना गोनां नोगोरारि (सोदांनाय) बिल 2019 खौ लानानै सावरायो। बिथांमोनि बेबादि खामानि मावफुंनायखौ सा-सान्जा फरायसा आफादआ गोजोनग्लायनाय फोरमायहरो।
