गुवाहाटी,डिसेम्बर 1: मोनफ्रोमबो सा-सान्जा ओनसोलफोराव नोगोरारि (सोदांनाय) बिल 2016 नि बेरेखायै धर्ना होनाय हाबाफारिआ सोलिगासिनो थानाय समावनो ट्रिपुरा हादोरसानि टैप्रा फरायसा आफादआबो गावसोरनि सान्नायफोरखौ बुंथिनानै बिलखौ हेथा खालामो।
बिथांमोनहा बुनाय बादिब्ला दासान्दि ट्रिपुरा हादोरसानि थागिबि टैप्रा सुबुंफोरनि सुबुं सानखोआ 10 लाख नाथाय हादोरसायाव गासै 40 लाख सुबुं सानखो दं, जायनि जाहोनाव थागिबि सुबुंफोरा गावनि आंगो हादोरसायावनो नैथि थाखोनि सुबुं एबा Second Class Citizen हिसाबै मान मोनसै।
सुक्रबाराव North East Students’ Organization (NESO) एबा सा-सान्जा ओनसोलनि फरायसा आफादनि दैदेन्नायाव मोनफ्रोमबो हादोरसायाव नोगोरारि सोदांनाय बिल 2016 नि बेरेखायै धर्ना होयो आरो मोनफ्रोमबो हादोरसाफोरनि राजथावनिआव बेरेखा खालामनाय देंखोफोरा ग्रोम ग्रोम रिंखाङो।
ट्रिपुरा हादोरसानि आगड़टलायाव धर्ना होनाय हाबाफारिआव टैप्रासा फरायसा आफादनि बोसोनसिरि उपेन्ड्र डेबार्मा बिथांआ बाहागो लानानै बुङोदि, “ट्रिपुरा हादोरसायव नोगोरारि बिलखौ सोदांनायनि सिगांनो जों नैथि थाखोनि सुबुं एबा Second Class Citizen हिसाबै मान मोनखाबाय, दासान्दि जोंनि सुबुं सानखोआ 10 लाख, आरो हादोरसायाव गासै 40 लाख सुबुं सानखो दं, जुदि बिलखौ सोदांगोन, जोंनि हारिआ गासैबो गोमालांगोन” होन्ना बिथांआ बुङो।
सा-सान्जा ओनसोफोराव थानाय मोन 7 हादोरसानि फरायसा आफोदफोरा बुङोदि, ओनसोलनि मोन 6 हादोरसाफोरनि सरकारा मेघालया हादोरसानिफ्राय सोलोंनानै लानांगौ, मानोना मेघालया हादोरसाया बेफोरबादि जेंना गोनां बिलखौ गनायाखै। NESO नि आफादगिरि सामुयेल जिउरा बिथांआ बुङोदि, “मोनफ्रोमबो सा-सान्जा ओनसोलफोरनि सुबुंफोरा बिलखौ बेरेखा खालामदोंब्लाबो मिरु सरकारा गुबुन हादोरनिफ्राय फैनाय सुबुंफोरखौ दोन्नो थाखाय गोदान आयेन सोदांनो नाजागासिनो दं, फैगौ गोजां बोथोरनि पारलियामेन्ट जुथुमानि समाव बिलनि हेंथायै धर्ना होनो पारलियामेन्ट हाउसनि लांगोना मोखांआव जों थांगासिनो दं” होन्ना बिथांआ बुबावो।
मेघालया हादोरसानि सिलंआव कासि फरायसा आफाद (KSU) आरो गार’ फरायसा आफादआबो (GSU) लोगोसेयै जयै नोगोरारि बिल 2016 खौ बेरेखा खालामनानै धर्ना होयो आरो बिथांमोनहा हादोरसानि सुबुंफोरनि लुबैनाय बादि मावथांखि लानायनि थाकाय मेघालया सरकारखौ गोजोनग्लायनाय जासियो।
मागालैन्ड हादोरसानि नागा फरायसा आफादआबो (NSF) नोगोरारि सोदांनाय बिलनि हेंथायै कहिमायाव धर्ना होयो आरो फरायसा आफादनि आफादगिरि क्रिस्टपार बिथांआ बुङोदि, “सा-सान्जा ओनसोला बांग्लादेसिफोखौ दोन्नो थाखाय फोथार नङा, जों बिलखौ माब्लाबाबो सोदांहोआ”।
मनिपुर हादोरसायावबो दुलाराय मनिपुरि फरायसा आफादआ (AMSU) इम्पलाव बिलनि हेंथायै धर्ना होयो आरो आफादगिरि चारानटेम बिथांआ बुङोदि, “मनिपुर हादोरसानि गिबि मनट्रीआ हादोरसानि सुबुंफोर लुबैनाय बादि मावथांखि लानांगौ”।
अरुनाछल प्रदेस हादोरसानि इटानगरावबो दुलाराय अरुनाछल प्रदेस फरायसा आफादआ (AAPSU) बिलनि हेंतायै धर्ना होयो। फरायसा आफादनि आफादगिरि हावा बागान बिथांआ बुङोदि, “जों बिलखौ माब्लाबाबो गनायनानै लाया, साफ्रोमबो बांग्लादेसि आरो चाकमाफोरखौ हादोरसानिफ्राय दैथायहरनांगौ”।
मिजराम हादोरसानि आइजवाल आवबो सुक्रबारखालि बेबादिनो धर्ना होदोंमोन।
