तामुलपुर,फेब्रुवारि 26: जम्मु आरो काश्मीर हादोरसानि पुलवामा जिल्लायाव पाकिस्तान हादोराव जोनोम मोन्नाय जाइस-इ-महामद उदखारि हान्जानि गाग्लोबनायाव आसाम हादोरसानि बड’लेन्ड हालामाव थानाय बाक्सा जिल्लानि मुंख्लं जालांनाय मनेस्वर बसुमथारि बिथांनि नखराव दिनै Indian Air Force नि पाकिस्तान हादोरनि बालाकतआव फिन्नाय होनायखौ गोजोनग्लायनाय मोनदों।
खौरां मोन्नाय बादिब्ला मुंख्लं मनेस्वर बसुमथारि बिथांनि नखरनि सुबुंफोरा Indian Air Force नि हाबाफारि बादियै जाइस-इ-महामद उदखारि हान्जानि बादायाव गाग्लोबनानै सा 200-300 सो उदखारिफोरखौ फोजोबस्रांनायनि खौरांखौ मोन्नानै गोजोनग्लायनाय मोनदों आरो हादोरनि गाहाय मंट्री नारेन्ड्र मोडी बिथांखौ साबायखर जासिहरो।
मखनो गोनांदि, थांनाय 14 फेब्रुवारि 2019 अक्ट’आव जम्मु आरो काश्मीर हादोरसानि पुलवामा जिल्लायाव उदखारिफोरनि गाग्लोबनायाव सा 40 निबो गोबांसिन सीआरपीएफ रौनिया हान्जानि सोद्रोमाफोरा मुंख्लं जालांदोंमोन। बेनिने गेजेराव आसाम हादोरसानि सिङाव थानाय बाक्सा जिल्लानि मनेस्वर बसुमथारिआबो गावनि आगोमा जिउखौ हादोरनि थाखाय बावनो गोनां जायो।
मनेस्वर बसुमथारि बिथांआ आसाम हादोरसानि बाक्सा जिल्लानि सिङाव थानाय तामुलपुर ओनसोलनि कलबारि गामिआव 1971 माइथायाव जोनोम मोनदोंमोन। बिथांआ थांनाय 1994 माइथायाव सीआरपीएफ रौनिया हान्जायाव मुं थिसनदोंमोन। बिथांआ गावनि अनसुलि बिसि सुनमाती बसुमथारि आरो सानै गथ’फोर- धनन्जय आरो दिदोमस्रि बिथांमोनखौ नागारनानै बे बुहुमनिफ्राय जायगार लांनो गोनां जायो।
बसुमथारि बिथांनि बिमाइ कमल बर’ बिथांआ बुङोदि, जों मुंख्लंनि नखरनि जानानै हादोरनि गाहाय मंत्री नारेन्ड्र मोडीखौ गोजोनग्लायान मोनदों, बेयो जोबोद गोजोन्थाव रादाब, मुंख्लं आंनि बिमाइनि आत्मायाव गोजोनग्लायनाय मोनगोन”।
IAF नि 2थि सार्जिकॉल स्ट्राइक होनायखौ नोजोर होन्नानै बिथांआ बुंबावदोंदि, बेफोरबादिनो उदखारि हान्जानि बेरेखायै स्ट्राइक होनायखौ लांबाय थानांगौ, जाहाथे उदखारिफोरा काश्मीर ओनसोलाव हाबनानै भारत हादोराव जेंना खालामफैनो हाया। सिगांफोरनिफ्राय बेबादिनो हाबाफारि लायोमोनब्ला 14 फेब्रुवारि आव एसेबां गोबां रौनिया हान्जानि सोद्रोमाफोरा मुंख्लं जानाय नङामोन होन्ना बिथांआ अजद होबावो।
14 फेब्रुवारि 2019 आव पुलवामा गाग्लोबनायनि 12 साननि उनाव दिनै 26 फेब्रुवारि 2019 आव भारतनि उड़न जाहासजों Indian Air Force आ उदखारि हान्जानि बादाखौ गाग्लोबनानै सिलिंखार खालामनो हायो 200 निफ्राय 300 सो उदखारिफोरखौ फोजोबनो हायो। बे गाग्लोबनाया LOC आव थानाय पाकिस्तान हादोरनि बालाकत आव फुंबिलि समनि 3:30 रिंगानिफ्राय गासै 20-21 मिनिटसो सोलिबाय थादोंमोन होन्ना मिथिनो मोन्नाय जायो।
गुबन फार्सेथिं कौरां मोन्नाय बादिब्ला पाकिस्तान हादोरनि गाहाय मंत्री इमरान कान बिथांआ इस्लामाबाद आव हादोर रैखाथिखौ नोजोर होनानै जथुमा खुंफुङो आरो बारत हादोरखौ साखाफारा जानो खावलायहरो।
