गुवाहाटी,नबेम्बर 1: हादोरसानि खुंथायाव थानाय भारतिय’ जनता पार्ति राजखान्थि हान्जाजों गोरोबथायाव दंब्लाबो फैगौ गामियारि एबा पन्चायत बिसायखथिनि थाखाय ओनसोलनि राजखान्थि हान्जा असम गन फरिसदआ हारसिङैनो गसंनो मावथांखि लाबाय।
बुधबाराव जालांनाय एजिपि दोलोनि मिरु आफादनि मेलाव बे मावथांखिखौ लायो, बिजेपि सरकारनि गोरोबथायाव थानाय गुबुन मोनसे दोलो बड’लैन्ड पिपल्स प्रन्ट (BPF) आ फैगौ रबिबारानि एकझुकेटिव मेलाव थांखि लागोन होन्ना एजिपि दोलोनिफ्राय मिथिहोयो।
पन्चायतनि बिसायखथिआव हारसिङौनो गसंनो मानि थाखाय गिदिंखेखो? एजिपि दोलोनि गाहाय नेहाथारि ड: कमला कान्त कलिता बिथांआ सेंटिनेलनि खौरांगिरिनि सिगांआव बुङोदि- “बेनो जोबथि थिरांथादि, एजिपि दोलोआ हारसिङैनो पन्चायत बिसायखथिआव गसंगोन। बिजेपि दोलोजों पन्चायतनि मासि रानलायनानै गंसे नावआव गाखोनाया बे समाव मोजां जानाय नंला मानोना एजिपि आरो बिजेपि दोलोनि सान्थौ आरो थांखिफोरनि गेजेराव गोरोबलायै नुनो मोनदों, बेफोरनि जाहोनाव भट होगिरिफोरखौ मोनसे जायगायाव होहोनाया मोजां जानाय नङा। पन्चायतनि बिसायखथिआ पन्चायति राज फसंथाननि सिङाव थानाय गासै 3000 निबो बांसिन आफादफोरनि मोनसे फालांगि, जों रिक्स लानो हाया”।
मेलनि गेजेरजों नोगोरारि सोदांनाय बिल 2016 खौ बायदि बायदि हाबाफारि लानानै गोख्रोंयै बोरोखा खालामनो थाखाय मावथांखि लायो। बिथांमोनहा बेफोर मावथांखिनिफ्राय 1 इंन्सिबो फावया आरो गुबुनारि फोरखौ हादोरसायाव गनायनानै दोना होन्ना मिथिहोयो। बेजों लोगोसे बिथांमोनहा बुङोदि- 1971 माइथायनि 24 मार्च अक्टखौ नोजोर होनानै गुबुनारि जेंनाफौ सुस्रानांगौ होन्नानै दाबि दैखांबावो।
मखनो गोनांदि- बावैसो सिगां BTC खुंथायनि गाहाय हाग्रामा महिलारि बिथांआ बुंदोंमोनदि, फैगौ पन्चायतनि बिसायखथिआव बाहागो लागोन आरो BTC नि बाहेरायाव थानाय जायगाफोराव एजिपि आरो बिजेपि दोलोजों गोरोबथा जानाय दोलोफोरखौ गोख्रोंयै हेफाजाब होगोन, नाथाय सोंथि बेरखांङोदि- एजिपि दोलोआ बिजेपि दोलोजों गावस्रानानै हारसिङैनो गसंनो थाखाय मावथांखि लाबाय अब्ला बे समाव बिपिएप दोलोआ बबे नावआव गाखोगोन?
बेफोरबादि गावस्रालायनायनि जाहोनाव कंग्रेज आरो मस्लिमफोरनि राजखान्थि हान्जा एआइइउडिएफआ गोहो मोन्नानै बाडारुड्डिन आजमलखौ आसामाव गमामायैनो फैगौ समफोराव गिबि मनट्री बानायमारसिगोन नामा?
