क’कराझार, फेब्रुवारि 7: “BTC Accord Day” जाय सानखौ बड’लेन्ड हालामाव आलादा गावखुंथाय एबा बीयीसी दाफुंजेन्नायनिफ्रायनो फालिबोगासिनो दं, देग्लायबो फैगौ 10 फेब्रुवारि 2019 अक्टआव BTC हालामाव 17थि बड’लेन्ड सानखौ फालिनो थाखाय बीटीसी खुंथायआ साखाफारा जागासिनो दं।
खुंफुंजानो लागा 17थि बड’लेन्ड सानखौ नोजोर होनानै बीटीसी खुंथायनि गाहाय आरो BPF राजखान्थि दोलोनि आफादगिरि हाग्रामा महिलारि बिथांआ बुङोदि, बीटीसी हालामाव थानाय मोनफ्रोमबो हारि मारिनि सुबुंफोरा खुंफुंजानोलागा 17थि “बड’लेन्ड सान” आव बाहागो लानानै गाव गावसोरनि हारिमु आरो गान्नाय जोमनायफोरखौ दिन्थिफुंगोन। बे हाबाफारिआव गासै 2 लाखसो सुबुंफोरखौ बाहागो लाहोनो थाखाय नाजागासिनो दं, फालिनाय हाबाफारि बादियै फुंबिलिनि 7 रिंगानिफ्राय गिबिआवनो मुंख्लंफोरनो बिबार बावनाय हाबाफारिआव बड’फा उपेन्ड्र नात ब्रम्हखौ मान बावगोन आरो बेनि उनाव फिरफिला बिरहोनानै उन्नि हाबाफारिफोरखौ लालांबाय थागोन होन्ना महिलारि बिथांआ खौरांगिरिनि सिगांआव बुंथियो।
फैगौ 10 फेब्रुवारि आव बड’लेन्ड सान फालिनायनि 12 रिंगासोआव गेवलां जथुमाखौ जागायगोन, आरो देग्लायनि जथुमायाव बड’लेन्ड हालामाव थानाय गुबुन गुबुन हारि माहारिनि हारिमुवारि गान्नाय जोमनायफोरखौ दिन्थि फुंगोन। बिथांआ हाग्रामाया बुंबावोदि, बर’ माहारिनि अनगायै बीटीसी ओनसोलाव गासै 12 एबा 13 सो हारि माहारिफोर दं, गेवलां जथुमायाव मोनफ्रोमबो हारिनि आयजोफोरनो 500 खरि मासि होनाय जागोन आरो साफ्रोमबो गाव गावनि हारिनि गान्नाय जोमनायफोरखौ लानानै राभा, गर’ राजबंसि, आडिवासि गासिबो फैजोबगोन होन्ना बिथांआ खौरांगिरिनि सिगांव बुंथियो।
दानि सोलिफुबाय थानाय आसाम बिधान सभानि “बाजेत सिजन”नि जथुमायाव हादोरसा रां बिफान्नि मंत्री हिमान्ट बिस्व सर्मा बिथांनि 2019-20 माइथायनि थाखाय बाजेत होनायखौ नोजोर होनानै बिथांआ बुङोदि, देग्लायनि बाजेतआ बीटीसी खुंथायनि थाखाय बाखोनायजाथाव, गुबुनथिं मा जादों बेखौ मिथिया नाथाय बीटीसी खुंथायाव जेसेबां रां मोन्नांगौ बेखौ मोनदों होन्ना बिथांआ बुंथियो।
फारसेथिं उदालगुरि जिल्लायाव इंन्जिनियारिं कॉलेज आरो क’कराझार आव स्पर्ट (Sports) कॉलेज लुफुंगोन होन्ना खौथा होनायनि सोमोन्दै जेब्ला खौरांगिरिआ सोंथि सोङो अब्ला बिथांआ बुङोदि, देग्लानि बाजेत आव गैयाब्लाबो फैगौ बोसोराव जाफुंगोन, लोगोसे बिथांआ बुङोदि बाजेतनि सोमोन्दै जोंहा बुंनांगौ बाथ्रा गैया नाथाय कार्बि आंलंनि बर’फोरखौ ST बिमुंनि गनायथि होनायल’ आरो बोखौ दानि सोलिफुगासिनो थानाय बिधान सभानि जथुमायाव सावरायनो नाजागासिनो दं होन्ना बिथांआ फोरमायबावो।
गुबुन फारसेथिं जेब्ला फैगौ MP बिसायखथिनि सोमोन्दै खोरांगिरिफोरा सोंथि सोङो अब्ला बिथांआ फिन्नाय होयोदि, “फैगौ MP बिसायखथिआव BPF दोलोआ दुलाराय बर’ फरायसा आफाद एबा एबसुजों (ABSU) बेरेखायै गेलेगोन, गुबुनजों गेलेआ ABSU नि ओंथिआनो जाबाय UG Brahma, बिथांनि बेरेखायै गेलेगोन। देग्लायनि बिसायखथिआव बर’ आरो अनाबर’ दोलोआ खाबु मोना” होन्ना बिथांआ बुंबावो।
