गुवाहाटी,डिसेम्बर 31: डिसेम्बर दान्नि 25 अक्ट 2018 आव गोदानै बेखेवजानाय हादोरनि 2थि गोलावसिन बिगिबिल दालांआव बावैसो सिगां जाब्रबथाय सोमजिबाय थानायफोरखौ नुनानै धेमाजि जिल्ला खुंथाया गोख्रों आयेन फोसावो।
खौरां मोन्नाय बादिब्ला दालांजों थांनाय एबा दालांखौ नायनो फैनाय सुबुंफोरनि रैखाथिनि थाखाय बे आयेनखौ जिल्ला खुंथाया फोसावदों।
आयेननि बादिब्ला दालांनि मोन्नैबो बाहागोआव जायखिजाया गारिफोरानो 2 मिनिटनि बारा सम लाखिनो मोना, जाय बे आयेनखौ सिफायगोन बिथांखौ आयेन बादियै जुरिमाना फोनांनाय जागोन, बेफोरखौ नोजोर होनो थाखाय पुलिस आरो सेकुरीटी हान्जानि सोद्रोमाफोरखौ थिसनगोन” होन्ना गोदान आयेननि गेजेरजों फोरमायो।
मखनो गोनांदि, गोदानै बेखेवजानाय दालांआव बेखेवनायनि 1 दानबो थांस्लाबैआवनो गासै सानै सुबुंआ जाब्रबथायजों फुगिनांनो गोनां जायो।
