गुवाहाटी,डिसेम्बर 19: बावैसो लुफुंजानाय बगिबिल दालांखौ हाबाफारि बादियै बेखेवनायनि 1 सप्ता सिगां, टाय अहम हारिनि आफादफोरा आगुनि आसामनि राजा चावलुं सिउ-का-फानि मुं दोन्नांगौ होन्नानै मंगलबाराव बगिबिल दालांनि साखाथिंआव लामा होबथादों।
जेब्ला आसाम सरकारा NF रेल बिफान्नो लाइजामनि गेजेरजों बगिबिल दालांनि मुंखौ “बिरंगाना शती साधानी शेटु” दोन्नांगौ होन्नानै फोरमायहरो, अब्लानो टाय अहम हारिनि आफादफोरा बेरेखा खालामना धर्ना होनानै लामा होबथानाय हाबाफारिखौ लायो। आसाम सरकारा “बिरंगाना शती साधानी शेटु” बिमुंखौ सासे चुटिया हारिनि रानि ‘शती साधानी’निफ्राय लानाय जादोंमोन।
चुटीया हारिनि खावलायहरनाय लेखा सरकारा बे मावफारियाखौ लादोंमोन, नाथाय टाय अहम आफादजों लोगोसे अहम सभा, दुलाराय आसाम टाय अहम लाइमोन आफाद, दुलाराय टाय अहम फरायसा आफादफोरा मंगलबाराव लामा होबथानाय हाबाफारिखौ लायो आरो अहम राजानि मुंखौ नोजोर होनानै डिब्रुगड़ टाउननि साखाथिआव थानाय बगिबिल दालांनि मुंखौ दोन्नांगौ होन्ना दाबि दैखाङो।
अहम सभा आफादनि सासे गेदेमा दैदेनगिरि बिथांआ बुङोदि “सोर्गोदेव चावलुं सिउ-का-फा बिमुं दोन्नायनि अनगायै गुबुन साबसिन मुं गैला, जों गोबाव समनिफ्रायनो सोर्गोदेव चाउलुं सिउ-का-फा दोन्नांगौ होन्ना दाबि खालामबोगासिनो दं, मानोना सिउ-का-फा बिथांआ आसामनि मोनफ्रोमबो हारिखौ खौसेथि खालामनानै असमिया हारि दाफुंनो नाजाबोदोंमोन”।
फारसेथिं आसाम सरकारनि फोसावनायाव, दुलाराय आसाम चुटीया फरायसा आफादनि गाहाय नेहाथारि महेन बरा बिथांआ बुङोदि, “जुदि बिथांमोनि दाबि खालामनायखौ सुफुंआब्ला बेखेवनाय हाबाफारिआव गोबां चुटीया लाइमोनफोरा बगिबिल दालांनिफ्राय बुरलुंबुथुर दैमायाव बाज्रुमनानै जिउ फोजोबना लागोन”।
फारसेथिं देउरि हारिनि आफादफोराबो दालांनि मुंखौ भिमबरि देउरिनि मुंखौ नोजोर होनानै दोन्नांगौ होन्ना दाबि खालामदों।
गोबां मिसिं हारिनि आफादफोरजों लोगोसे टीएमपिके आफादआबो दालांनि मुंखौ स्वाहित कमला मिरिनि मुंखौ नोजोर होनानै दोन्नांगौ होन्ना दाबि खालामदों आरो बुंदोंदि दालांखौ लुफुंनो थाखाय गोबां मिसिं हारिनि सुबुंफोरा हाखौ हगारनानै होदों।
बावैसो सिगांबो डिब्रुगड़ बियाबनि बिजेपि दोलोनि एमएलए प्रसान्त’ फुखन बिथांआ बार्ग गाहाय मनट्री अटुल बिहारि भाजपेयी बिथांनि मुंखौ नोजोर होनानै दोन्नांगौ होन्ना दाबि खालामदों आरो बुंदोंमोनदि भाजपेयी बिथांआ सा-सान्जा ओनसोलखौ जौगाखांनाय लाबो हानायमानि नाजाबोदोंमोन।
रेल बिफान्नि गोजौ थाखोनिफ्राय मिथिहोनाय बादिब्ला फैगौ 25 डिसेम्बरखालि हादोरनि गाहाय मनट्री नारेन्ड्र मोडी बिथांआ आसामनि गोलाव रेल दालां एबा बगिबिल दालांखौ बेखेवगोन होन्ना मोथिनो मोन्नाय जायो।
बगिबिल दालांआनो भारत हादोरनि बयनिख्रुयबो गोलावसिन दालां, जाय दालांआ आसम-अरुनाछल सिमानि सान्जाहा थानाय बुर्लुंबुथुर दैमानि सायाव दं।
4.98 कि.मि गोलाव दालांखौ लुफुंनो थाखाय थांनाय 2002 माइथायावनो बार्ग गाहाय मनट्री मुंख्लं अटुल बिहारि बाजपेयी बिथांआ लुजेन्नाय खामानिखौ बेखेवदोंमोन आरो मखनो गोनांदि, बिथांनि सिगांबो 1997 माइथायनि जानुवारि दानाव गाहाय मनट्री HD Deve Gowda बिथांआ अन्थाय खाम्पा गायसंदोंमोन। दानि हादोरनि गाहाय मनट्री नारेन्ड्र मोडी बिथांआ फैगौ 25 डिसेम्बरखालि बेखेवगोन जाय सानखौ हादोराव “Good Governance Day” हिसाबैबो फालिनाय जायो।
बे दालांखौ लुफुंनो थाखाय 16 बोसोर गोलाव सम लाबाय, गिबि आन्थाय खाम्पा गायसंजेन्नायनिफ्राय लुफुंनो थाखाय गोबां जोबथि समफोर (Deadline) होबोनाय जादोंमोन। जोबथिआव 2018 आवसो बेखेवनो हाबाय आरो थांनाय 3 डिसेम्बरावबो गिबि रेल खारजेन्नानै आन्जाद नायनो हाबाय।
