गुवाहाटी,सेप्तेम्बर 29: बड’लैन्ड फरायसा आफाद (BSU) नि दैदेन्नायाव बड’लैन्ड मलुग सोलोंसालिनि जेंनाखौ लानानै धर्ना होनाय हाबाफारिआ दिनै 9 सानाव आगान सुरबाय। फरायसा आफादआ दानि Vice-Cencellor हेमन्त खुमार बरुवा बिथांखौ मासिनिफ्राय बोख्लायनो दाबि खालामगासिनो दं। सुक्रबाराव जाथायखौ नायबिजिरनो थाखाय सिक्किम हादोरसायाव थानाय मनिपल मुलुग सोलोंसालिमानि बारग’ Vice-Cencellor टि.बि. चुब्बानि दैदेन्नायाव साथाम नायबिजिरगिरिनि हान्जाया फैदोंमोन नाथाय धर्ना होगिरिफोरा साथाम सोद्रोमानि नायबिजिरगिरि हान्जाखौ हाबहोआखै।
साथाम सोद्रोमानि हान्जाया दानि सोलिफुबाय थानाय बड’लैन्ड मुलुग सोलोंसालिनि जेंनाफोर फारियै इ-रिगुलार फोरोंथाय, सोलोंसालि खुंथाय, खालि जानानै थानाय मासिआव गोदान फोरोंगिरि थिसन्नाय, सोलोंसालिमायाव मुं थिसन्नाय, आन्जाद आरो आन्जादनि फिथायफोरनि सायाव नायबिजिरनो फैदोंमोन, नाथाय बिथांमोनहा धर्ना होगिरिफोरनि सोलोंसालिमा सिङाव हाबहोयिनि जाहोनाव गिदिंलांफिन्नो गोनां जायो।
खौरां मोन्नाय बादिब्ला साथाम नायबिजिरगिरिनि दोलोआव मनिपल मुलुग सोलोंसालिमानि बारग’ Vice-Cencellor टि.बि. चुब्बाजों लोगोसे आसाम हादोरसानि गोजौ सोलोंथाय बिफान्नि गाहाय नेहाथारि क्रिस्न गहाइन आरो Executive Council नि बिबानगिरि राडेन्दु रय सौदरि बिथांमोनहा नायबिजिरनो फैदोंमोन आरो धर्ना होगिरि बिथांमोनि दैदेनगिरिफोरजों लोगो हमनानै गिदिंलांफिनो होन्ना खौरां मोन्नाय जायो।
मख’नो गोनांदि, बड’लैन्ड फरायसा आफादा दानि Vice-Cencellor खौ बिबान्निफ्राय बोख्लायनानै अराथा गोदान Vice-Cencellor थिसननांगौ होन्ना 20 सेप्तेम्बर दाननिफ्राय दाबि खालामगासिनो दं। धर्ना होनाय हाबाफारिआ सोलोंसालिमानि खुंथायाव एबा ख्लास लानायाव जेंना खालामगासिनो दं। थांनाय गु(9) सान्निफ्रायनो सोलोंसालिमानि गासिबो खामानिफोरा बन्द’ जानानै दं। आसाम सरकारनिफ्राय जेबो फिन्नाय मोनैलाय धर्ना होगिरिफोरा सोलोंसालिमानि गेटखौ बन्द खालानानै दोन्नाय जादों आरो खुलिफिनगोनखौ नुहरनाय जायाखै।
बड’लैन्ड फरायसा आफादनि आफादगिरि सोगोमसार बसुमथारि बिथांआ खौरांगिरिनि सिगांआव बुङोदि, जेब्लासिम दाबिफोरा जाफुंसारा अब्लासिम सोमावसारनाया सोलिबाय थागोन। दानि Vice-Cencellor हेमन्ट कुमार बरुवानि 5 बोसोरनि समआ जोबनायलाय गोदान गुबुन Vice-Cencellor थिसनफिन्नो दाबि खालामगासिनो दं। बिथांमोनहा बुङोदि, दानि Vice-Cencellor आ 5 बोसोर मावबोदोंमोनब्लाबो सोलोंसालिमानि आरो फरायसाफोरनि जेबो जौगाखां खामानिफोर मावफुंआखै।
सुक्रबाराव बड’लैनेड मुलुग सोलोंसालिनि फोरोंगिरि आफादआ धर्ना होनाय हाबाफारिखौ दुखुमोन्नाय फोरमायो।
