क’कराझार,नवेम्बर 24: गोबाव सम जालांनाय आलादा राज्यो बड’लेन्डनि दाबिखौ सुक्रबारखालि नेशनेल एलाइन्स पर पिपल्स मुभमेन्ट (NAPM) हान्जाया हेफाजाब होदों आरो बुङोदि, संबिजिरनि आयेन बादियै गोग्लैसोनानै थानाय ट्रायबेल हारिनि सुबुंफोरनो मोन्थायखौ होनांगौ।
खौरां मोन्नाय बादिब्ला NAPM नि सा 14 सोद्रोमाफोरा संविधान सम्मान यॉत्रानि हाबापारि बादियै हान्जा सुरनाय, जाय हान्जा सुरनाया 2 अक्टबरखालि गुजरात हादोरसायाव थानाय दान्डिनिफ्राय जागायदोंमोन। बिथांमोनहा क’कराझार जिल्लासिम जेब्ला सफैयो अब्ला मिरु एबसुनि आफादगिरि बिथांआ आरनायजों बरायो आरो बड’फा हाउसआव मेल खुङो।
तेलेंगाना हादोरसानि मिरा सांघामिट्रा बिथांआ खौरांगिरिफोरनि सिगांआव बुङोदि, नेशनेल एलाइन्स पर पिपल्स मुभमेन्ट (NAPM) हान्जाया समान मोन्थाय एबा Right to Equality नि सायाव राव होगासिनो दं, आलादा राज्यो बड’लैन्डनि दाबिआ थार दाबि, मानोना बर’ हारिआ जारिमिनारि आरो संबिजिरनि आयेन बादियै मोन्थाय दं। बिथांआ बुंबावोदि, जाय सुबुंफोरा नाख्रेबजानाय आरो गादबजानाय बिथांमोनि थाखाय NAPM हान्जाया सोमावसारबोगासिनो दं।
सांघामिट्रा बिथांआ बुंबावोदि, “आसाम हादोरसायाव थानाय बर’फोरा गोबाव समनिफ्रायनो आलादा राज्यो बड’लैन्डनि थाखाय सोमावसारबोगासिनो दं, मानोना दानि थाकानाय बिटिची सरकारा सुबुंफोरनि लुबैनाय आरो हास्थायनायफोरखौ सुफुंनो हायाखै। NAPM हान्जाया सुबुंफोरनि थार आरो सैथो दाबिफोरखौ लानानै सोमावसारबोगासिनो दं”। “दानि बिजेपि दैदेन्नाय NDA सरकारा धोरोमखौ लानानै राजखान्थि गेलेगासिनो दं, जायनि थाखाय हादोरनि गुनफोरा गोमालांगासिनो थादों” होन्ना बिथांआ बुंबावो।
उट्टर प्रदेस हादोरसानि सानदिप पान्डे बिथांआ बुङोदि, बिजेपि दैदेन्नाय सरकारा धोरोमखौ लानानै हादोरनि सुबुंफोरखौ बोखावगासिनो दं। बेफोरनि हेंथायै खौसेयै गसंथानो थाखाय नेशनेल एलाइन्स पर पिपल्स मुभमेन्ट (NAPM) हान्जायाव गासै मोन 300 निबो बांसिन दोलो एबा हान्जाफोरा लोगो जाबाय होन्ना बिथांआ बुङो। “संविधान सम्मान यॉत्रानि हाबाफारि बादियै जों (गासै 14 सा) भारत हादोरनि सिङाव थानाय गुजरात हादोरसानि डान्डिनिफ्राय 2 अक्टबरनिफ्राय जागायनानै 10 डिसेम्बरसिम हादोरारि हान्जा सुरनाय हाबाफारि लादों” होन्ना बिथांआ बुंवावो।
दुलाराय बर’ फरायसा आफादआबो बिथांमोनि सोमावसारनायखौ हेफाजाब होयो आरो बिथांमोनहा बड’लैन्ड सोमावसारनायखौ संबिजिरनि आयेन बादियै सैथो होन्नायजों लोगोसे बर’हारिआ जारिमिनारि मोन्थाय दं होन्ना बुङो।
मिरु एबसुनि आफादगिरि प्रमद बर’ बिथांआ बुङोदि, “फरायसा आफादनि जानानै जों हेफाजाब होयो मानोना बिथांमोनहा गोग्लैसोनानै थानाय हारि-हारिसाफोरनि थाखाय सरकारजों नांबोगासिनो दं”।
बिथांआ बुङोदि, बर’ फरायसा आफादआ गोबाव समनिफ्रायनो आलादा राज्यो बड’लैन्डनि थाखाय सोमावसारबोगासिनो दं नाथाय भारत सरकारा दासिमबो जेंनाखौ सुस्रांनानै होआखै, भारत सरकारा थोंजोङै हादोराव गोदान हादोरसा दानायखौ हेफाजाब होनांगौ होन्ना बिथांआ बुंबावो।
