क’कराझार: दुलाराय बर’ फरायसा आफादा (ए.बि.एस.इउ) समबाराव हादोरसानि सरकारखौ आसामआव थानाय बर’ मेडियामनि सोलोंसालिफोरखौ बिमा बाथुलनि नोजोरजों नायदों होन्ना सोंखारियो आरो बुङोदि, सरकारा बर’ मेडियामजों लोगोसे बर’ रावखौ फोजोबस्रांनो सोलो खालामगासिनो दं।
दुलाराय बर’ फरायसा आफादानि सोलोंथाय नेहाथारि कास्तम बसुमथारिआ क’कराझारनि बड’फा हाउसआव जानाय प्रेस मिटआव बुङोदि, आसामाव थानाय बर’ मेडियाम फरायसोलिफोर थांना थानाया गिख्रंथाव जानानै फैबाय, गासै मोन 11 जिल्लाफोरनि मादाव 517 भेनसार गुदि फरायसालिफोर दं, बेनिनो गं 149 भेनसार गेजेर फरायसालि आरो गं 103 भेनसार गोजौ फरायसालिफोर दं, ABSU आ आसामाव थानाय मोन 11 जिल्लाफोरखौ नायसंखांबाय (Survey) आरो नायसंनायाव मोन्नाय जायोदि, गोबां फरायसालिफोरा जेंनाफोरजों मोगा मोगि जानांगासिनो दं।
क’कराझार जिल्लायाव सरकारि नङै भेनसार गुदि फरायसालिनि अनजिमायागासै 128, गेजेर फरायसालिनि आनजिमाया गासै गं 23 आरो भेनसार गोजौ फरायसालिनि अनजिमाया गासै गं 13 दं।
सासेल’ फोरोंगिरि थानाय गुदु फरायसालिनि अनजिमाया गं 84, गेजेर फरायसालिफोराव बिगियाननि फोरोंगिरि खालि जानानै थानाय फरायसालिफोरा गासै गं 44, गेजेर फरायसालिफोराव हिन्दी फोरोंगिरिनि खालि जानानै थानाय फरायसालिफोरा गं 18, गेजेर फरायसालिफोराव लोगो फोरोंगिरिनि खालि जानानै थानाय फरायसालिफोरा गं 42, गोजौ फरायसालिफोराव बिगियाननि फोरोंगिरि खालि जानानै थानाय फरायसालिफोरा गासै गं 42, गोजौ फरायसालिफोराव हिन्दी फोरोंगिरि खालि जानानै थानाय फरायसालिफोरा गासै गं 37, आरो गोजौ फरायसालिफोराव लोगो फोरोंगिरिफोरनि खालि जानानै थानाय फरायसालिफोरा गासै गं 84।
बेबादिनो गुबुन गुबुन जिल्लाफोरावबो फोरोंगिरिफोरनि खालि जानानै थानाय फरायसालिफोर गोबां दं, ABSU आ 31 आगस्त दानखौ सिमा खानानै होबाय जुदि सरकारा बैफोर जेंनाखौ सुस्रांनो सिगांबोआब्ला ABSU आ सरकारनि हेंथायै गोदानै सुबुं सोमावसारगोन होन्नानै बसुमतारिआ बुंबावो।
ककराझार जिल्ला दालाय फरायसा आफादनि आफादगिरि जनक उजिरआ बुङोदि, आसाम सरकारा बेफोरबादि बिमा बाथुलनि नोजोरजों नायनानै बर’ मेडियामफोरखौ नाथ्रोदना दोन्नाया जोबोद दुखुनांथाव, आसाम सरकारा बर’ मेडियाम आरो बर’ रावखौ फोजोबनो सोलो लादों, नाथाय दुलाय बर’ फरायसा आफादा बेखौ माब्लाबाबो जाहोआ होन्ना बिथांआ बुंबावो।
दुलाय बर’ फरायसा आफादा आसामनि खालि जानानै थानाय फोरोंगिरिफोरि मासिखौ थाबैनो सुफुंनांगौ होन्ना सरकानाव दाबि खालामो। गुदि फरायसालिफोराव सासेल’ फोरोंगिरि थानाय लांदां जायगाफोराव साख्रि थिसननांगौ, लोगोसे सानखान्थि, बिगियान आरो हिन्दी फोरोंगिरिफोरनि लांदां जायगाखौ थाबैनो सुफुंनांगौ होन्ना दाबि दैखाङो।
गुदि फरायसालिनिफ्राय लानानै गोजौ फरायसालिसिम फरायसालिफोरखौ सरकारि खालामना होनांगौ होन्ना दाबि दैखाङो।
