क’कराझार,सेप्तेम्बर 15: गुबुन गुबुन दैदेनगिरिनि दावहारु हान्जा नेसनेल डेम’क्रेटिक प्रन्ट अव बर’लैन्ड (NDFB) आ 30थि बिग्रायारि मुंख्लं सानखौ सुक्रबाराव गोख्रोङै फालिदों। एन.डि.एफ.बि(पि) आबो गावसोरनि गुबुन गुबुन जिल्लायाव थानाय फारियै क’कराझार, बाक्सा, आरो उदालगुरिनि डिजायनेटेद बादायाव गोख्रोंयै फालिदों आरो रन्जन दैमारि दैदेन्नाय हान्जाया उदालगुरिआव थानाय बिग्रायारि बादायाव फालिदों।
एन.डि.एफ.बि(पि)आ 30थि मुंख्लं सान फालिनायनि गेजेरजों आलादा राज्यो ‘बर’लैन्ड’खौ थाबैनो बर’ हारिनि जारिमिनखौ नायनानै दाफुंना होनांगौ होन्ना बिग्रायारि बिथांमोनहा भारत सरकारखौ खावलायदों।
एन.डि.एफ.बि(पि)आ बुङोदि, बर’ हारिनि थाखाय साफा साफा बिग्रायारि गेदेमा बिथांमोनि बर’ हारिनि थाखाय जिउ बावलांनाया बर’हारिखौ बुहुमनि गेजेराव थांनानै थानायाव हारिनि खौसेथिखौ गोख्रोंयै लाखिगोन। बे हाबाफारिआव मोनफ्रोमबो एन.डि.एफ.बि हान्जाया बर’ हारिखौ समायना खालामनाय आरो थामोन्थानि थाखाय जुजिबोनानै गाज्रि नोजोरजों नायग्राफोरनि आखायाव गाव गावनि जिउखौनो बावलांनाय सा 2000 निबो बांसिन बिग्रायारि मुंख्लंफोरखौ गोसोखाङो।
क’कराझार जिल्लानि सेरफांगुरिआव थानाय डिजायनेटेद बादायाव एन.डि.एफ.बि(पि)नि गाहाय नेहाथारि गबिन्द बसुमथारि बिथांआ मुंख्लंफोरखौ मानिनानै आफादनि फिरफिलाखौ ससे बोखोनानै बिरहोयो। फार्सेथिं एन.डि.एफ.बि गायसंगिरि आरो आफादगिरि रन्जन दैमारि बिथांआ उदालगुरिआव थानाय डिजायनेटेद बादायाव बाहागो लानानै आफादनि फिरफिलाखौ बिरहोयो आरो एन.डि.एफ.बि(पि)नि गाहाय बि. बोलोगोरा बिथांआ सेरफांगुरि बादायाव मुंख्लंफोरनो गोथौयै बिबार बावो।
गबिन्द बसुमथारि बिथांआ गावनि बिबुंथिआव बुङोदि, बिग्रायारि हान्जाया 1986 माइथायनि 3 अक्टबराव उदालगुरि जिल्लानि सिङाव थानाय अदला खासिबारिआव बर’ हारिनि थामोन्था आरो रैखाथिनि थाखाय बर’लैन्ड हादोरखौ उदां खालामनो आखायाव हाथियार दैनाय थिरांथाखौ लानानै आफादखौ दाजेनदोंमोन। 1988 माइथायनि 14 सेप्तेम्बराव Boro Security Forces (Bd.SF) आरो उनाव एन.डि.एफ.बिनि एक्सन खामान्डार बि.बिबुंगोरा बिथांआ हाथियार दैनानै सोमावसारनायाव गिबि जिउ बावलांदोंमोन, बे साननिफ्रायनो एन.डि.एफ.बिआ बे सानखौ मुंख्लं सान हिसाबै फालिबोगासिनो दं होन्ना बसुमथारि बिथांआ बुङो। 19 बोसोर आखायाव हाथियार लाना सोमावसारबोनानै 2005 माइथायाव भारत सरकारजों गोरोबथा एबा Ceasefire लायो नाथाय भारत सरकारा 12 बोसोर बारलांब्लाबो बर’लैन्डनि राजखान्थियारि जेंनाखौ सुस्रांना होनो जोबो गोख्रों मावथांखि लायाखै।
बिसपमथारि बिथांआ बुंबावोदि, दासान्दि भारत सरकारजों रायज्लायनाया सोलिगासिनो दं आरो जों सानोदि दानि खुंथायाव थानाय सरकारा गोलाव सम जालांनाय बर’लैन्डनि जेंनाखौ सुस्रांना होनानै अरायसमनि थाखाय रैखाथि आरो गोजोन लाबोगोन। 10 बोसोर सिगांनिफ्रायनो बर’ रैखाथि हान्जाया भारत सरकारजों सावरायगासिनो दं। सरकारा माब्लाबा बुङो आलादा राज्यो दानो थाखाय जेबो पलिचि गैया, नाथाय 2009 माइथायनि 9 दिसेम्बराव आलादा राज्यो टेलेंगानाखौ फोसावदोंमोन, गोबां सुबुंफोरा बेरेखा खालामदोंमोनब्लाबो 2014 माइथायाव आलादा राज्यो टेलेंगानाया आलादा राज्योनि गोहोखौ मोनदोंमोन, जारिमिनारि आरो राजखान्थिआरि बिथिंआव बर’फोरनि फार्से बिमा बाथुलनि नोजोरजों नायनाया सहायथावै होन्ना बिथांआ सरकारखौ हुमखि होयो।
गाहाय नोहाथारि बिथांआ बुंबावोदि, गोलाव सम सरकारजों नांबोनायाव जोंनि नांनायनि लामाफोरा समजों लोगोसे सोलायबोदोंब्लाबो सोफ्रोमबो एन.डि.एफ.बि सोद्रोमानि गोसोआ बर’लैन्डनि थाखाय सोलायबोआखै आरो साफ्रोमबो सोद्रोमाया बर’लैन्डनि थाखाय जिउ बावनो राजि जानानै दं होन्ना बिथांआ बुंबावो।
