गुवाहाटी,डिसेम्बर 20: रासिया आरो भारत हादोरनि गेजेराव जानाय राफेल बिरखंनि खोथाखौ लानानै जौसिन बिजिरसालिनि बिजिरनायनि गेजेरजों मिथिहोनायाव भारत हादोरनि गुबुन गुबुन जायगाफोराव जेंना सोमजिगासिनो दं। बेबादिनो बुधबाराव आसामनि भारतीय’ जनता पार्टीनि दैदेनगिरिफोरजों लोगोसे दोलोनि सोद्रोमाफोरा रागा जोंखांनाय मोन्नानै गुवाहाटी नोगोरमायाव थानाय कंग्रेस दोलोनि गाहाय मावखुलि राजिब भबनखौ धेराव खालामो।
मखनो गोनांदि, हादोरारि कंगेरस दोलोनि आफादगिरि राहुल गान्डी बिथांआ बिजेपि दोलोनि दैदेनगिरि आरो हादोरनि गाहाय मनट्री नारेन्ड्र मोडी बिथांनि रासिया हादोर आरो भारत हादोरनि गेजेराव जानाय सोमोन्दोआ नंखाय होन्ना थांनाय गोलोम बोथोरनि पारलियामेन्टनि जथुमायाव दान्थे बिदान्थे जादोंमोन आरो बे बाथ्राया हादोराव गोबां दावराव दावसि लाबोदोंमोन जायनि जाहोनाव हादोरनि जौसिन बिजिरसालिआ बिजिरनो थाखाय आखायाव लानो गोनां जादोंमोन। जेब्ला जौसिन बिसिरसालिआ गावसोरनि बिजिरनायनि फिथायखौ मिथिहोयो अब्ला कंग्रेस दोलोनि राहुल गान्डी बिथां बुंनाय बाथ्राय नंखाय आरो नारेन्ड्र मोडी बुंनाय बाथ्राया थार होन्ना बावैसो सिगां मिथिहोयो। नाथाय राहुल गान्डी बिथांआ बे बिजिरनायखौ गनायनानै लायाखै।
बेफोर बाथ्राखौ लानानैनो बुधबाराव बिजेपि दोलोआ गुवाहाटी नोगोरमानि कंग्रेस दोलोनि गाहाय मावखुलिखौ धर्ना होनानै गाग्लोबो आरो नारेन्ड्र मोडीनि सिगांआव राहुल गान्डीआ नंखाय खोथा बुंनानै जेंना खालामनायनि थाखाय निमाहा बिनांगौ होन्ना दाबि खालामो।
खौरां मोन्नाय बादिब्ला हादोरसा बिजेपि दोलोनि आफादगिरि रन्जित कुमार दास बिथांआ बे हाबाफारिखौ दैदेनदोंमोन। बिथांमोनहा कंग्रेस दोलोनि आफादगिरि आरो MP राहुल गान्डी बिथांआ गावनि मासिनिफ्राय आखाय दैखांनांगौ होन्ना दाबि खालामबावो।
बिथांमोनि धर्ना होनायाव गुवाहाटी नोगोरानि गाहाय लामा एबा GS Road खौ होबथानानै दोन्नाय बादि जादोंमोन जेराव पुलिस आरो खुंथाया धर्ना होनाय हाबाफारिखौ गोजोनै जोबलांनायखौ हास्थायदों आरो नारा नाथाद नाजादोंमोन।
फारसेथिं आसाम कंग्रेज दोलोनि दैदेनगिरि आरो सोद्रोमाफोराबो राजिब भबनाव बिजेपि दोलोनि बेरेखायै धर्ना होदोंमोन आरो बिजेपि दोलोजों दैदेनजानाय मिरु सरकारखौ सोंखारिदोंमोन।
खौरां मोन्नाय बादिब्ला कंग्रेस दोलोनि सोद्रोमाफोरा राफेल बिरखंखौ लानानै मिरु सरकारा हादोरनि सुबुंफोरखौ आरो जौसिन बिजिरसालिखौ नंखाय लामाजों दैदेनदों होन्ना बुङो। लोगोसे बिथांमोनहा राफेल सोमोन्दोखौ लानानै जयेन पारलियामेन्टारि खमिटिआ (JPC) बिजिरनांगौ होन्ना दाबि खालामबावो।
बे जाथायखौ लानानै हादोरसा बिजेपि दोलोआ कामरुप जिल्ला डिपुटी खमिचनारनि सिंजों भारतनि हादोरगिरि रामनात कभिन्ड बिथांनो गोसोखां बिलाइ (Memorandum) दैथायहरो।
