गुवाहाटी,अक्टबर 6: बावैसो थावनि बेसेनखौ खमायनानै बिजेपि दैदेन्नाय NDA सरकारा थावनि बेसेनजों राजखान्थि गेलेनानै नंखायै मुं दादों, थावनि बेसेनखौ खमायनानै होनाया सुबुंनि थाखाय मोजां खालामाखै नाथाय मोनब्रै गुबुन गुबुन हादोरसाफोराव बिसायखथि जानो गोंनांखौ नोजोर होनानैसो खमायफ्लादों होन्ना आसाम प्रदेस कंग्रेज खमिटीआ बुङो।
मख’नो गोनांदि, मोनब्रै जिल्लाफोर फारियै मध्य प्रदेस, राजस्तान, चट्टिसगड़ आरो मिजराम हादोरसानि बिसायखथिआ थालांनानै दं।
आसाम प्रदेस कंग्रेज खमिटी (APCC) नि आफादगिरि रिपुन बरा बिथांआ खौरांगिरिफोरनि सिगांआव बुङोदि, पेट्रल थावनि बेसेन खमायनाया मिरु सरकारा सुबुंफोरनि गोसोखौ बोनो थाखायसो राजखान्थि गेलेदों।
“जेब्ला हादोरनाङैनो थावनि बेसेन बांलांबाय थानायखौ नोजोर होनानै बिजेपि दैदेन्नाय NDA सरकारनि बेरेखा धरेना होगासिनो दंमोन, अब्ला सरकारा बुंदोंमोनदि थावनि बेसेन बांनाय खमायनाया माखासे ग्लबेल फेक्टरनि थाखायसो जादों, अब्ला सरकारा माबोरै थावनि बेसेनखौ खमायखो होन्नानै रिपुन बरा बिथांआ बुंबावो।
