गुवाहाटी,जानुवारि 03: बुधबाराव मिरु सरकारनि केबिनेटनि जथुमायाव आसाम गोरोबथानि 6थि दफाखौ सोदांनो थाखाय गोजौ थाखोनि खमिटि दाफुंगोन होन्नायखौ दुलाराय आसाम फरायसा आफादआ गोजोन्नाय मोनाखै आरो बिथांमोनहा बुङोदि, “बे थांखि लानाया फैगौ 2019 आव खुंफुंजानो लागा पारलियामेन्टारि बिसायखथिनि सिगां हादोरसानि सुबुंफोरनि मोदैखौ हुगारहोनायनि अनगायै जेबो नङा होन्ना”।
आसाम फरायसा आफादनि 6 बोसोर गोलाव सम नोगोरारि नङै (Foreigner) फोरनि बेरेखायै सोमावसारनानै मिरु सरकार, आसाम सरकार आरो दुलाराय आसाम फरायसा आफादनि गेजेराव गोरोबथा जानाय आसाम एकर्डखौ नोजोर होनानै बुधबारनि बेलासिआव मिरु सरकारनि केबिनेट आव मावथांकि लानाया हादोरसानि मोनफ्रोमबो थाखोनि सुबुंफोरनि रागा जोंनाय आरो नोगोरारि सोदांनाय बिल 2016 नि बेरेखायै सोमावसारनायखौ नंखायै फैगौ पारलियामेन्टारि बिसायखथिनि सिगां फोजोबनो थांखि लानाय होन्ना आसाम फरायसा आफादआ बुङो।
दुलाराय आसाम फरायसा आफादनि गाहाय बोसोनगिरि ड: सामुज्जल बाटाचार्य बिथांआ सेंन्टिनेलनि खौरांगिरिनि सिगांआव बुङोदि, आसाम एकर्डआव दुलाराय आसाम फरायसा आफादआ मोनसे गुबै आफाद जानायलाय मिरु सरकारा बेनि सोमोन्दै जेबो मावथांखि लानो हाया, फरायसा आफादखौ साग्रांथि होनो हायाब्ला आसाम एकर्डनि 6थि दफाखौ गोजौ थाखोनि खमिटि दानानै जेबो खालामनो हाया”। बिथांआ बुंबावोदि, “बुधबाराव मिरु सरकारनि केबिनेटआव मावथांखि लानाया जेबो गोदान बाथ्रा नङा”।
ड: बाटाचार्य बिथांआ बुंङोदि, “थांनाय 2000 माइथायावबो मिरु सरकारनि नखर मंत्रीनि जयेन सेक्रेटारि G.K Pillai नि दैदेन्नायाव आसाम एकर्डनि 6थि दफाखौ सोदांनो थाखाय साब-खमिटि दाफुंदोंमोन आरो माखासे रिख’मिन्डेसनफोरखौ जमा होदोंमोन, बेनिनो रिपर्ट बादियै आसाम एसेमब्लिआव 100 जौखोन्दो मासि थि खालामनाय, गुबुन आफादफोराव मासि थि खालामनाय आरो आसाम हादोरसानि थागिबि सुबुंफोरखौ रैखाथि होनाय”।
“साब-खमिटिनि रिख’मिन्डेसनफोरखौबो आसाम एसेमब्लिआव सावरायखांबाय, जुदि दानि मिरु सरकारनि खुंथायाव थानाय सरकारा एसेबां गोसो दंङोब्ला साब-खमिटिनि रिख’मिन्डेसनफोरखौ सोदांनो हागोन, खमिटिनि उनाव खमिटि दाफुंबाय थानो गोनांथि गैया, बिथांआ बुंबावोदि, “आसाम एकर्डखौ नोजोर होनानै 2017 माइथायाव मिरु सरकार, आसाम सरकार आरो आसुनि गेजेराव थाम खनायारि सावरायनानै मावथांखि लानायखौबो सोदांआखै”।
ड: बाटाचार्य बिथांआ बुङो, “मिरु सरकारनि नखर बिफानानै आसाम एकर्डनि 6थि दफाखौ सोदांनो थाखाय बिबान थानायलाय, दानि खुंथायाव थानाय मिरु सरकारनि नखर बिफाना सोदांनो गोसो दंमोनब्ला थांनाय 4 खावसे बोसोरावनो मावफुंनो हागौमोन नाथाय दुखुनांथाव खोथाया जाबाय नखर बिफाना लख सभानि बिसायखथिनि सम सफैनायखायसो सिगां सिगां आसाम अकर्डखौ गोसोखांबाय, आसाम एकर्डखौ 6थि दफाखौ सोदांनो थाखाय कमिटिनि सायाव खमिटि दाफुंनायनि सोलायै जों मिरु सरकारनिफ्राय गुफुर पेपार दाबि खालामो” होन्नानै बिथांआ बुंबावो।
फारसेथिं आसाम जातिय’थावादि युवा चाट्र परिसदनि गाहाय नेहाथारि पालास सांगमाइ बिथांआ बुङोदि, केबिनेटनि थांखि लानाया राजखान्थिआरि सार्ट दं। बिथांआ बुङोदि, “सुबुंफोरनि सान्नायफोरखौ सोलायहोनानै नोगोरारि बिल 2016 खौ पारलियामेन्ट आव सोदांनो थाखाय थांखि लानायसो”। “मोन 70 आफादफोरनि नोगोरारि सोदांनाय बिल 2016 नि बेरेखा सोमावसारनाया थांबाय थागोन” होन्ना बिथांआ बुंबावो।
