गुवाहाटी,जानुवारि 03: मिरु सरकारनि केबिनेटनि जथुमायाव आसाम हादोरसानि असमिया आरो गुबुन गुबुन राव रायज्लायग्रा गुबुन गुबुन हारि माहारिफोरखौ रैखाथि होनो थाखाय जारिमिनारि रैखाथि होनो थाखाय आगान एबा मावफारिया लानायनि सोमोन्दै गोदान दिल्लीनिफ्राय नखर मंत्री राजनात सिंह बिथांआ बुधबाराव प्रेस बिबुंसारनि गेजेरजों फोरमायनानै होयो।
खौरां मोन्नाय बादिब्ला मिरु सरकारनि केबिनेट आव मावफारिया लानायखौ हादोरसानि गिबि मंत्री सर्बानन्द सनवाल बिथांआ बरायनानै बुङोदि, “बे मावफारिया लानाया मिरु सरकरानिफ्राय हरनाय गोदान बोसोरनि बान्था आरो बे मावफारिया लानाया हादोरसायाव थानाय मोनफ्रोमबो हारि माहारिनि गोलाव समनि इयुनखौ रैखाथि होनो हागोन” होन्ना बुंबावो।
गिबि मंत्री बिथांआ बुंबावोदि, “मिरु सरकारनि केबिनेटनि जथुमाया हादोरनि गाहाय मंत्री नारेन्ड्र मोडी बिथांनि दैदेन्नायाव जादों, बे जथुमायाव आसाम हादोरसानि बेंखनाव थानाय थागिबि सुबुंफोरनि रैखाथिखौ नोजोर होनानै 35 बोसोर गोलाव सम जालांनाय आसाम गोरोबथानि 6थि दफाखौ नायबिजिरनानै सोदांनो थाखाय गोजौ थाखोनि खमिटि दाफुंनो थांखि लायो। बेफोरजों लोगोसे आसाम बिधान सभा, ओनसोलनि आफाद आरो आसाम सरकारि सिङाव नांगौबादि मोनफ्रोमबो हारिफोरनो मासिफोरखौ रान्नानै होनो थांखि लायो”।
“बेफोरजों लोगोसे हादोरसा सरकारखौ फोजौखांनानै ओनसोलनि हानि आयेनफोरखौ सोदांनाय, गोबाव समनिफ्रायनो सोलिबोनाय असमिया सुबुंफोरनि आखुथाय, धोरोम सिबिनाय, राव, हारिमु, थुनलाइफोरनि सायाव नायबिजिरनाय आरो थागिबि सुबुंफोरनि हानि मोन्थायखौ रैखाथि होनाय।
असमिया माहारिफोरखौ रैखाथि होनायजों लोगोसे हादोरसानि सिङाव थानाय गुबुन गुबुन हारि माहारिफोरनि राव, हारिमु, थुनलाइ आरो सोलिबोनाय गुनगोनां आखुथायफोरखौ रैखाथि होनायानो आसाम गोरोबथानि गुबै थांखि, बेखौ सोदांनाया गोलाव समनि थाखाय थागिबि सुबुंफोरखौ रैखाथि होनाय” होन्ना बिथां सनवालआ बुंबावो।
बिथांआ प्रेस बिबुंसारनि गेजेरजों फोरमायबावोदि, “2003 माइथायनि बड’ गोरोबथा एबा एकर्डखौ गोख्रोङै सोदांनाया BTAD ओनसोलाव थानाय राव, हारिमु, थुनलाइफोरखौ जौगाखां लाबोनायजों लोगोसे समजखान्थि-रांखान्थि जौगानायाव हेफाजाब होगोन”।
बड’लेन्ड हालामजों सोरखिलांनाय गोख्रै खारनो हानाय “आर’नाय एक्सफ्रेस” रेल गारिखौ बेखेवनाय, क’कराझार जिल्लायाव बड’ मिउजियाम काम राव आरो हारिमु सोलोंथाय मिरु गायसंनाय, क’कराझार आव थाखानाय ऑल इंन्डीया रेडिव (AIR) आरो दुरदर्सन (DD) खौ फोजौखांनाया BTAD ओनसोलखौ समानै जौगाखांनायाव हेफाजाब होगोन होन्ना सनवाल बिथांआ प्रेस बिबुंसारनि गेजेरजों फोरमायहबावो।
