तामुलपुर/गुवाहाटी, मार्च 05: पुलवामा गाग्लोबनायाव आसाम हादोरसानि बाक्सा जिल्लानि सिङाव थानाय कलबारि गामिनि मुंख्लं जालांनाय मनेस्वर बसुमथारि बिथांनि न’करखौ हेंनि हेफाजाब होनो थाखाय हान्जानि उनाव हान्जा फैगासिनो दं। मानोना बिथांआ रावनिबो राजखान्थि दोलोनि एबा आफादफोरनि सोद्रोमा नङामोन, नाथाय हादोर मोजां मोन्नायनै हादोर रैखाथिनि थाखाय खामानि मावलांनाय सासे बर’ जोहोलावसोमोन।
बेबादिनो मुम्बाइ नोगोरमानि Mac Louis बेसरकारि पार्माची खम्पानिआबो बिथां बसुमथारिनि नकरखौ रांनि हेफाजाब होनानै हादोरनि थाखाय गसंथानो सिगांबोदों। खौरां मोन्नाय बादिब्ला मंगलबारखालि Mac Louis बेसरकारि पार्माची खम्पानिनि सोद्रोमाफोरा बसुमथारि बिथांनि आंगो न’आव फैनानै गासै 5 लाख रां दान होनायनि चेकखौ गथायो।
Mac Louis नि नेहाथारि बिथांआ बुंनाय बादिब्ला महाराशट्र हादोरसानि मुम्बाइ नोगोरमायाव थानाय Mac Louis बेसरकारि पार्माची खम्पानिआ पुलवामा जाथाय जानानि सान्नै उनावनो जाथायजों मुंख्लं जालांनाय सा 40 निबो बांसिन सीआरपीएफनि सोद्रोमाफोरनो 5 लाख रां दान होनायनि थांखि लादोंमोन। बेबादियैनो मुम्बाइनिफ्राय कलबारिसिम फैनानै मंगलबारखालि 5 लाख रां दान होनायनि चेकखौ मुंख्लं बसुमथारि बिथांनि न'आव गथायो।
सीआरपीएफ रौनिया हान्जानि सोद्रोमा मुंख्लं मनेस्वर बसुमथारिआ थांनाय 14 फेब्रुवारि 2019 अक्ट’आव जम्मु आरो काश्मीर हादोरसानि सिङाव थानाय पुलवामा जिल्लायाव गोहोगोरा बमाजों उदखारिफोरनि गाग्लोबनायाव हादोरनि थाखाय गावनि बेसेनगोसा जिउखौ बांवलांनो गोनां जादोंमोन।
सासे सुबुंनि जिउनिफ्राय रांआ देरसिन नङाब्लाबो बिथांनि नखरखौ हेफाजाब होनो फारफ्रोमबो बिथिंनिफ्राय सिगांबोगासिनो दं। थांनाय 27 फेब्रुवारि 2019 अक्ट’आव पतंजली कम्पानिनि गाहाय स्वामी बाबा रामदेबआबो 2.5 लाख रांनि अनसुंथाय होनायनि चेकखौ गथायदोंमोन।
खोला भारतनि माता अम्रितानान्दामायी बिथांआबो पुलवामा जाथायनि मुंख्लंफोरनि नखराव 5 लाख रांनि अनसुंथाय होगोन होन्नानै थांनाय 22 फेब्रुवारि अक्ट’खालि फोसावनानै होयो।
आसाम सरकारआबो जाथायनि सान्नै उनाव 20 लाख रांनि अनसुंथाय होगोन होन्ना फोसावदोंमोन आरो फोसावनाय लेखा थांनाय 21 फेब्रुवारि 2019 अक्ट’खालि गिबि मंत्री सर्बानन्द सनवाल बिथांनि बिथोन बादियै बिथांनि मेडिया बोसोनगिरि रिसिकेस गौस्वामि बिथांजों लोगोसे हादोरसा दै (PHE) बिफान्नि मंत्री रिहन दैमारि आरो तामुवपुर बियाबनि एमएलए इमानुयेल मुछाहारि बिथांमोनहा मुंख्लं जालांनाय गेदेमा मनेस्वर बसुमथारि बिथांनि न’आव थांनानै 20 लाख रांनि अनसुंथायखौ आसाम सरकारनि जानानै गथायदोंमोन।
फारसेथिं थांनाय 3 मार्च अक्ट’खालि स्राधा खुंफुंनाय समाव हादोरसा सरकारखौ दैदेन्नाय हादोरसानि गिबि मंत्री सर्बानन्द सनवाल बिथांआ मुंख्लं बसुमथारि बिथांनि न’आव थांनानै मुंख्लं बसुमथारि बिथांनि फिसाजो दिदोमस्रि बसुमथारि बिथांनो Assistant Tourism Officer साक्रिनि लाइजामखौबो गथायनानै होदोंमोन।
फारसेथिं बीटीसी खुंथाया पुलवामा जाथायखौ दुखु मोन्नाय फोरमायदोंब्लाबो दिनैसिम अनसुंथाय होनायनि खौरां मोन्नाय जायाखै, नाथाय बावैसो सिगां बीटीसी खुंथायनि गाहाय हाग्रामा महिलारि बिथांआ गुबुननि अनसुंथाय होनायफोरखौ नायग्रोनो, बेनि उनाव बीटीसी केबिनेट आव सावरायनानै माबा मोनसेब्लाबो अनसुंथाय होगोन आरो बसुमथारि बिथांनि नखरखौ आखायाव लागोन होन्ना बुंदोंमोन।
