गोदान दिल्ली/गुवाहाटी,डिसेम्बर 28: जुलि जाखांनाय मुस्लिम आयजोफोरनि थाखाय गोजोन्थाव खौरांदि, मुस्लिम आयजोरखौ नखरनिफ्राय जादु खालामनाय राव ‘ट्रिपल टालाक’ एबा ‘टालाक-इ-बिदात’ बिल 2018 खौ हेंथा खालामानानै लख सभानि जथुमायाव गोबां दान्थे-बिदान्थेनि गेजेरजों ब्रिहस्पथिबाराव थिसनजाबाय। जाय खामानिखौ मावोब्ला दायनिगिरि जानायजों लोगोसे थाम बोसोर जोबथेसालिआव थानांगोन आरो जुरिमाना होनांगोन।
ट्रिपल टालाक आयेन, जाय आयेननि गेजेरजों हाबा जाखानाय फिसायआ गावनि आंगो असे बिसिखौ जुदा खालामनो थाखाय ‘ट्रिपल टालाक’ एबा टालाक, टालाक, टालाक होन्नानै गावस्रा होयोमोन आरो भारत हादोरमायाव बे आयेनआ गोबाव समनिफ्रायनो सोलिबोगासिनो दंमोन, गोजोनथाव बाथ्राया जाबाय, बे बिलखौ बेरेखा दोलोफोरा लख सभानि जथुमायाव 4 घन्टा गोख्रोङै दान्थे बिदान्थे जानायनि गेजेरजों थिसनजाबाय।
बिलखौ गनायनायनि सिगां कंग्रेस आरो AIADMK दोलोफोरा लख सभानि जथुमानिफ्राय ओंखारलांनानै बिल आरो सरकारजों दाफुंजानाय
गोदानै थिसनजानाय ट्रिपल टालाक बिलनि हेंथायै जाय हाबा जाखानाय फिसय एबा जाय सुबुंआ गावनि देहानि थैजों सोमोन्दो दं, बे बिथांखौ ट्रिपल टालाक बुंनानै गावस्रा होयोब्ला थाम बोसोर जोबथेसालिनि साजा होनायजों लोगोसे जुरिमाना फोनांनाय जागोन। गोदानै थिसनजानाय आयेनआ जुम्मु आरो कास्मिर हादोरसाफोरनि अनगायै गासै भारत हादोरसानि थाखायनो जागोन होन्ना मिथिनो मोन्नाय जायो।
सिगां मिरु सरकारनि आयेन बिफान्नि मनट्री रभि शंकर प्रसाद बिथांआ ‘ट्रिपल टालाक’बिलखौ गनायनानै लानांगौ मानोना बे बिलआ मुस्लिम आज्योफोरनि मोन्थायखौ रैखाथि होनानै गोहो बांहोनाय होन्नानै गोख्रों रावजों बुंदोंमोन। पीरसेथि बेरेखा दोलोफोरा मिरु सरकारजों सायखजानानै दाफुंजानाय खमिटिनि रिपर्ट बादियै थांनांगौ होन्ना दाबि खालामदोंमोन।
जेब्ला मुस्लिम आयजोफोरनि मोन्थाय (Protection of Rights on Marriage) बिल 2018 खौ बेरेखा खालामनाय दोलोफोरनि बिबुंसारफोरखौ लख सभानि जथुमायाव गनायथि होआखौ अब्ला रभि संकर बिथांआ बुङोदि, “ट्रिपल टालाक बिलखौ जेरैखिजाया बन्द’ खालामनो नांगौ आरो गोदान आयेन थिसननांगौ”।
“थांनाय जानुवारि 2018 निफ्राय डिसेम्बर 10 अक्टसिम गासै मोन 477 ‘ट्रिपल टालाक’ आयेननि केसफोरखौ मोन्नाय जादों, आरो थांनाय मोयाबो (बुधबार) बेबादिनो हायद्राबादआव बे एखे रोखोमनि केसखौ जों नुनो मोनदों, बेफोरनि थाखायनो गोदान आयेनखौ लाबोनो गोनां जादों” होन्ना बिथांआ बुङो। मोन 20 इस्लामिक हादोरफोरा बे बिलनि हेंथायै आयेन फोसावदों आरो बन्द’ खालामदों। मंत्री बिथांआ सोंथि सोङोदि, भारत हादरआ सेकुलार हादोर जानानैबो मानो नांगौबादि आयेन थिसन्नो हाया आरो मानो बे आयेनखौ बन्द’ खालामनो हाया?
गोदान बिलखौ जेरैखिजाया सोदांनांगौ होन्नानै मंत्री प्रसाद बिथांआ बुङोदि, “आं खावलायो बे आयेनखौ राजखान्थिआरि सार्टनि फारसे लांनो नाङा, बे हाउसआनो जिनाहारि खामाग्रा दायनिगिरिखौ फासि होनायनि साजा फोसावदों, आयजोफोरखौ रैखाथि होनो थाखाय नखराव नांज्लायनाय आरो दावरि आयेनफोरखौबो बे एखे नब्लांआवनो बन्द’ खालामदों, अब्ला जों खौसेयै बे जेंना गोनां बिलनि हेंथायै मानो राव बुंनो हाया?”।
“सरकारआ गुवार बिखाजों खामानिखौ मावो, रावनिबो जानानै राव बुङा, आरो बे गोदान बिलखौ नोजोर होनानै सिंगांबो गोबां राव बुंखांबाय” होन्ना बिथां प्रसादआ बुबावो।
“राजखान्थिआरि बिथिंखौ नोजोर होनानै बाथ्रा बुंनो नाङा नाथाय सुबुं माहारि जानानै बाथ्रा बुंनांगौ, जुदि माबाफोर बिथोन होनो थाखाय बिबुंथि दङ’ब्ला सरकारा गनायनानै लागोन” होन्ना दाजाबदेरनानै बिथांआ बुङोदि, “बिलखौ राजखान्थिआरि जाहोन्नि थाखाय बेरेखा खालामनो नाङा”
थांनाय बोसोरनि डिसेम्बर दानावनो लख सभानि जथुमाया गनायथि होदोंमोन नाथाय राज्य’ सभानि जथुमाया गनायथि होनानै बिलखौ पास खालामाखैमोन। गोदान बिलखौ थिसन्नानै थांनाय 2017 माइथायनि बिलखौ बोखांफिन्नानै आयजोफोरनि मोन्थायखौ रैखाथि होनो लख सभानि जथुमाया बिलखौ पास खालामबाय।
