गुवाहाटी,फेब्रुवारि 5: थांनाय 10 आरो 20 बोसोर सिगांनिफ्रायनो रां लानानै फोरोंगिरिनि मासिआव थिसनबोनाय ऑफिसारफोरनि बेरेखायै मावफुंनो थाखाय हादोरसा सरकारा रां जाख्ल’ग्रा ऑफिसारफोरनि मुंफोरखौ फारिलाइ खालामगासिनो दं” होन्ना हादोरसा सोलोंथाय बिफान्नि मंत्री सिदार्ध बाटाचार्य बिथांआ समबारखालि आसाम बिधान सभानि जथुमायाव बुङो।
खौरां मोन्नाय बादिब्ला बिथांआ जथुमायाव साप्लिमेन्टारि दाबि बादियै नांगौबादि बुंथिनानै होदों।
रोखा मिथिहोनानै बिथां बाटाचार्यआ बुङोदि, हादोरसा सरकारआ नुनो मोनदोंदि, 20-25 बोसोर सिगांनिफ्रायनो माखासे ऑफिसारफोरा गोबां फरायसालिफोराव आयेन बेरेखायै फोरोंगिरि थिसनबोदों, जुदि मोन 30 फोरोंगिरिनि मासि ओंखारदों, अब्ला सा 300 सो फोरोंगिरिफोरनो साख्रिनि फोरमानलाइ होबोदों।
“सोलोंथाय बिफान्नि माखासे रां जाख्ल’नायाव लोब्बा थानाय ऑफिसारफोरनि मुंफोरखौ फारिलाइ खालामनो बिथोन होनाय जाबाय। आयेन बादियै बिथांमोनि बेरेखायै राहा लानाय जागोन। नाथाय माखासे ऑफिसारफोरा आजिरा लाबाय अब्लाबो रावबो बारगनो हानाय नङा” होन्ना बिथांआ बुंङो।
बाटाचार्य बिथांआ बुंबावोदि, गुवाहाटी गोजौ बिजिरसालिआव आसाम सोलोंथाय बिफानावनो बांसिन केसफोर दं, जाय केसफोरा थालांगासिनो। बेफोर केसफोरनि थाखायनो सोलोंथाय बिफानखौ मोजाङै सामलायलांनायाव सम सम जेंनाफोरजों मोगा मोगि जानो गोनां जायो। गुवाहाटी गोजौ बिजिरसालिआव केस थानायनि थाखायनो जों दासिमबो गुवाहाटी मुलुग सोलोंसालिनि लेङाइ सामलायगिरि (Vice Chancellor) नि मासिआवबो थिसननो हायाखै।
रावबो दोलोफोरनि मुंखौ मख’आ लासे बिथां बाटाचार्यआ बुङोदि, सरकारि फरायसालिफोरनिफ्राय फरायसाफोरनि जानानै लामा सामा धर्ना होनाय हाबाफारि लानाया मोजां नङा, गुबैयै सरकारि फरायसालिफोराव गोगो सोलोंथाय होनो थाखाय बांसिन नाजानांगौ, जुदि फरायसाफोरखौ लानानै लामा सामा धर्ना होगोन, अब्ला बिथांमोनि इउनआ खोमसि जागोन”। बिथांआ बुंबावोदि, आं प्रायभेट फरायसालिफोरनिफ्राय धर्ना होनाय हाबाफारिफोराव बाहागो लानायखौ नुनाय जायाखै। साफ्रोमबो मिथिनाया गोनांदि जाहाथे सोलोंथाय बोसोरआ खहा जाया।
