तामुलपुर,फेब्रुवारि 22: थांनाय 14 फेब्रुवारि 2019 आव जम्मु आरो काश्मीर हादोरसानि पुलवामा जिल्लायाव पाकिस्तान हादोराव जोनोम मोन्नाय जाइस-इ-महामद इस्लामिक उदखारि हान्जानि गाग्लोबनायाव आसाम हादोरसानि बड’लेन्ड हालामाव थानाय तामुलपुर ओनसोलनि मुंख्लं मनेस्वर बसुमथारि बिथांनि न’आव आसाम हादोरसा रां बिफान्नि मंत्री ड: हिमान्त बिस्व सर्मा बिथांआ थांनानै मुंख्लं मनेस्वर बसुमथारिनि बिसि आरो फिसाजो, फिसाज्लाफोरखौ लोगो हमहैनानै सुक्रबाराव मान बावहैयो।
सर्मा बिथांआ खौरांगिरिफोरनि सिगांआव बुङोदि, पुलवामा गाग्लोबनायाव लोब्बा थानाय इस्लामिक उदखारि हान्जानि सोद्रोमाफोरा गोख्रोंनिफ्राय गोख्रोंसिन साजा होजाथों”।
बिथांआ बुंबावदोंदि, “थासारिआ गोज्रि जालाङोब्ला पुलवामा जाथानि बादि आसामावबो जाथाय जानो हागौ होन्ना आं सानो बेनिखायनो आसामनि राज्यो राजाफोरा सांग्राथि जानानै थानाया गोनां, जाहाथे आसामखौ जों 2थि खाश्मीर जानायनिफ्राय होबथानानै दोन्नो हायो।
आसाम हादोरसायावबो जेहादि इस्लामिक उदखारि हान्जाफोरा बांबोगासिनो दं, जेरै बावैसो सिगां कलकातायावबो हमनो मोन्नाय जादोंमोन, बेफोरनि सायाव माबाफोर राहा लादों नामा होन्ना खौरांगिरिनि सोंथिआव सर्मा बिथांआ फिन्नाय होयोदि, थांनाय बावैसो सिगांफोरनिफ्राय बेफोरखौ नुनो मोनदों आरो बेबादियैनो आसाम सरकाराबो बेफोरखौ दबथायनो थाखाय राहा लागासिनो दं। बिथांआ रहिंगियाफोरखौ थांखिनानै बुङोदि, आसामाव माखासे मैलावादि आफादआ राज्योफोरखौ बुरखायनानै रांनि गोहो हरनायखौबो नुनोमोन्नाय जादों, रहिंगियाफोरखौ आसाम हादोरसायाव लाखिनांगौ होन्नानैबो कंग्रेस सरकारा मोनसे समाव बुंदोंमोन, बेखौबो जों नुनो मोन्नाय जादों बेनिखायनो आसामनि जेंनाफोरा गोरा जानानै दं।
बिथांआ बुंबावोदि, “2थि बाथ्राया जाबाय, सम सोलायबोनायजों लोगोसे काश्मीर हाहोरसानि उनाव आसाम, सोनाब बेंगल आरो केरेला हादोरसाफोराबो जेहादि उदखारिफोरनि बांबोनायखौ जों नुनो मोन्नाय जादों, आसामनि हजाय आरो जमुनामुक ओनसोलफोरनिफ्रायबो माखासे जेहादि उदखारिजों लोब्बा थानाय सुबुंफोरखौ हमनो मोन्नाय जादों, बिहार हादोरसानि बैधगया बमा बेरफ्रुनायावबो आसामनि लाइमोन लोब्बा थानायखौ नुनो मोन्नाय जादों, बेनिखायनो आसाम सरकारा मावनांगौ गोबां हाबा दं”।
“आं राज्यो राजानि जानै मुंख्लं मनेस्वर बसुमथारिखौ सासे मुख्लं होन्नानै मान बावबाय, बिथांआ सासे असमिया जीतीय’ जोहोलाव मुख्लं होन्नानै जों बयबो मान बावबाय, बिथांनि नखरखौ फारफ्रोमबो बिथिंआवनो हेफाजाब होनो थाखाय आसाम सरकारा नाजागोन” होन्ना बिथां सर्माया बुंबावोदि “मैयाबो माखासे होफाजाब होनाय जाबाय, फैगौ समफोराव बिथांनि नखरखौ अरायथानि थाखाय गायसंनो आसाम सरकारा आखायाव लागोन, दासान्दि जों बिथांनि नखरजों सावरायगासिनो दं, आरो जों सानो बिथांनि नखरखौ गोरायै फसंनो थाखाय आगान सुरलांनो हागोन”।
