क’कराझार,जानुवारि 5: आलादा राज्यो कामातापुर आरो सेडियुल ट्रायबनि बिमुंखौ होनो हायैलाय दुलाराय कछ-राजबंसि फरायसा आफादनि क’कराझार जिल्ला खमिटिआ क’कराझार आव हादोरनि गाहाय मंत्री नारेन्ड्र मोडी, नखर मंत्री राजनात सिंह आरो हादोरसानि गिबि मंत्री सर्बानन्द सनवाल बिथांमोनि मुसुखा बानायनानै सावदों।
खौरां मोन्नाय बादिब्ला राजबंसि फरायसा आफादनि सोद्रोमाफोरा क’कराझार जिल्लानि दिमोलगांव आव थानाय आक्रासुनि गाहाय मावख’आव मुसुखा बानायना सावदों आरो बे हाबाफारिआव सा 100 सो आक्रासुनि सोद्रोमाफोरा बाहागो लादोंमोन होन्ना खौरां मोन्नाय जायो।
राजबंसि फरायसा आफादनि क’कराझार जिल्ला दालाइ खमिटिनि आफागिरि कंकन राय बिथांआ खौरांगिरिफोरनि सिगांआव बुंथियोदि, बिथांमोनहा सेडियुल ट्रायब (ST) बिमुं आरो आलादा राज्यो कामातापुर दाबि कालामबोगासिनो दं, नाथाय मिरु सरकारा बिथांमोनि दाबिखौ जेबो नोजोर होआखै, आरो बेफोर दाबिखौ गुबुन फारसेथिं दोन्नानै, मिरु सरकारनि नखर बिफाना बीटीसी ओनसोलनि गेजेरजों सोरखिलांनाय गोख्रै खारनो हानाग्रा “आर’नाय एक्सप्रेस” मुंनि रेल गारि बेखेवनो फोसावदों, क’कराझार आव ऑल इंन्डीया रेडिव’ स्तेसन आरो दुरदर्सन TV चेनॉलफोरखौ फोजौखांनो नागिरदों आरो बर’ राव आरि मारिमुनि थाखाय क’कराझार आव रिसार्ज चेन्टार गायसंनो नागिरदों होन्ना बुङो लोगोसे बिजेपि सरकार आरो सर्बानन्द सनवाल दैदेन्नाय सरकारआ कछ-राजबंसि हारिनि फारसे जेबो नायाखै होन्ना सोंखारियो।
राय बिथांआ बुंबावोदि, बिजेपि सरकारा 2014 माइथायनि बिसायखथिनि सिगां राजबंसि हारिनो ST बिमुंनि गनायथि होगोन होन्नाय आरो गुबुन गुबुन जेंनांफोरखौ सुस्रांना होगोन होन्नाय बाथ्राफोरखौ मावफुंनाया फेलें जादों। बिथांआ सिरियै जिरायनानै थाया होन्ना सरकारखौ हुमखि होबावो।
गुबुन फारसेथिं, बीटीसी ओनसोलनि गेजेरजों सोरखिलांग्रा गोख्रै खारग्रा “आरनाय एक्सप्रेस” रेल गारि, क’कराझाक AIR आरो TV चेन्टार, लोगोसे बर’ राव आरो हामिरुमि थाखाय काल्चारेल चेन्टारफोरखौ मिरु सरकारा फोसावनाय लोगो लोगोनो दुलाराय राजबंसि फरायसा आफादनि सोद्रोमाफोरा खर’ गरम जादों आरो किटुआव अर नांदों बुङोब्लाबो गोरोन्थि जानाय नङा। बेफोरखौ नोजोर होनानै बिथांमोनहा फैगौ 8 जानुवारि आव 12 घन्टा आसाम बन्द’ फोसावो आरो उनफोराव धर्ना होलांबाय तागोन होन्ना सरकारखौ हुमखि होयो।
लक्किमपुर: आसामनि मोन 6 हारिसाफोर फारियै- कछ, चुटीया, मरान, मटक, टाय अहम, आरो टी-ट्रायब एबा बागानियाफोरा जयैनो लामायाव ओंखारबोनानै लक्किमपुराव धर्ना होयो आरो बिथांमोनहा बुङोदि, बिथांमोनि सेडियुल ट्रायब (ST) नि दाबिखौ मिरु सरकारखौ दैदेन्नाय NDA सरकार आरो नारेन्ड्र मोडीआ नाथ्रोदना दोनदों, फारसेथिं सा-लक्किमपुरनि कछ-राजबंसि फरायसा आफादनि लक्किमपुर जिल्ला दालाय आफादआ खेलमाटीआव सुक्रबारखालि हादोरनि गाहाय मंत्री नारेन्ड्र मोडी, नखर मंत्री राजनात सिंह, आरो आसामनि गिबि मंत्री सर्बानन्द सनवाल बिथांमोनि मुसुखा बानायनानै सावदों होन्ना खौरां मोन्नाय जायो।
राजबंसि फरायसा आफादनि धर्ना होनाय हाबाफारिआव मोन 5 गुबुन गुबुन हारिसाफोरनि सुबुंफोरा माखासे बाहागो लादोंमोन आरो बिथांमोनहा बावैसो सिगां मिरु सरकारनि केबिनेटनि जथुमायाव बिथांमोनि दाबिफोरनि फारसे जेबो सावरायैलाय दुखु मोन्नाय फोरमायदों।
लक्किमपुर जिल्ला कछ-राजबंसि फरायसा आफादनि आफादगिरि दिपक बरा बिथांआ बुङोदि, “बिजेपि दोलोआ फैगौ पारलियामेन्टारि बिसायखथिनिफ्राय मोजां आयदा सोलोंगोन, मानोना बिथांमोनहा थांनाय 2014 माइतायनि सिगां आसमनि मोन 6 हारिसाफोरनो 6 दाननि गेजेरावनो सेडियुल ट्राय बिमुंखौ गनायथि होगोन होन्नाय बाथ्राखौ मावफुङाखै” होन्ना बिथांआ बुङो। दिपक बरा बिथांआनो मुसुखा सावनानै धर्ना होनाय खामानिखौ दैदेनदोंमोन होन्ना खौरां मोनबावनाय जायो।
