गुवाहाटी: बोसोरफ्रोमबो जाफ्लेबाय थानाय दै बानानि जाथायफोरखौ लानानै, सुबुंफोरखौ रैखाथि होनो थाखाय गिबि मनट्री सरबानन्द सनवालआ हादोरसानि रिभेनिउ आरो दिसेस्टार मेनेजमेन्ट बिफानखौ गोजौ नुथाय लुनो मावथांखि लानो खावलायदों।
थांनाय मोनाबिलिआव आसामनि मोन द’ जिल्लाफोरनि दै बानाखौ जनता भबननिफ्राय भिदिय’ खन्पारेन्साव नायनानै गिबि मनट्रीआ बुङोदि, अरायसमनि थाखाय जाफ्लेबाय थानाय दै बानानिफ्राय सुबुंफोरखौ रैखाथि होनो गोजौ नुथाय एबा थाग्रा जायगा लुफुंगोन, रिभेनिउ आरो दिसेस्टार मेनेजमेन्ट बिफाना थाबैनो गोजौ जायगा लुफुंनो थाखाय सानखांथि लानानै फैनांगौ होन्ना बिथांआ बुंबावो।
मख’नो गोनांदि, 13 जुननिफ्राय 3 आगस्तसिम आसामाव मोननै दैनि दाहार सोमजिदोंमोन जायनि जाहोनाव गासै 163 गामिफोरनि 10.99 लाख सुबुंफोरखौ जेंनायाव खोख्लैदोंमोन। गासै गं 388 रिलिव बादा आरो गं 440 रिलिव रानग्रा बादा बेखेवनो गोनां जादों।
