गुवाहाटी,मार्च 7: नेशनेल पिपल्स पार्टी (एनपिपि) राजखान्थि हान्जानि आफादगिरि आरो मेघालया हादोरसानि गिबि मंत्री खनराड सांगमा बिथांआ सा-सान्जा ओनसोलनि सुबुंफोरखौ सुबुंफोरनि लुबैनाय आरो जेंना गोनां बाथ्राफोरखौ लानानै खौसे जानो खावलायदों जाहाथे जेंनाफोरखौ लानानै मिरु सरकारखौ नारसिन्नो हायो। सांगमा बिथांआ बे बाथ्राखौ बुधबारखालि गुवाहाटी नोगोरमानि गनेश उदयाननि नब्लांआव एन पि पि राजखान्थि हान्जानि आसाम हादोरसा दालाइ आफाद फोसावनानै होनाय हाबाफारि लानानै जथुमा खुंफुंनानै बुंफोरनानै होयो।
बिथांआ बुंदेरबादोंदि, जों नेशनेल पिपल्स पार्टी (एनपिपि) राजखान्थि हान्जानि आसाम इउनित एबा दालाइ आफाद दाफुंनाय जाबाय। बेनि थांखियानो जाबाय आंनि बिफा पि ए सांगमानि थांखिखौ सुफुंनो, जाय बिथांआ बे हान्जाखौ थांनाय ब्रै बोसोर सिगांनो दाफुंनायनै होलांदों। एन पि पि राजखान्थि हान्जाया सा-सान्जा ओनसोलनि मोन 5 सा-सान्जा ओनसोलनि हादोरसाफोराव दं। बेफोरजों लोगोसे मनिपुर हादोरसायाव व डिपुटी गिबि मंत्री आरो केबिनेत आव सा 3 गुबुन गुबुन बिफान्नि मंत्रीफोर जानानै दं। दिनै मेघालया हादोरसानि मावख’ आव एन पि पि राजखान्थि हान्जाजों दैदेनजानाय एम डि ए सरकारा 1 बोसोर बारलांबाय।
आसाम हादोरसायाव नेशनेल पिपल्स पार्टी (एनपिपि) राजखान्थि हान्जा फोसावनानै दिलिप कुमार बरा बिथांखौ कॉन्भेनर एबा लिंथुमगिरिनि बिबानखौ होयो।
एनपिपि राजखान्थि हान्जानि थांखिखौ नोजोर होनानै बिथांआ बुंदोंदि, “सा-सान्जा ओनसोलखौ जौगाखांनाय लाबोनाया एनपिपि राजखान्थि हान्जानि मोनसे एंगारनो हायै थांखि। सुबुंफोरनि लुबैनायनि सायाव गेम गेलेनाय एबा सान्नायाबो मोनसे गोनां। एन पि पि राजखान्थि दोलोआ सा-सान्जा ओनसोलफोराव थानाय मोन 25 लख सभा बियाबफोराव बिजाथि थिसन्नो थाखाय सानगासिनो दं। बिसायखथिनि सोमोन्दै दोलोनि बिसायखथि खमिटिआ जोबथा थांखि लागोन”।
उनाव खौरांगिरिफोरनि सोंनाय फिन्नायाव खनराड सांगमा बिथांआ फिन्नाय होयोदि जौगाखांनाय बिथिंखौ लानानै दासान्दिं जों नेशनेल डेमक्रेटिक प्रन्ट (एनडिए) दोलोजों मावफुंगासिनो दं। नाथाय जोंनि थांखिफोरा थारैनो रोखा, सा-सान्जा ओनसोलफोरनि सुबुंनि लुबैनायजों गसंथानायखौ जों माब्लाबो एंगारनानै थाया। जों जायखिजाया थासारिआवनो जेंना गोनां बाथ्राफोरजों नांनो साखाफारा”।
नोगोरारि सोदांनाय बिल 2016 खौ नोजोर होनानै सांगमा बिथांआ बुङोदि, “नोगोरारि बिल 2016 आ आथिखालनि समाव गनायनानै लाजाथाव नङा, आरो बेखौ लानानै गासै सा-सान्जा ओनसोलनि सुबुंफोरा खौसेथि दं। फारसेथिं सावरायनायनि गेजेरजों राहा नागिरनो हायो। गोबां दैदेनगिरि आरो बिबानगिरिफोर दं, जायखिजाया बिलआनो ओनसोलफोराव थानाय सुबुंफोरनि लुबैनाय बादि जानांगोन। मिरु सरकारआ नोगोरारि बिलखौ सोदांनो नारसिनगासिनो दंमोन नाथाय दिल्लीआव सा-सान्जा ओनसोलनि सुबुंफोरा बिलखौ हेंथा खालामनानै खौसेयै गसंथादों”।
पुलवामा जाथायनि उनाव भारत-पाकिस्तान सिमना (LOC) ओनसोलाव अख्रां गाग्लोबनाय (Air Strike) नि सायाव फोरमान होनो हागोन्ना होन्ना खौरांगिरिफोरनि सोंथि सोंनायाव बिथांआ फिन्नाय होयोदि, “जों भारतनि रौनिया हान्जाफोरजों दं, बिथांमोनिफ्राय फोरमान बियोब्ला बिथांमोनखौ सोंखारिनायसो जागोन”।
एक्त इस्त पलिसि (Act East Policy) खौ नोजोर होनानै बिथांआ बुङोदि, “ओनसोलनि सुबुंफोरा बेखौ जाहोनो नांगोन, मिरु सरकारनिफ्रायल सोनारबाय थानायनि अनगायै बिथांमोनहाबो मावफुंनो नाजानांगौ”।
