टंला,फेब्रुवारि 12: आसाम हादोरसानि सिङाव थानाय आडिवासि माहारिनो सेडियुल ट्रायब (ST) बिमुंनि दाबि खालामनानै समबाराव आसाम नाङैनो दुलाराय आडिवासि फरायसा आफाद एबा (All Adivasi Students’ Association of Assam) बन्द’ फोसावनाया उदालगुरि जिल्लानि दाब दाब जायगाफोराव बन्द’ थायो नाथाय माखासे जायगाफोराव बन्द’ थायाखै।
उदालगुरि जिल्लानि गाहाय मावखुलिजों लोगोसे टंला, हातिगड़, आट्टारेघात, कालाइगांव, रौता, माजबाद आरो अरां जायगाफोराव आबुङै बन्द’ थाजोबो। गासै फालांगियारि फसंथानफोरा बन्द’ थाजोबो नाथाय बर’ सुबुं थानाय जायगाफोर जेरै- भेरगांव, कयराबारि जायगाफोराव आसाम बन्द’ब्लाबो हाथाय बाजार आरो गलाफोरखौ खुलिनाय नुनो मोनदों आरो लामाफोरावबो गारि मटर खारनायफोरखौ नुनो मोन्नाय जादोंमोन।
उदालगुरि जिल्लानि सिङाव जेबो गुबै जाब्रबथाय सोमजिनायखौ नुनो मोन्नाय जायाखै नाथाय माखासे जायगाफोराव बन्द’ हेफाजाब होगिरिफोरा गुबुन गुबुन जायगाफोराव टाइयार सावदोंमोन होन्ना खौरां मोन्नाय जायो। बेजों लोगोसे बन्द’नि समाव पुलिस आर्मि पारा मिलिटारिफोरनि हान्जाफोरा जिल्लानि सिङाव थानाय गुबै गुबै टाउनफोराव नायगिदिंबाय थादोंमोन होन्ना मिथिनो मोनबावनाय जायो।
आसामनि मोन 6 हारिसाफोरनो सेडियुल ट्रायब (ST) बिमुंनि दाबि खालामनानै दुलाराय आडिवासि फरायसा आफादआ आसाम बन्द’ फोसावनाय जादों, मानोना थांनाय 9 फेब्रुवारिआव राज्य’ सभानि जथुमायाव बिलखौ लाबोदोंब्लाबो आयेन महरै गनायथि होआखै, रिजार्वेसन मोन्नांगौआ जोंनि संबिजिरनि मोन्थाय, जों सेडियुल ट्रायब एमेन्डमेन्ट बिलखौ सोदांनानै आयेन दायोब्लासो गोजोन्नाय मोनगोन, बिजेपि दोलोआ थांनाय बिसायखथिनि सिगां बुंदोंमोनदि, जुदि मिरु सरकारनि गोहोआव फैयोब्ला आडिवासि माहारिनो ट्रायबेल बिमुंनि गनायथि होगोन, नाथाय बिथांमोनहा दासिमबो मावफुंआखौ, जुदि जोंनि दाबिफोरखौ गनायनानै लायाब्ला फैगौ बिसायखथिआव जों बिथांमोन फिन्नाय होनो साखाफारा जाबाय होन्ना दुलाराय आडिवासि फरायसा आफादनि उदालगुरि जिल्ला आफादगिरि टिंकु अरां बिथांआ बुङो।
बिथांआ बुंबावोदि, माखासे रावजोंबो मिथियै आफादफोरनि दैदेनगिरिफोरा गाव गावनि मुलाम्पानि थाखाय मिरु सरकारनि मावफारिया बादियै सेडियपल ट्रायब बिल 2019 खौ सोदांनो नागिरनायखौ हेंथा खालामगासिनो दं, जाय खामानिआ गनायजाथाव नङा, सरकारा संबिजिराव लिरजानाय आयेन आरो बिथोन बादियै नांगौ जायोब्ला खामानिफोरखौ आवगायलांगोन, अब्ला बैफोर आफादनि दैदेनगिरिफोरा मानि हेंथा? अरां बिथांआ बुङो। बैफोर आफादफोरनि दैदेनगिरिफोरा फिन बे जेंनाखौ लानानै बाथ्रा बुंनायनिफ्राय जानगाराव थानांगौ होन्ना बिथांआ दाबि खालामबावो।
गसाइगांव: दुलाराय आसाम आडिवासि फरायसा आफादनि 12 घन्टा आसाम बन्द’ फोसावनाया क’कराझार जिल्लानि सिङाव थानाय गासाइगांव आव आबुङै बन्द’ थाजोबो। राजा लामाफोराव ट्राक गारिफोरखौ खारनाय नुनो मोन्नाय जायाखै, फारसेथिं प्रायभेट आरो सरकारि गारिफोरखौ पुलिस एस्कर्ट लानानै बारहोनाय जादों। हाथाय, बाजार, गला, फलांगियारि फसंथान आरो सरकारि मावख’फोरा बन्द’नि समाव आबुङै बन्द’ थाजोबो नाथाय जेबो जाब्रबथाय सोमजिनायनि खौरां मोन्नाय जायाखै।
