क’कराझार, मार्च 08: “सिरां जिल्लानि सिङाव थानाय काजलगांव एबा गाहाय जिल्ला मावखनि साखाथिआव बड”लेन्ड आलासि जिरायसालि एबा Bodoland Guest House लुफुंनो नाजानाया गोबाव समनिफ्रायनो नेबोनाय मोनसे मावफारियामोन, जाय जिरायसालिआव गोजान गोजाननिफ्राय जिल्लायाव गिदिंनो फैनाय आरो गुबुन गुबुन सुबुंफोरखौ जायगा होनो हागोन” बे बाथ्राखौ बीटीसी खुंथायनि गाहाय हाग्रामा महिलारि बिथांआ गोदानै लुफुंजानाय आलासि न’खौ ब्रिहस्पथिबारखालि बेखेवनानै बुङो।
काजलगांव आव गोदानै बेखेवजानाय आलासि जिरायसालि न’आव मोनानि समाव थानायनि खाबु दं आरो सरकारि जथुमा जिरायनायनि खाबुफोर दं होन्ना महिलारि बिथांआ बुंबावोदि “आं सानो जिल्लानि सिङाव गोजान गोजान जायगाफोरनिफ्राय गिदिंनो फैनाय सुबुंफोरनो जायगा होनो थाखाय जिल्ला खुंथायनि नांगौ जानाय जिरायसालिआ एसेब्लाबो सुफुंनानै होगोन”।
महिलारि बिथांआ राज्यो राजाफोरनि गेजेराव बुंथिदोंदि, काजलगांव आव गोदानै बड’लेन्ड आलासि जिरायसालिनि न’खौ बीटीसी पिडाब्लिउडि बिफान्नि गासै 1.5 कौटी रां बाहायनानै G+1 बिलदिं लुनाय जादों, जाय आलासि न’आव गासै मोन 6 उन्दुग्रा खथा, मोन 1 डाइनिं रुम (ओंखाम संग्रा आरो जाग्रा) आरो मोन 1 खन्फारेन्स नब्लां दं, बेफोरजों लोगोसे गोदान आलासि न’आव मोन्नै VIP थाग्रा खथाफोर दं, जाय खथायाव बीटीसी खुंथायनि गाहाय (BTC chief) आरो बीटीसी डिपुटी गाहाय (BTC Deputy Chief) बिथांमोनहा थानो हागोन। केटारिं, न’ नेग्रा आरो न’ फोसाबग्राफोरनि थाखाय बीटीसी खुंथाया जायगा खालामनानै होनो आखायाव लादों होन्ना खौरां मोनबावनाय जायो।
खौरांगिरिफोरजों मोगा मोगिआव महिलारि बिथांआ गावनि खुंथायनि गेजेरजों बेफोरबादिनो जिल्लानि सिङाव गोदान गोदान आलासि न’ आरो सब्डिविज़न मिरु फोरखौ गायसंनो थांगासिनो दं। बिथांआ फोरमायबांवदोंदि उदालगुरि, बिजनी आरो गसाइगांव आव सब्डिविज़न मिरुफोरखौ फसंनो अन्थाय खाम्फा गायसंनाय जाबाय।
बीटीसी डिपुटी गाहाय काम्फा बरगयारि, बीटीसी प्रिन्चिपाल सेक्रेटारि बिरेन चन्ड्र फुखन, लोगो प्रिन्चिपाल सेक्रेटारि रबिनसन मुछाहारि, सेक्रेटारि केरल नार्जारि, जयेन सेक्रेटारि सुभालक्सीमि देका, बीटीसी खुंथायनि बार्ग बुंथिगिरि पानिराम ब्रम्ह आरो बार्ग इएम जेम्स बसुमथारि बिथांमोहा बेखेवनाय हाबाफारिआव नुजाथिदोंमोन।
