हाग्रा बिफाननि लोरबांथिनि जाहोनाव मैदेरनिफ्राय सुबुंनि जिउ आरो धोनफोरखौ रैखाथि होनो हायाखै

टंला,नवेम्बर 23: भारत-भुटान सिमायाव थानाय उदालगुरि जिल्लायाव हाग्रानि मैदेर आरो सुबुंनि दावहाया गोख्रोंनिफ्राय गोख्रों जालांगासिनो दं। 2018 माइथायाव दिनैसिम जिउ गोमानांनाय सुबुंफोरा गासै सा 16 जाबाय। नवेम्बर दान्नि 19 अक्टआव सानसेनो गासै सा 3 सुबुंनि जिउ खहा खालामदोंमोन। गासै नवेम्बर दानावनो मैदेरनि उटकाराव थैनाय सुबुंफोरनि अनजिमाया गासैसा 8 जाबाय होन्ना मिथिनो मोन्नाय जायो।

सिगां, अक्टबर आरो नवेम्बर दानाव सानै सुबुंखौ जिउ फोजोबदोंमोन, जुलाइ दानाव सासे सुबुंखौ जिउ फोजोबो, मे दानाव सासे सुबुंखौ जिउ फोजोब आरो एप्रिल दानावबो सासे सुबुंनि जिउ फोजोबो। मैदेर थाबायग्रा ओनसोलफोराव न’लुनानै थानाय, आयेन बेरेखायै हाग्रा ओनसोलाव न’ लुनाय, मैदेर थाबायग्रा जायगाफोराव अन्थाय बुरखांनाय बायदि बायदि खामिनिफोरनि थाखाय मैदेर-मानसिनि दावहाया गोख्रोंसिन जादों होन्ना मिथिनो मोन्नाय जायो। बेफोर जाथायफोरजों उदालगुरि जिल्लानि हाग्रा बिफान्नि माखासे सोद्रोमाफोरा लोब्बा दं। फारसेथिं 2018 माइथाव दिनैसिम गासै मा 3 हाग्रानि मैदेरफोराबो जिउ गोमानांबाय होन्ना मिथिनो मोनबावनाय जायो।

मखनो गोनांदि, BTAD ओनसोलाव थानाय धनस्रि हाग्रा बिफानखौ 2006 माइथायनि 19 जानुवारिआव दाफुंदोंमोन आरो बे समनिफ्रायनो BTAD 6^th Schedule ओनसोलनि सिहाव तानायलाय आसाम सरकारनि मोन 3 हाग्रा बिफान ङारियै- Wildlife, Territorial and Social Forestry खौ नायगासिनो दं। Social Forestry बिफान्नि सिङाव धनस्रि बिफाना ओनसोलनि मोन 3 होबथानानै दोन्नाय हाग्रा ओनसोलफोर फारियै- खालिंगदुवार, भैरबखुन्डा आरो रौटानि हाग्रा ओनसोलफोरखौ नायगासिनो दं। Territorial आरो Bornodi Wildlife Sanctuary (BWLS) नि सिङाव मुंदांखा जेरावबो मोन्नो हायै Pigmy Hog आरो Hispid Hare फोरखौ Wildlife बिफाननि सिङाव नायगासिनो दं।

मोनफ्रोमबो हाग्रा ओनसोलफोरखौ नायनो थाखाय सानैल’ डुपुटी रेन्स ऑफिसार, सा 16 फरेस्टार-I आरो सा 8 परेस्टार-II, सा 33 परेस्ट गार्ड आरो सा 2 नायदिग्राफोरा हाग्रा ओनसोलखौ होबथानाय खामानिफोराव नांथाबना दं होन्ना मिथिनो मोन्नाय जायो।

गोमोथावै, हाग्रा बिफानाव गासै सा 17 परेस्ट गार्डफोरनि मासिआ लांदां जानानै दं आरो सा 33 थाखानाय परेस्ट गार्डफोरा देहायारि लोरबां जालांबाय आरो हाग्रा होबथानाय खामानिखौ मावफुंनो हाला होन्ना मिथिनो मोनबावनाय जायो। मखनो गोनांदि, दासान्दि उदालगुरि धोनस्रि हाग्रा बिफानाव मावनो थाखाय रावबो गोयै बादिसो जागासिनो दं।