गुवाहाटी,डिसेम्बर 7: आसाम हादोरसा खुंगिरि जगदिस मुकि बिथांआ 2018 माइथायनि मुंदांखा साहित्य’ एकाडेमि बान्था मोनगिरि सान्तना टान्टी आरो रिथुराज बसुमथारि बिथांमोनि बान्था मोन्नायखौ जोबोद गोजोनग्लायनाय फोरमायहरदों।
बिथांआ बुङोदि, सान्तना टान्टी आरो रिथुराज बसुमथारि बिथांमोनि नाजानायाव हादोरसानि थुनलाइखौ गुबुन मोनसे थाखोआव जौगाहोनायाव बिहोमा होगोन आरो बिथांमोनि बान्था मोन्नाया हादोरसाखौ गोग्गाखांनाय लाबोदों होन्ना बुंबावो।
मखनो गोनांदि, असमिया रावनि लिरगिरि सानान्ट टानटी बिथांआ गांवनि खन्थाय बिजाबनि थुबुर खालामनाय बिजाब “कायलर डिनटु अमर हब” आरो बर’ रावनि रायथाय (Fiction) लिरगिरि रिथुराज बसुमथारी बिथांआ गावनि “दोंसे लामा” रायथायनि थाखाय 2018 माइथायनि साहित्य’ एकाडेमिक बान्थाखौ मोन्नो हायो।
खौरांगिरिनि सिगांआव टानटी बिथांआ बुङोदि, “ आं लिरदों आरो सुबुंफोरनि थाखाय, समाजनि थाखाय, आबहावानि थाखाय आं खन्थाय लिरनो मोजां मोनो, आं खन्थाय लिरनायाव रावनुबो खन्थायजों रुजुनानै नाया, आंनि खन्थायखौ आंनि गोसोजोंनो सान्नानै लिरो, आरो आंनो बे बान्थाखौ नांगौ मानोना आं लोमजानानै दं” होन्ना बिथांआ बुबावो।
टानटी बिथांआ आसाम हादोरसानि सिङाव थानाय करिमगन्ज साह बागानाव 1952 माइथायाव जोनोम मोन्दैमोन। बिथांआ गावनि गुदि फरायसालिखौ बेंगलि रावजों फरायनानै फोजोबो आरो उनाव सिलंआव फैयो, बेनि उनाव गोजौ सोलोंथाय लानो थाखाय जरहात जिल्लायाव फैयो। बिथांआ गोबां बिजाबफोरबो लिरबाय, बेनिनो माखासे बिथांनि बिजाबफोरा जाबाय- उज्जल नक्साट्रर सान्टनात, निजर बुरेद्दि शेस प्रस्ताब, शब्दात अतवा शव्दहिनताट, थुपनिटु केथियाबा बारिसा आहे, धुवा चेयर हपुन, मुर प्रिया हपनर उसरे पाजुरि आरो बायदि बायदि।
आसाम हादोरसानि कार्बि आंलं जिल्लायाव 1963 माइथायनि 20 अक्टबराव जोनोम मोन्नाय बर’नि फिसा बसुमथारि बिथांआ असमिया रांजों मास्टार दिग्रि लानानै उट्रिसारनाय बिथांआ बुङोदि, रायथाय लिरगिरि नगेन सायकिया आरो सौरब सालिहा बिथांमोनिफ्राय हाजासे रायथाय लिरनो थाखाय थुलुंगाहोनाय मोनदों, “आं बे बान्थाखौ मोन्नांगौ, बे बान्थाया आंनि थुलाइ सिबिनाय आरो लिरनाय खामानिआव बांसिनै थुलुंगा होगोन” होन्ना बिथांआ बुङो।
