गुवाहाटी,फेब्रुवारि 6: थागिबि सुबुंफोरनि हानि मोन्थायखौ सावरायनायाव हादोरसानि गोबां थागिबि आरो हानि फिसाफोरा बेसेबां रैखाथि दं, बेनि सोमोन्दै दानि सोलिफुबाय थानाय ‘बाजेत सिजन’नि आसाम बिधान सभानि जथुमायाव सावरायदों। हादोरसा रिभेनिउ बिफान्नि मावनांगौ हाबाफारि बाजियै हानि फाट्टा होनांगौ खामानिआ सामु मानबायनाय बादि, हानि मोन्थाय आरो हानि फाट्टा गैयाब्ला बिथांमोनहा सरकारि सुबिदाफोरखौ मोन्नो हाया।
दोलो गोयै जनाय बियाबनि उदां बिजाथिनि MLA भुबान पेगु बिथांआ सावरायनायाव बाहागो लानानै बुङोदि, जनाय ओनसोलाव गोबां थागिबि सुबुंफोर दं, जाय बिथांमोनहा हानि मोन्था गैजाया। बिथांमोनहा गावसोर थानाय हायावनो हानि फोरमानलाइ एबा हा पाट्टा गैजाया, सिलापटार टाउन आवबो बेबादिनो जानानै दं, गोबां थागिबि सुबुंफोरा हानि पाट्टा गैजाया, सिलापटार आव थानाय आंनि बिमा बिफानि हा जाय हायाव आं थाबोदों बे हायाबो नांगौबादि हानि फोरमानलाइ गैया, जेब्ला हानि फोरमान बिलाइखौ मोन्नो थाखाय माखासे फोरमाइथि बिलाइफोरखौ रिभेनिउ बिफानाव हरनाय जादोंमोन अब्ला बिथांमोनहा फोरमाइथि बिलाइफोरखौ गारसोनानै दोनदों। बेबादिनो गोबां थागिबि सुबुंफोरा सिं सिं नाख्रेबजाबोगासिनो दं, होन्ना बिथांआ बुङो।
धेमाजि जिल्ला बिजेपि दोलोनि MLA रानज पेगु बिथांआबो बुङोदि, आंनि बियाबनि गोबां थागिबि सुबुंफोराबो हानि फोरमानलाइ मोनालासे गोबाव समनिफ्रायनो थाबोगासिनो दं, आरो बिथांमोनि थाखाय हानि संबिजिरारि मोन्थायखौ सिफायबोनाय जादों। बिथांनि बियाबनि सिङाव थानाय माखासे ओनसोलफोरा हाग्रा ओनसोलाव दं, जाय जायगाफोरखौ नायबिजिरफिन्नायनि मुंआव दोनबोदों नाथाय बिथांमोनहा हाग्रा ओनसोलनि नङा। बिथांमोनो हानि पाट्टाखौ होनाय जायाखै, साफ्रोमबो थागिबि सुबुंफोरनो हानि पाट्टाखौ होनांगौ। लिखा आरो दाडिया मोननै गामिआ 1950 माइथायनिफ्रायनो दिब्रु-सायकुवा हादोरारि हाग्रामानि सिङाव दं, जाय गामिफोरा दिब्रु-सायकुवा हादोरारि हाग्रामाखौ हादोरारि हाग्रामानि फारिलाइआव गनायथि होनायनि सिगांनिफ्रायनो दंबोयो। बिथांमोनहाबो हानि पाट्टा गैजाया, बिथांमोनोबो हानि पाट्टा होनाया गोनां मानोना बिथांमोनहाबो थागिबि सुबुं होन्ना बिथांआ बुंलाङो।
बे सावरायनायाव MLA रबिराम नार्जारि आरो बिनद हाजरिखा बिथांमोनहाबो बाहागो लादोंमोन, जाय सावरायनायखौ बिजेपि दोलोआ पदमा हाजरिका बिथांआ सामलायदोंमोन।
आसाम सरकार हुसियार: CCTOA नि बान्जायनायाव आसाम हादोरसानि मोन 14 ट्रायबेल हारि माहारिफोरा गुवाहाटी नोगोरमानि साखाथिआव थानाय सनापुर आव सेडियुल ट्रायब आमेन्डमेन्ट बिल 2019 खौ हेंथा खालामनानै सुबुं गौमा खुंफुंदों।
