इंपल: 85-सान गोलाव सम सोमावसारनानै मनिपुर मुलुख सोलोंसालिखौ दिनै फरायसाफोरनि लुबैनायबादि बेखेवफिनबाय होन्नानै मनिपुर मुलुख सोलोंसालिनि फरायसा आफादनि दैदेनगिरि एम.दायामन सिंह बिथांआ बुङो। मिरु सरकारा गासिबो फरायसाफोरनि दाबिफोरखौ गनायना लाबाय होन्ना बिथांआ बुंबावो।
16 आगस्तआव फरायसा आफादआ मिमरेन्दाम बिलाइआव फोरोंगिरिफोरनि आफाद, लोगो मावथि आफाद, आरो हादोरसानि सरकारजों लोगोसे State Human Resource Development बिफानजों जयै सहि होदोंमोन।
सोमावसारगिरि बिथांमोनहा मनिपुर मुलख सोलोंसालिनि भायस-चेन्सेलर एबा सोलोंसालि दैदेनगिरि बिथांखौ सोलोंसालिनिफ्राय आखाय दैखांनांगौ होन्ना दाबि दैखांनायजों लोगोसे खुंथाय आरो रां बिफानखौ सुग्रोमनो थाखाय संबिजिरनि आयेन बादि खमिटि दानांगौ होन्ना दाबि खालामदों।
85 सान सोमावसारनायखौ मनिपुर मुलुख सोलोंसालिनि सोद्रोमाफोर, फारियै मनिपुर मुलुख सोलोंसालि फरायसा आफाद (MUSU), मनिपुर मुलुख सोलोंसालि फोरोंगिरि आफाद (MUTA), मनिपुर मुलुख सोलोंसालि लोगो मावथि आफाद (MUSA) बिथांमोनहा जयै बेखेवफिनबाय।
पन्दे बिथांनि बेरेखा सोमावसारनायखौ सोलोंसालिनि फोरोंगिरिनि आफाद, फोरोंगिरि नङै लोगो मावथिनि आफाद, आरो गुबुन गुबुन समाज सिबियारि बिथांमोनहाबो होफाजाब होदोंमोन। सोमावसारनाय समाव सोमावसारगिरि बिथांमोनहा सोलोंसालि खुंथायनि मावख’खौ टाला बन्द खालामना दोनदोंमोन जायनि जाहोनाव सेमिस्तार आन्जादआ उन जालांसिगोन होन्ना खौरां मोनबावो।
