नगांव, सेप्तेम्बर 3: बोहैथि बोसोराव आसाम हादोरसायाव नैथि खेबनि थाखाय दै बानाजों फुगिनांगासिनो दं, जाय दै बानाया सेथि खेबाव गोबां सुबुं आरो जिब-जुनारफोरनि जिउ खहा खालामदोंमोन। काजिरंगा हादोरारि हाग्रामानि बोसोनगिरि सात्येन्द्र नात सिंह बिथांआ बुङोदि, हाग्रामानि 70 जौखोन्दो हाग्रा ओनसोला दैजों लोमदों जायनि जाहोनाव गिबि खेबनि दै बानाजों गासै 105 जुनारफोरनि जिउ खहा जादोंमोन। गोदान दाटाखौ नायोब्ला नैथि खेबनि दै बानाजों थैबावनानै गासै 225 जाबाय होन्ना बिथांआ बुङो।
केरेला हादोरसायाव गोबां सुबुंनि जिउजों लोगोसे जिब-जुनार, धोन सम्पथि आरो आबाद खहा जालांनायनि उनाव आसाम हादोरसायावबो नोजोर होनो गोनांदि बोसोरफ्रोमबो आसामाव खनले खनले दै बानानि जाथाया सुबुंनि जिउ आरो आबादफोरखौ खहा खालामबाय थानाया गोदान जाथाय नङा।
हादोरारि काजिरंगा पार्कनि बोसोनगिरि सात्येन्द्र नात बिथांआ बुङोदि, हाग्रामायाव दैआ लोमनायनिफ्राय लोमगासिनो दं, मानो जायगाया जोबोद गाहाय। हाग्रामाखौ लोमजोबनो थाखाय सान्नैसोल’नांसिगोन होन्ना बिथांआ बुंबावो।
दुखुनांथावै जुनारफोर थैनाया बांनायनिफ्राय बांगासिनो दं, गासै 178 हाग्रानि मै, मा 15 गान्दा, मा 4 मैदेर आरो मा से मोसाया जिउ गोमानांबाय। दै बानाजों जुनारफोर थैनाया काजिरंगा हाग्रामानि थाखाय गोदान बाथ्रा नङा। सिगांनि बोसोरफोरावबो गोबां जुनारफोरा जिउ खोमानांबोगासिनो दं। 2012 माइथायाव गासै दै बानाजों 793 आरो 2017 माइथायाव गासै 503 जुनारफोरा जिउ खोमानो गोनां जादोंमोन।
बेफोर जाथायनि अनगायै आसामनि गासै मोन 25 जिल्लाफोरखौ लोमनानै सा 33 लाख सुबुंनिबो बांसिन सुबुंफोरा जेंनायाव गोग्लैनायजों लोगोसे न’बां, पाब्लिक बिलदिं, लामा, आबाद आरो दालांफोरा खहा जालांदों आरो नैथि खेनि खहा जानाखौ हिसाब लानाया सोलिगासिनो दं।
दैनि बिबांआ बानायनि जाहोनाव सा-सान्जा ओनसोलफोरा गुबुं हादोरसाफोरनिफ्राय फारागथि थाहोदों, जायनि जाहोनाव ओनसोलनि गोबां जायगाफोराव रेल लामाफोरखौ बन्द’खालामनो गोनां जादोंमोन। मखनो गोनांदि, सोनाव बेंगलाव थानाय मालदा आरो आलिपुर दुवारनिफ्राय रेल लामाखौ बन्द’खालामनो गोनां जानायनि जाहोनाव आसाम हादोरसाजों लोगोसे सा-सान्जा ओनसोलनि गुबुन गुबुन हादोरसाफोरावबो हान्था मेलानि बिथिंआव जेंना खालामदों।
