क’कराझार,सेप्तेम्बर 27: आसामनि मोन्नै मुलुग सोलोंसालि, क’कराझार जिल्लायाव थानाय बड’लैन्ड मुलुग सोलोंसालि आरो डिब्रुगड़ जिल्लायाव थानाय दिब्रुगड़ मुलुग सोलोंसालिआ दासान्दि गोब्राब समजों जुजिनांगासिनो दं।
खौरां मोन्नाय बादिब्ला बड’लैन्ड मुलुग सोलोंसालिनि फरायसाफोरा 20 सेप्तेम्बर दान्निफ्रायनो सोलोंसालि खुंथायनि बेरेखा सोमावसारनानै धर्ना होबोगासिनो दं। बिथांमोनहा दानि सोलोंसालि खुंथायाव थानाय Vice-Cencellor हेमन्ट कुमार बरुवा बिथांनि खुंनायनि समा जोबनानै फैनायलाय बिथांखौ मासिनिफ्राय बोख्लायनांगौ मानोना 5 बोसोर जालांबाय नाथाय फरायसाफोरनि आरो सोलोंसालिनि जेबो जौगाखां खामानि मावबोआखै होन्ना अजद होनायजों लोगोसे सोलोंसालिनि मोनफ्रोमबो बिफान्नि खालिजानानै थानाय मासिखौ मोजाङै सोफुंजोबनांगौ होन्ना दाबि कालामदों।
गुबुन फार्सेथिं दिब्रुगड़ मुलुग सोलोंसालिनि साब्रै फोरोंगिरिफोरआ आखाय दैखांनायनि (Resignation) लाइजाम गथायनाया सोमोनांहोदों।
खौरां मोन्नाय बादिब्ला बिथांमोनहा Vice-Cencellor रन्जित टामुलि बिथांआ सोलोंसालिमानि फोरोंगिरिफोरनि थाखानाय आफादखौ Dean नि खोथा गैया लाबानो सिफायनानै गोदान आफाद दाफिन्नो नागिरनायनि मिथिसार बिलाइ फोसावनायखौ बेरेखा खालामदों। नाथाय बे जाथायखौ सिरि जाफिनगोन होन्ना खौरां मोनो, जेब्ला Vice-Cencellor बिथांआ Resignation लाइजामखौ नाजावा।
दिब्रुगड़ मुलुग सोलोंसालिनि जेंनाया थाबैनो सुस्रांजागोनब्लाबो बड’लैन्ड मुलुग सोलोंसालिनि जेंनाया थाबैनो सुस्रांजागोनखौ नुहरनाय जायाखै। बड’लैन्ड फरायसा आफादनि (BSU) आफादगिरि सोगोमसार बसुमथारि बिथांआ बुङोदि, ‘धर्ना होनाय हाबाफारिआ सोलिबाय थागोन जेब्लासिम हादोर खुंगिरि जगदिस मुखि, जाय बिथांआ सोलोंसालिमानि गाहाय Cencellor आरो हादोरनि गिबि मनट्री सर्बानन्द सनवाल बिथांआ जेंना सुस्रांनायनि खोथा बुङा।
बसुमथारि बिथांआ बुंबावोदि, दानि Vice-Cencellor जगदिस मुकि बिथांआ 5 बोसोराव सोलोंसालिमानि थाखाय जेबो खामानि मावफुंआसै, जों बिथांनि मासिखौ सोरजोंबा सोलाइनायखौ लुबैयो जाय बिथांआ फरायसाफोरनि आरो सोलोंसालिमानि थासारिफोरखौ बुजिनानै जौगाखां खामानि मावलांनो हागोन।
