गुवाहाटी,अक्टबर 10: आसामनि हिजबुल मुजाहिद्दिन उटकारि हान्जानि सोद्रोमा खुमार-उझ-जामन बिथांखौ सोंनाय फिन्नाय खालामनो थाखाय आसाम पुलिसआ उट्टर प्रदेस हादोरसानिफ्राय लाबोनाय जादोंमोन नाथाय बिथांखौ गाबोन उट्टर प्रदेसनि बिजिरसालिआव थिसनगोनलाय दिनै गुवाहाटीनिफ्राय स्पेसियेल बिरखंजों उट्टर फ्रदेस फारसे दैथाय हरफिनबाय।
खौरां मोन्नाय बादिब्ला बिथांखौ दिनै फुंआव आसामनि हजाय जिल्लानिफ्राय गोख्रों पुलिसनि नायनायाव गुवाहाटी फारसे लाबोनाय जादोंमोन।
आसाम आरो गुबुन गुबुन हादोरसानि हिजबुल मुजाहिद्दिन उटकारि हान्जाजों सोमोन्दो थानाय आरो आसाम हादोरसायाव हमजानाय गुबुन सोद्रोमाफोरखौ नायबिजिरनो थाखाय National Investigation Agency आ आखायाव लाबाय होन्नानैबो पुलिस बिफाननि DGP, पल्लब बाटाछार्य बिथांआ सेंन्टिनेलनि खौरांगिरिनि सिगांआव फोरमायो।
हमजानाय खुमार-उझ-जामन बिथांखौ 2018 माइथायनि 6 अक्टबरकालि आसामाव सोंनाय फिन्नाय खालामनो थाखाय लाबोनाय जादोंमोन। बिथांखौ उट्टर प्रदेस हादोरसानि कानपुर नोगोराव दैथाय हरफिनबाय मानोना गाबोन एबा 11 अक्टबराव कानपुर कोर्टआव थिसनगोन।
मख'नो गोनांदि, उट्टर प्रदेस हादोरसानि कानपुर नोगोरनिफ्राय Anti-Terrorist Squad (ATS) आ आसामनि खुमार-उझ-जामन बिथांखौ 13 सेप्तेम्बराव खानो हादोंमोन। बिथांआ जुम्मु आरो कास्मिर हादोरसायाव थानाय किस्वार जिल्लायाव ट्रेनिं लादोंमोन आरो 2017 माइथायनिफ्राय बे मानसिया गोमानानै दंमोन।
