गुवाहाटी,मार्च 13: थांनाय दान मोन्नै सिगां नोगोरारि सोदांनाय बिल 2016 खौ हेंथा खालामनानै एजिपि दोलोनि सा 3 गुबुन गुबुन बिफाननि मंत्रीफोरा आखाय दैखांनायनि लाइजाम गथायनानै एजिपि आरो बिजेपि दोलोनि गोरोबथाखौ सिफायदोंमोन। नाथाय हादोरसायाव बिसायखथि सफैनाय लोगो लोगो बिजेपि दोलोजों गोरोबथा जाफिन्नायखौ गोबां एजिपि दोलोनि दैदेनगिरि आरो गाहाय थाखोनि सोद्रोमाफोरा गोजोन्नाय मोनाखै।
गोरोबथा जाफिन्नायनि खौरांखौ मोन्नानै गोबां दैदेनगिरिफोरा एजिपि दोलोखौ हेफाजाब होनायनिफ्राय जानगाराव थायो। बेबादिनो दिनै (13 मार्च 2019) एजिपि दोलोनि आयेन बोसोनगिरि (Legal Adviser) हेमेन बरा बिथांआबो एजिपि दोलोनि बेबादि आखुथायखौ नुनानै एजिपि दोलोनिफ्राय आखाय दैखांनाय लाइजामखौ गथायो।
“एजिपि आरो बिजेपिनि गेजेराव गोरोबथा जाफिन्नायनि खौरांखौ मोन्नानै आं एजिपि दोलोनिफ्राय आखाय दैखानाय थांखिखौ लादों” होन्ना बरा बिथांआ खौरांगिरिनि सिगांआव बुङो।
बिजिरगिरि बरा बिथांखौ थांनाय माखासे समनिफ्रायनो सिरि थानायखौ नुनो मोन्नाय जादोंमोन, मखनो गोनांदि, गोबां एजिपि दोलोनि दैदेनगिरि आरो सोद्रोमाफोरा एजिपि आरो बिजेपिनि गेजेराव फैगौ बिसायखथिनि थाखाय गोरोबथा जाफिन्नायखौ गोजोन्नाय मोनाखै।
बेबादिनो एजिपि दोलोनि दैदेनगिरि आरो गोख्रों सोमावसारगिरि लाचित बरदलय बिथांआबो बिजेपि दोलोजों गोरोबथा जाफिन्नायखौ दुखुमोन्नानै नागारो।
बिथांआ एजिपि दोलोनि आफादगिरि अटुर बरा बिथांनो लाइजामनि गेजेरजों फोरमायहरनानै दोलोनिफ्राय आखाय दैखाङो, “दोलोनि दैदेनगिरिफोरा गाहाय थाखोनि मावथि सोद्रोमाफोरजों सावरायाजासे बिजेपि दोलोजों गोरोबथा जाफिन्नायनि थांखि लादों। दोलोनि बेबादि थांखि लानायखौ हेंथा खालामनानै आं दोलोनिफ्राय आखाय दैखांनाय जाबाय” होन्ना बिथांआ फोरमायो। दोलोनि मावथि बरदलय बिथांआ थांनाय 2010 माइथायाव एजिपि दोलोआव मुं थिसनदोंमोन।
बेबादिनो आसाम हादोरसानि बार्ग गाहाय मंत्री आरो असम गन परिसद (एजिपि) राजखान्थि दोलोनि गेदेमा दैदेनगिरि प्रपुल्ल कुमार महन्ट बिथांआबो एजिपि-बिजेपि गोरोबथा जाफिननायखौ गोजोन्नाय मोनाखै।
बिथांआ बुधबाराव खौरांगिरिफोरनि सिगांआव दुखु फोरमायनानै बुङोदि, एजिपि दोलोआ गोरोबथा जाफिन्नायनि सोमोन्दै बिथांजों रायज्लायाखै। “दोलोनि गेजेराव बेफोरबादि गोरोबथा जालायनायनि बाथ्रा सावरायनाय जायाखैमोन, बिथांमोनहा गावसोरनि गोसो बादियैसो गोरोबथा जाहैदों” होन्ना बुङो।
फारसेथिं महन्ट बिथांआ मिजराम हादोरसा खुंगिरि एबा Governor of Mizoram साख्रिनि मासि जासिनायखौ गनायनानै लायाखै आरो बिथांआ बुंदोंदि, “आं आंनि लुबैनायबादि राजखान्थिनि फोथाराव राजखान्थि गेलेगासिनो दं”।
