गुवाहाटी,फेब्रुवारि 26: जेंना गोनां नोगोरारि सोदांनाय बिल 2016 खौ नोजोर होनानै हादोरारि कंग्रेस दोलोनि आफादगिरि राहुल गान्डी बिथांआ हादोरनि गाहाय मंत्री नारेन्ड्र मोडी बिथांनि भारतीय’ जनता पार्टी (बिजेपी) राजखान्थि दोलोखौ 26 फेब्रुवारि, 2019 आव खुगाजों गाग्लोबो।
“राज्य’ सभायाव थिसन जानायनिफ्राय कंग्रेस दोलोआ नोगोरारि बिल 2016 खौ होबथादों, सा-सान्जा ओनसोलनि सुबुंफोरा गोसोआव लानो गोनांदि, कंग्रेस दोलोआ सा-सान्जा ओनसोलनि सुबुंफोरनो नांगौ जानाय समाव गसंथायो, कंग्रेस दोलोआ सा-सान्जा ओनसोलफोराव थानाय, राव, हारिमु, थुनलाइफोरखौ रैखाथि होनो सांग्राथ दं” होन्नानै कंग्रस दोलोनि आफादगिरि राहुल गान्डी बिथांआ गुवाहाटी नोगोरमानि कानापारायाव थानाय भेटेरिनारि कॉलेजनि गेलेग्रा फोथाराव जानाय जथुमायाव बुङो।
26 फेब्रुवारि, 2019 आव कंग्रेस दोलोआ फैगौ लख सभा बिसायखथिखौ नोजोर होनानै गुवाहाटी नोगोरमानि कानापारायाव सांग्रांथियारि जथुमा खुंफुंनायखौ जागायबाय। कंग्रेस दोलोखौ हेफाजाब होगिरि गोबां दोलोनि सोद्रोमाफोरा राहुल गान्डीनि रांवखौ खोनासंनो होंगो दोंगो जानायखौ नुनो मोन्नाय जादों। राहुल गान्डी बिथांआ हुबैयै संबिजिरनि बेरेखा जेंना गोनां नोगोरारि सोदांनाय बिल 2016 खौ नोजोर होनानै बाथ्रा बुङो।
बिजेपि दोलोआ सा-सान्जा ओनसोलफोराव आयेन बेरेखायै थाफैनाय सुबुंफोरनो थामोन्था होगोन होन्नानै नोगोरारि सोदांनाय बिल 2016 खौ सोदांनानै आयेन दाफुंनो नागिरनायानो बिथांमोनखौ बिदिन्थि होयोदि बिथांमोनहा नेशनेल रेजिस्तार अव सीटीजेनसिव आरो आसाम एकर्डखौ नोजोर होआखै, बिथांआ मोनहा सा-सान्जा ओनसोलफोराव भट बेकखौ बांहोनो थाखायसो बेबादि मावफारियाखौ लादों” होन्ना राहुल गान्डी बिथांआ बिजेपि राजखान्थि दोलोखौ सोंखारियो। बिथांआ बुंबावोदि, “राशट्रीय’ सयं सेवक (RSS) आ जारिमिननिफ्राय लानानै फारसेनिफ्रायनो राव, हारिमु आरो थुनलाइफोरखौ गाग्लोबगासिनो दं, जाय बिथांमोनि सान्नायफोरा सा-सान्जा ओनसोलफोरखौ फोजोबस्रांबोगासिनो दं”।
https://twitter.com/INCIndia/status/1100320586545262592
मखनो गोनांदि, आसाम हादोरसायाव थांनाय लख सभा बिसायखथिआव कंग्रेस दोलोआ हादोरसानि गासै मोन 14 मासिफोरनि गेजेराव गासै मोन 3 मासि आवग्रिनो हादोंमोन आरो बिजेपि दोलोआ गासै मोन 7 मासिफोरखौ आवग्रिनो हादोंमोन। 17थि लख सभाखौ दाफुंनो थाखाय फैगौ मार्च आरो एप्रिल दानाव 2019 नि लख सभा बिसायखथिखौ खुंफुंगोन।
