दिनै भारत बन्द: रामलिला फोथाराव राहुल गान्डिजों लोगोसे सनिया गान्डि आरो मनमहन सिंहआ लोगो लाहैदों

दिल्ली,सेप्तेम्बर 10: दिनै दुलाराय भारत कंग्रेज कमिटिआ भारत बन्द’ होनायजों लोगोसे गोबां खुंथायाव थानाय सरकारनि बेरेखा हान्जाफोरा गोबाव समनि उनाव जयै बन्द’ होदों। बिथांमोनहा थावनि बेसेन बारायलांबाय थानाय आरो रांनि बेसेना खमायलांबाय थानायखौ नोजोर होनानै बन्द’ होनाय हाबाफारिजों लोगोसे धर्ना होगासिनो दं।

गोदान दिल्लीआव थानाय रामलिला फोथाराव नारेन्द्र मोदी दैदेन्नाय सरकारनि बेरेखा धर्ना होगासिनो थानाय कंग्रेज हान्जानि आफादगिरि राहुल गान्डिजों लोगोसे धर्ना होनाय हाबाफारिआव भारतनि बारग’ गाहाय मनट्री मनमहन सिंह आरो UPA नि गाहाय सनिया गान्डि बिथांमोनहाबो लोगो लाहैदों।

कंग्रेस हान्जानिफ्राय फोरमायनाय बादिब्ला गासै हादोरनि मोन 21 दोलोफोरा भारत बन्द’ होदों। बेनिनो माखाके दोलोपोरा जाबाय BSP, SP, DMK, TMC, आरो RJD लोगोसे गाबां बेफार फालांगिफोरनि आफादफोराबो बन्द’खौ हेफाजाब होदों होन्ना खौरां मोन्नाय जायो। बैफोरजों लोगोसे गासै मोन 5 आखि हान्जाफोरनि दैदेनगिरिफोराबो थावनि बेसेन बारायनाय, साख्रि गोयै जानाय आरो आबादारिफोरनि जेंनाफोरखौ लानानै बन्द’खौ हेफाजाब होदों होन्ना खौरां मोन्नाय जायो।