दिस्पुर,डिसेम्बर 29: दैजिं फोर्बो, आसाम हादोरसानि गिबि मंत्री सर्बानन्द सनवाल बिथांआ बुङोदि, गोहोगोरा सुबुं माहारिनि समाज खुंनाया दैमाफोरनि साखाथिआव जोनोम मोन्दोंमोन आरो आसाम हादोरसाया बुर्लुंबुथुर आरो बराक दैमाजों बेंखन जानाय। बेनिनो गोबां दैसाफोरा आसाम हादोरसाखौ समायना खालामदों। गासै बुर्लुंबुथुर दैमानि मोन 121 आरो मोन 16 बराक दैमानि दैसाफोरा बेंखन्नानै लादों।
सिरां जिल्लानि आइ दैमानि सेराव आरो हाग्रामा दालांनि साखाथिआव थामथि दैजिं फोर्बो फालिनायनि थामथि सनाव हादोरसा गिबि मंत्री सर्बानन्द सनवाल बिथांआ नुजाथिनानै बुङोदि, आसाम हादोरसायाव थानाय सुबुंफोरनि थाखाय ब्रर्लुंबुथुर आरो बाराक दैमाया जिउनि लामा आरो हादोरसा जौगाखांनाय लाबोनायाव बै दैमा आरो दैसाफोरा बिहोमा दं, बेफोरखौ सान्नानैनो आसाम सरकारा नामामि ब्रम्हपुत्र आरो नामामि बराक फोर्बोखौबो फालिबोनो हमदों होन्ना बिथांआ बुंबावो।
सिरां जिल्लानि आइ दैमानि साखाथिआव सोलिफुगासिनो थानाय दैजिं फोर्बोआ आसाम हादोरसायादि दैमानि सायाव सोनारनानै दं बेयो मोनसे मोजां बिदिन्थि, बिथांआ दाजाबदेरनानै बुङोदि, “3थि दैजिं फोर्बोखौ फारियै खुंफुंनायाव मोनफ्रोमबो हारि माहारिनि बाहागो लानायनि थाखाय रोजा रोजा गोजोन्नाय थाबाय”।
बे हाबाफारिखौ जाफुसार खालामनो हानायानो खुंथायाव थानाय हादोरसा सरकारनि जाफुंसारनायनि मोनसे बिदिन्थि।
बिथांआ मिजिं थियोदि, दैजिं फोर्बो फालिनाया हादोरसानि रांखान्थिआरि बिथिंआव जौगाखांनाय लाबोगोन आरो हादोरसायाव थानाय सुबुंफोरनि जिउ खुंनायाव हेफाजाब होगोन। दैजिं फोर्बोआव मोनफ्रोमबो हारि माहारिनि सुबुंफोरनि बाहागो लानायानो हादोरसायाव मोनसे गोरोबज्लायनायनि मोजां बिदिन्थि जाय हादोरसाखौ फारफ्रोमबो बिथिंआव गोख्रों खालामगोन।
बीटीसी खुंथायनि गाहाय हाग्रामा महिलारि बिथांआ बुङोदि, दैजिं फोर्बोखौ फालिनायनि गेजेरजों दैजिं फोर्बोनि खुंफुं आफादआ बीटीएडी ओनसोलाव थानाय सुबुंफोरनि गोरोज्लायनायखौ दिन्थिनो नाजादों।
बिथांआ बुङोदि, बीटीसी खुंथाया 27 डिसेम्बरनिफ्राय खुंफुंजानाय फोर्बो जाय फोर्बोआ 7 जानुवारिसिम खुंफुंजागोन दावबायारिफोरनि गोसोखौ बोनो थाखाय हर्नबिल फोर्बोनि सेर सेर फालिनाय जादों आरो थागिबि सुबुंफोरनि हारिमुखौ बुहुमाव मिथिसारहोनो हानायमानि नाजादों।
12 साननि फोर्बोआव गेलेनाय, रंजानाय, मेथाय रोजाबनाय, मोसानाय, बादायज्लायनाय, गाद’ गाखोनाय, पेराग्लेदिं बिरनाय, नाव जावनाय, हेलिकप्तार बिरनाय बायदि रोखोमनि दिन्थिफुंगोन होन्ना खौरां मोन्नाय जायो।
दिनैनि हाबाफारिआव आसाम टुरिझम बिफान्नि मंत्री चन्डन ब्रम्ब, राज्य सभानि MP बिस्वजित दैमारि, MLA प्रसान्त पुकन, बीटीसी डिपुटी गाहाय खाम्पा बरगयारि, ATDC नि चियारमेन जयन्त माला बरुवा आरो गोबां गोदोमा बिथांमोनहाबो बाहागो लादोंमोन होन्ना खौरां मोन्नाय जायो।
