गुवाहाटी,नवेम्बर 22: बलिउड सावथुननि हाथर्खि सलमान कान बिथांआ पान्जाबनिफ्राय गावनि बिरखंजों आसाम हादोरसानि सिङाव थानाय डिब्रुगड़ बिरखं बाग्रायाव सफैबाय। बिथांआ अरुनाछल प्रदेस हादोरसासिम थांगासिनो दं। सलमान बिथांआ अरुनाछ हादोरसासिम थांनो थाखाय गंसे बिरखंखौ भारा लानानै फैदों, जाय बिरखंआव थानाय मासि एबा सिटफोरनि रांखौ बिथांआ होजोबदों।
खौरां मोन्नाय बादिब्ला बिथांआ अरुनाछल हादोरसायाव 2थि खेबनि थाखाय हाजोआव साइकेल सालायनाय बादायलायनाय एबा MTB Arunachal Mountain bicycle race खौ बेखेवना होगोन।
कान बिथांआ 2 pm बाजिनाया लोगो लोगो डिब्रुगड़ फारसे गिदिंबोगोन आरो बेनिफ्राय मुम्बाइ फारसे आगान सुरगोन होन्ना खौरां मोनबावनाय जायो।
मखनो गोनांदि, सलमान बिथांआ सा-सान्जा ओनसोलजों लोगोसे मिरु सरकारनि मनट्री किरेन रिजिजु बिथांजोंबो मोजां सोमोन्दो दं। जेब्ला बिथांआ गावनि ‘Tubelight’ मुंनि सावथुनखौ सेबखांगासिनो दंमोन अब्ला बै समाव अरुनाछलनि उन्दै गथ’ माटिन रेय टेनगु बिथांखौ सावथुननि गेजेरजों लोगो मनोदोंमोन।