राचि , 12 सेप्टेमबर: हादोरनि गाहाइ मन्थ्रि नरेन्द्र मडिया मोनथाम हादोरारि थाखोनि आबादारि आरो बेफार फालांगिरि आरो ट्राइबेल फरायसाफोरखौ ब्रिसफुथिबार खालि राज्यो राजानि अनसायनायनि बिथांखि बेखेवना होयो। बेफोरनि गेजेराव गाहाइ मन्थ्रि किसान मन्थन योजना (पि एम के एम वाइ) , जेराव बे बिथांखिनि जोहै आबादारिफोरा 60 बोसोर बैसोनि जांख्लायाव सोहैयोब्ला दान फायाव 3,000 रां मोनगोन। बेनि थाखाय 18 आरो 40 बोसोर बैसोआव सोरखारनि बिलायाव गावसोरनि मुं थिसन हैनो नांगोन। रायदावनो गोनांदि मुं थिसन जाखानाय आबादारिफोरा 55 आरो 200 रां दानफ्रोम प्रिमियाम होनांगोन। बे बिथांखिनि सिङाव दासिम हालागै 13 लाख निबो बारा आबादारिया गावसोरनि मुं थिसन जाबाय आरो 16 कौटि बारा प्रिमियाम सोरखारा जमा खालामदों ।
बेखौ आबुंङै मावफुं लांनो थाखाय सोरखारा झारखन्द, हारियाना, तामिलनाडु , बिहार आरो गुबुन गुबुन राज्योनिफ्राय सा 7 सायख' जाखानाय आबादारिखौ पेन्सन कार्ड होनाय जादों।
मडि बेखेवनाय नैथि बिथांखिआ जाबाय बेफार फालांगिरि आरो गावखौ गायसंखांनाय हादोरारि पेन्सन बिथांखि। बेबो पि एम के एम वाइ नि नेमबादियैनो एखे थागोन। हादोरनाङैनो गासै 3 कौटि बेफार फालांगिरि आरो गावखौ गायसं खांनाय सुबुंहा मुलामफा जागोन। मख'जाथावदि पि एम मडिया ज'म्मु काश्मिर, आसाम, राजस्थान, तामिलनाडु झारखण्ड आरो गुबुन गुबुन राज्योनि फालांगिरिखौ सिम्बलिक पेन्सन कार्ड होदोंमोन।
बिथांआ बेखेव लांनाय थामथि बिथांखिया एक'लैब्य मडेल रेसिदेनसियेल स्कुल होनना मिथिनो मोन्नाय जादों। गासै गं 462 फरायसालिनि गेजेराव झारखण्ड राज्योनि गं 69 खौ लानानै दुलाराय हादोरनाङैनो फैगो थाम बोसोर फसंनाय जागोन। गंफ्रोमबो फरायसालियाव सा 480 ट्राइबेल फरायसा थानांगोन आरो बिसोरखौ गुबुन गुबुन खेलानि फोरोंथाय होनाय जासिगोन।
भारतनि नैथि दैमा माल्टिमडेल टार्मिनेल 290 कौटि रां खरसानि खामानिखौ नै बोसोर नि गेजेराव साहेबगन्जआव लुफुंनाय जादों। मडि गावानो इं 2017 माइथायनि एप्रिल दानाव आइ दब्लु ए आइ नि साहेबगन्ज माल्टिमडेल टार्मिनेल नि अन्थाइ खाम्फा गायसनो। जल मार्क बिकाश प्रजेक्ट सिंनि गंगा दैमानि सायाव थामथि माल्टिमडेल टार्मिनेल। आरो बावैसो सिगां इं 2018 माइथायनि नबेम्बराव गाहाइ मन्त्रिया बारान'सियाव एम एम टि बेखेवदोंमोन।
लोगोसे गाहाइ मन्थ्रि नरेन्द्र मडिया राज्यो आइनसालि बिल्डिंबो बेखेवनायनि मिथिंआव बाहागो लाना गावनि बिबुंथियाव बुंथियो दि नै जौथायनि उनाव गोदान राज्यो महरै सोरजिजानाय झारखण्ड आव राज्यो आइनसालि लुफुंनाया मोनसे जारिमिनारि सान। आं हादोरनि गाहाइ मन्थ्रि हिसाबै बेफार फालांगिरि आरो आबादारिफोरखौ हामलायथि बावहरो आरो बिसोरखौ पेन्सन बिथांखिनि मुलाम्फानि बाहागो लाहैनो खावलायो ।