राज्योआ दुर्गा फुजानि ब्रै सानाव 550 लामा जाब्रबथाइनि जाथायजों मुगा मुगि जानांबाय

Guwahati : बिमा दुर्गा फुजा आरो गुबुन गुबुन रंजाथाइ फोर्बोयाव राज्योआव लामा जाब्रबथायनि जाथाया सोमोनां होदों। गुबुन गुबुन बोसोरनि बादियै बे बोसोरावबो राज्योनि दाब दाब जायगानि सांग्रांथि गैयि गारि सालायग्राया जाब्रबथायनि जाथायाव मुगा मुगि जानांबाय। गासैबो र'ड एक्सिडेन्ट जाथायाव भुगिनांनाय जब्राफोरखौ इमारजेनसि सिबिथाइ देहा फाहामथाय राहा मृत्युन्जय 108 गारि जों देहा फाहामसालियाव थिसननो गोनां जादों। दुर्गा फुजानि ब्रै सानावनो हादोरसाया मोन 550 लामा जाब्रबथाइनि जाथायाव मुगा मुगि जानांदों ।

मोनसे मोनथिनो हानाय फोथायथाव फुंखानि बादिब्ला बोहैथि बोसोरनि 5 अक्ट'बरावनो राज्योनि राजा लामायाव गासै मोन 121ट्रेफिक जान जत जेंनायाव जाब्रबथायनि जाथाय , जेराव इमारजेनसि सिबिथाइ देहा फाहामथाय राहा मृत्युन्जय 108 एम्बुलेन्सआव जाब्रबथायाव भुगिनांनाय जब्राफोरखौ थिसन हरनाय जादों। मख'जाथावदि बे ट्रफिक जान जत जेंनायाव जाब्रबथायाव गोलैनायनि फारियाव सेथि थाखोयाव कामरुप जिलाया जेराव 18 ट्रफिक एक्सिडेन्ट जाथाइ, बेनि उनाव खर'सा आसामनि सिबसागर जिल्लायाव मोन 14 आरो नगाव जिलायाव मोन 9 ट्रफिक जेंनानि थाखाय जाब्रबथायाव गोग्लैदोंमोन।

रायदावनो गोनांदि 6 अक्ट'बर अदेबानि दुर्गा फुजानि द'थि सानावबो राज्योआव गं 198 लामा जाब्रबथाइनि जाथाया सोरांङाव फैयो। बेवहायबो कामरुप जिलाया मोन 24 लामा जाब्रबथाय जाथायजों फारिलाइ नि सेथि मासियाव गाखोदों, बेनि उनाव नैथियाव दरंआव मोन 24 आरो थामथियाव सुनितपुर आरो जरहाट बे गंनै जिलायाव 15 यै लामा जाब्रबथाइनि जाथायजों मुगा मुगि जानांदों।

मख'जाथावदि 7 अक्ट'बर अदेबानि फुजानि स्निथि सानावबो सोमोनांथावै हादोरसायाव मोन 163 लामा जाब्रबथाय जाथायनि खौरांआ सोरांआव फैयो। सिगांनि बादिनो बेवहायबो राज्योनि मादाव कामरुप जिलायावनो बांसिन लामा जाब्रबथाइनि जाथायाव सेथि मासि आवग्रिदों। जेराव मोन 28 एक्सिडेन्ट जाथाइ सोमजिदों। बेनि उनाव नैथियाव नगाव जिलायावबो मोन 17 आरो दरं जिलायाव मोन 15 जाब्रबथाइनि जाथायाव थामथि मासि आवग्रिहैबाय।

बिमा दुर्गा फुजानि दाइनथि सान अदेबानि 8 अक्ट'बर (Asthami) खालि राज्योनि खना खनलानिफ्राय लामा जाब्रबथाय जाथायनि रादाबा खौरां बिजोंनि गेजेरजों मोनथिनो मोनदों। फुजानि रंजानाय जोबस्लाबैयावनो राज्योआव मोन 68 लामा जाब्रबथाइनि जाथाया राज्यो-राजाखौ सोमोनांहोयो आरो समखिखां होयो। 8 अक्ट'बर (Asthami) नि सानावबो कामरुप जिलाया मोन 15 लामा जाब्रबथाइनि जाथायजों फारिनि गोजौ मासि आवग्रिदों, जेराव सुनितपुरनि मोन 6 आरो कामरुप मेट्रपलिटान आरो न'गाव जिलाया मोन 5 लामा जाब्रबथाइनि जाथायजों थामथियाव दं। बेनिफ्रायनो फोरमान जायोदि राज्योनि मादाव कामरुप जिलायाव माबायदियै लामा जाब्रबथाइनि जाथाया सोमजियो। बै सानब्रैनि गेजेराव राजा लामायाव सांग्रांथि गैयि गारि सालायगिरिनि थाखाय लामा जाब्रबथाय अन्जिमाया बांनायनि फ्राय बांलांगासिनो दंसै। हादोरनि हान्जा मेला बिफान आरो पुलिस बिफाना लामा जाब्रबथाइनि जाथायखौ खमायलांनो नांगौथार राहा लाया मानो थेवबो दि जाब्रबथायाव भुगिनांनाय सुबुंनि अन्जिमाया दबथायनो हायाखै बेनिनो फोरमान होन्ना राज्यो राजाया बुंहरदों।

Also Read: अदालगुरिनि 476 बोसोर गोजाम मन्दिराव जिव बुलि होना दशमी फुजा खुंफुंजादों

Also Watch: Durga Puja 2019: Vijaya Dashami celebrations at Belsiri River in Dhekiajuli, Sonitpur