नोगोरारि सोदांनाय आइननि हेंथायै कक्राझाराव जिला आमसुआ 4 धन्टा खुद्रिसारदों

Kokrajhar : हादोरसायाव नोगोरारि सोदांनाय आइनखौ बेरेखा खालामनानै सोमावसारनाय हाबाफारिया जोबनानै थाङाखै। मैया बर'लेण्ड हायुंआरि गौथुम सुंद'यै बि टि सि नि गाहाइ सदर थावनि कक्राझार जिला दुलाराय आसाम माइन'रिटि फरायसा आफाद (AAMSU) नि बान्जायनायाव सिल्द्रेन पार्काव जायगायारि राज्यो-राजानि मदद होनायजों लोगोसे आफादनि मावथि सोद्रोमामोननि नुजाथिनायजों फुंनि 10 रिंगानिफ्राय जागायजेन्नानै गासै 4 धन्टानि जिरायनाय खुद्रिसारनाय दिन्थिनाय जायो। जेराव बै खुद्रिसारनाय हाबाफारियाव नाथ योगी फरायसा आफादनि दैदेनगिरि मोनाबो बाहागो लाफैयो।

खौरांगिरिजों जानाय मुगा मुगि बुब्लियाव कक्राझार जिला दुलाराय आसाम माइन'रिटि फरायसा आफाद (AAMSU) नि आफादगिरि आमिनुल इस्लाम बिथाङा बुङो दि दोहोरोमनि बिथायाव बेरखांनाय नोगोरारि सोदांनाय आइनखौ माब्लाबो मानिनानै लानो हानाय नङा। मानोना बे बेले बेजे गोनां आइननि गेजेरजों अस'मिया समाजा गावस्रांलांगोन। राव .,हारिमु, दोहोरोम ,समाजखान्थिखौ रैखाथि आरो थामोन्था बासायनायाव रोजा रोजा राज्यो-राजाया राजा लामायाव होबथानानै सोमावसारनाय हाबाफारियाव उदांयै बाहागो लाफैदों।

लोगोसे राज्योनि दाब दाब जायगायाव गासैबो थाखोनि राज्यो-राजाया बेले बेजे गोनां नोगोरारि सोदांनाय आइनखौ बेरेखा खालामनाय बादि कक्राझार जिला दुलाराय आसाम माइन'रिटि फरायसा आफादनि दैदेनगिरि मावथि मोनाबो बेरेखा खालामफैदों। जों माब्लाबाबो मानिनानै लानो हाया।

मख'जाथावदि हादोरसानि सोरबिथिं गोसारजानानै थांनाय नोगोरारि सोदांनाय आइनखौ बेरेखा खालामनानै राजा लामायाव होबथानानै सोमावसारनायाव सरासनस्रा राज्यो-राजाखौ मैखोम गोहोम खोख्लैदों। जुदिअ नोगोरारि सोदांनाय आइनखौ आसामाव जाबसिन्नाय जादोंब्लाबो गावखुंथाइ गौथुम एबा हालामाव खहा जाया एबा गोहोम गोग्लैया होन्ना सोरखारनि थान्दैया फोरमायथि होदों। थेवबो राज्यो-राजानि गेजेराव मोनसे गिखांनाय सानथाया गोसोआव सौग्रावहोदों।

मख'जाथावदि नोगोरारि सोदांनाय आइनखौ नोजोर लाखिनानै दुंहाव थासारि एबा गुलुं गुजुं आबहावाखौ दबथायनि थांखि सिगाङाव लाखिनानै राज्योनाङै इन्टारनेट सिबिथायखौ दानस'नायाव गुबुन गुबुन जायगाफोरनि बादि बर'लेण्ड हायुंआरि गौथुमनि गाहाइ मावख' कक्राझार जिलायाव मैखोम गोहोम खोख्लैनायखौ नुनो मोननाय जादों। जायनि जाउनाव सानफ्रोमबो गोनांथार जानाय मुवा बेसाद लांलाय लाबोनाय हान्था मेला राहायाव गोख्रों सोग्रावदों।

बेरा फारसेथिं जाय बर'लेण्ड हायुंआरि गौथुम (BTC) नि गाहाइ मावफुं सोद्रोमा (Chief) हाग्रामा महिलारि बिथाङा गावनो कक्राझार जिलानि सिङाव थानाय फकिराग्रामाव रबिबार खालि नुजाथिफैनानै राज्योनि सोरबिथिं सोलिबाय थानाय बेले बेजे गोनां थासारिखौ लानानै बर'लेण्ड हालामावबो गोहोम खोख्लैदों। आं गंनै सदन फारियै ल'क सभा आरो राज्य सभायाव थानाय सांसद सोद्रोमाफोरखौ गोजोन आबहावा सोरजिनायाव बिहोमा होलांनो खावलायगोन। लोगोसे बि टि सि नि गाहाइ हाग्रामा महिलारिया नोगोरारि सोदांनाय आइनखौ लानानै सोमजिनाय गुलुं गुजुं थासारिखौ नोजोर लाखिनानै हालामाव गोजोन आबहावा सोरजिनायाव मेल मिथिं खुंफुंनाय जागोन होन्ना फोरमायबावो।

Also Read :सोरखारा राज्योनि दुंहाव थासारिखौ नायबिजिरनो निया आरो एस आइ टि दाफुंबाय

Also Watch: Students boycott exams in Bongaigaon opposing Citizenship (Amendment) Bill