आसु, असम थुनलाइ आफादा जौसिन बिजिरसालियाव केबनि हेंथायै आर'ज गाबहरगोन

आसु, असम थुनलाइ आफादा जौसिन बिजिरसालियाव केबनि हेंथायै आर'ज गाबहरगोन

दुलाराय आसामनि दाब दाब जायगायाव राव हारिमु दोहोरोम सायख'वालासे गासैबो थाखोनि राज्यो-राजाया बेले बेजे गोनां बिलखौ हेंथा खालामनानै राजा लामायाव ओंखारफैनाय गांनाय उखैनायखौ नेवसिनानै भारतीय जनता पार्ति सुंद'यै बि जे पि नि सोरखारा बिलनिफ्राय नोगोरारि सोदांनाय आइन (Citizenship Amendment Act) नि महर होनायखौ रागा जोंनानै हादोरनि जौसिन बिजिरसालियाव नुजाथिहैगोन। मानोना जों माब्लाबाबो बे आइन , संबिजिद बेरेखा जाबसिन्ना होनाय थिरांथाखौ मानिनानै लानो हाया। बेनि थाखाय दुलाराय आसाम फरायसा आफादनि गोजौ दैदेनगिरिनि थान्दै हान्जा (Top Leaders , AASU ) या नोगोरारि सोदांनाय बिलनि हेंथायै थिरांथा लादों।

फरायसा आफादनि दैदेनगिरि मोना मोनथिहोनाय सुलुंनि बादिब्ला , एपेक्स कर्टा मोनसे डाइरि नाम्बार 45128 नि आर'ज बिलाइ (Petition) मोनदों। मख'जाथावदि बै आर'ज बिलाइ दुलाराय आसाम फरायसा आफाद (All Assam Students Union) नि आफादगिरि (President) दिपांक कुमार नाथ, गाहाइ नेहाथारि (General Secretary) लुरिन ज्योति गगैनि मुंसाइ दं।

रायखांनो गोनां दि नोगोरारि सोदांनाय बिल थांनाय 9 डिसेम्बराव हर गेजेरनि समाव ल'क सभा आरो 11 डिसेम्बराव राज्य सभायाव गोबांनिनो मदद मोन्नायाव बेले बेजे गोनां बिलखौ भारतीय जनता पार्ति सुंद'यै बि जे पि आ पास खालामो।

गोदान दिल्लीनिफ्राय फैफिन्नायनि उनाव गुवाहाटी नोगोरमानि चान्दमारियाव थुबुर जानाय हारिमुवारि बिथिंनि राज्यो-राजाया मेलाव फरायसा आफादनि दैदेनगिरि मोना बुंथियो दि जोंनि अहिंसा आरो सुबुंदारारि खान्थिजों सोमावसारनाया गोख्रोंनिफ्राय गोख्रोंसिन महर होनाय जागोन होन्ना फोरमायो।

बेराफारसे थिं जाय असम थुनलाइ आफाद (Axom Xahitya Xabha) आबो हादोरनि जौसिन बिजिरसालियाव नुजाथिनायनि थाखाय साखा फारा जादों। मानोना जों माब्लाबाबो नोगोरारि सोदांनाय आइनखौ (Citizenship Amendment Act) जायखिजाया बेसेनाव मानिनानै लानो हाया। बेनि थाखाय जों दासिमाव मोनसे गोनांथार सावराय जथुम हांख्राइनाय हरनाय जादों। केबखौ माबादियै आइननि लामाजों सिगांलांनो हायो बेनि थाखाय जों जोंनि आयेन बिजिरगिरिजों सावरायनाय जागोन होन्ना असम थुनलाइ आफादनि आफादगिरि पर्मानन्द राजबंशी बिथाङा दि सेन्टिनेल खौरांलाइजों जानाय मुगा मुगि बुब्लियाव फोरमायो।

बेजों लोगोसे जोंनि आफादनिफ्राय आसामाव अस'मियाखौ सोरखारि मावख'वाव (Official Language ) आरो मुलुग सोलोंसालि थाखोयाव (University Level) बाहायनायनि थाखाय बोलो नारसिननाय जागोन होन्ना मिथिहोयो।

Related Stories

No stories found.
logo
Sentinal Assam
bodo.sentinelassam.com