आसुनि बान्जायनायाव लटासिलनि गण सत्याग्रह हाबाफारियाव राज्यो-राजानि "का" बेरेखा गारां

Guwahati : नोगोरारि सोदांनाय आइनखौ बेरेखा खालामनानै सोमावसारनाय हाबाफारि दिन्थिफुंनाया जोबनानै थाङाखै। दुलाराय आसाम फरायसा आफादनि बान्जायनायाव का खौ बोखार हरनायनि दाबियाव गुवाहाटी नोगोरमानि लटासिल गेलेग्रा फोथाराव गण सत्याग्रह हाबाफारिया मैया अदेबानि बुधबार खालि सानथामाव आगान होयो। जेराव गासैबो थाखोनि राज्यो-राजाया बेले बेजे गोनां नोगोरारि सोदांनाय आइन (Citizenship Amendment Act) नि हेंथायै उदांयै मदद होफैयो।

थिग बिदिनो मैया आसाम सोरखारनि गुबुन गुबुन फसंथानाव खामानि मावलांनाय मावथिफारिया हान्जायाबो ओंखारफैयो नोगोरारि आइन बेरेखा सोमावसारनायनि हेंथायै। दुलाराय आसाम मावथिफारिया गौथुम (All Assam Karmachari Parishad) आबो गावनि मदद होलांनाय थांखियै जइन जाफैयो।

बेराफारसे थिं जाय दुलाराय आसाम फरायसा आफादनि हांख्रायहरनायाव बुधबार नि सानथाम सानाव आगान होनायावबो लैहोर लैहोर राज्यो-राजाया बाहागो लाफैयो। मानोना बिसोरनि गुबै दाबिया जादों "हय का बातिल करक नहले आमाक ग्रेप्तार करक " बे जांख्रिखांनाय स्ल'गानजों राज्योनि दाब दाब जायगायाव बान्जायनाय नोगोरारि सोदांनाय आइनखौ बेरेखा खालामनानै राजा लामायाव ओंखारफैदों। थागिबि अस'मिया सुबुं माहारिनि गेजेरावनो का बेरेखा सोमावसारनाय हाबाफारिया थाबथानानै थाङाखै, नोगोरारि सोदांनाय आइननि बेरेखा सोमावसारनायनि बारा गोसारब्लांदों। बिसोरनि अनगायैबो सिख, मारवारि , भजपुरि आरो हिन्दी रावारि सुबुं समाजाबो थागिबि अस'मिया सुबुं माहारिखौ खहा खालामनो हाथाव नोगोरारि सोदांनाय आइननि हेंथायै मिरु सोरखारा जाबसिन्ना होनो नागिरनाय थिरांथानि हेंथायै लोब लोब बाहागो लाफैयो। बिसोरनिबो मोनसेल' दाबि "का" खौ बोख्लायहरनो नांगौ।

दि सेन्टिनेल खौरांलाइजों जानाय मुगा मुगि बुब्लियाव अस'मिया सिख संस्थानि आफादगिरि राजबिर सिं बिथाङा रोखायै बुङो दि हादोरनि गाहाइ मन्थ्रि नरेन्द्र मडि दैदेननाय बि जे पि नि सोरखारा आसामाव गोहो बोलो नारसिन्नानै नोगोरारि सोदांनाय आइनखौ जाबसिन्नो सिगांलांदों। जाय थिरांथाया थोंजोंङै संबिजिद बेरेखा। थागिबि सुबुं माहारि महरै जोंनि बिबान दं आसामखौ बासायनायनि बेलायाव। जोंनि सोमावसारनाया नागारनाय गैयै जासे समहालागै सोलिबाय थागोन,जेब्लासिम "का" खौ बोखारहरा। जोंनि आफादनिफ्राय बयनिसिमबो मोनसेल' खावलाय हरनाय सोमावसारनायनि मुंआव अहिंसा लामाजों थांनाङा।

बेरा फारसेथिं जाय दुलाराय आसाम फरायसा आफादनि गाहाइ बोसोनगिरि (AASU Adviser) ड° समुज्जल भट्टाचार्यी बिथाङा बुङो दि नोगोरारि सोदांनाय आइननि हेंथायै अहिंसा खान्थि आरो आइन सिबिनानै सोमावसारनाय हाबाफारिखौ सामलायलांबाय थागोन। लोगोसे जोंनि आइननि लामाजों नांलायनाय (Legal Battle) खौ आवगायलांबाय थागोन। लोगोसे आसुनि गाहाइ नेहाथारि लुरिन ज्योति गगै बिथाङा गावनि बिबुंथियाव फोरमायहरनानै बुङो दि बिसोरो ल'क सभा आरो राज्य सभायाव गावनि गोहो बोलो नारसिन्नानै आयेन बेरेखायै नोगोरारि सोदांनाय आइनखौ जाबसिन्नो हानाय नङा। दिनै हादोरसानि गंफ्रोमबो गामि , सोहोर नोगोर बायदि बिथिंनि राज्यो-राजाया उदांयै राव दोहोरोम सायख'वालासे नोगोरारि सोदांनाय आइनखौ बेरेखा खालामनानै ओंखारफैदों।

Also Read :गोलाव 36 बोसोरनि उनाव बिजिरगिरिनि खसाबाव बारग’ गिबिमन्थ्रि तरुन गगै, “का” नि हेंथायै सुप्रिम कर्टाव सोहैबाय

Also Watch: RD Junior College Students Stage Massive Protest against CAB