Guwahati : राज्योआव गोदान बोसोरनि जागायजेन्नायनि गिबि साननिफ्राय नोगोरारि सोदांफिन्नाय आइननि हेंथायै सोमजिनाय बेरेखा सोमावसारनाय हाबाफारिखौ थांखिनानै आसामनि केबिनेट मन्थ्रि ड° हिमन्त बिश्व शर्माया बुंदों दि सि ए ए बेरेखा सोमावसारनायनि बार बारनाया गोदान महर लानायखौ मेगननि नोजोराव गोग्लैदों। राज्योआव बे सुबिदानि असिला लानानै दाजागोन नामा गोदान राजखान्थि दोलो। जुदि गोदान राजखान्थि दोलो दाफुंजायो अब्ला फैगो बिधान सभा बियाबनि बिसायख'थियाव खुंथाइनि गोहोआव जिरायनाय भारतीय जनता पार्ति सुंद'यै बि जे पि नि थाखाय खहाथावसिन जासिगोन।
मैया अदेबानि सुक्रबार खालि देहा सावस्रि बिफाननि मन्थ्रि ड° शर्माया बुंदों नोगोरारि सोदांफिन्नाय आइननि लोब्बा गोनां गासैबो रोखोमनि नांगौथार फोरमानथिफोरखौ जौसिन बिजिरसालियाव गथायनाय जादों। दासान्दि गोजौसिन बिजिरसालिया मा थिरांथाया बेखौनो जों मानिनानै लानांगोन। अब्लासो बुजिनो हागोन सोर गोरोन्थि लामा आन्दायदों, सोर नंथारगौ खारिथिजों फोथायनाय दं होन्ना फोरमायो। आंहा गोथौयै फोथायनाय दं जौसिन बिजिरसालिया राज्यो-राजाखौ मोजां फिथाय होसिगोन। नाथाय सोरबा सोरबाया बे थासारिनि असिला लानानै राजखान्थियारि मावथिफोरा बेले बेजे राजखान्थि गेलेलायदों होन्ना बुंथियो। दासान्दि गोबांनि गेजेराव मोनसे गुबुन राजखान्थि दोलो दाफुंनायनि खोथा ओंखारफैदों। दाफुंजायोब्ला जोंनि बुंनांगौ जेबो गैया मोनसे आयदानि सायाव बोरै राजखान्थि दोलो दाफुंजागोन होन्ना सोंथि दिखाङो।
आरोबाव गावनि दाजाबदेर बिबुंथियाव सर्माया बुंथियो नोगोरारि सोदांफिन्नाय आइननि हेंथायै सोमजिनाय बेरेखा सोमावसारनाय हाबाफारिखौ राज्यो-राजाया खाथि नोजोरजों नुहरगासिनो दं। दानिया फैगो 2021 माइथायाव खुंफुंजानो गोनां आसाम बिधान सभा बियाबनि बिसायख'थियाव सोर बांसिन भ'ट मोन्नानै देरहासात जागोन अब्लासो रोखा जासिगोन राज्यो-राजाया सि ए ए नि मददाव दं ना हेंथायै गसंथेदों।
बेरा फारसेथिं जाय दाब दाब जायगायाव हारिमुवारि समाज आरो मेलेमजिबि सानसुमैगिरिनि बान्जायनायाव सि ए ए बेरेखा हाबाफारि दिन्थिनायखौ मख'नानै बिथाङा बुङो दासान्दियाव बिसोरनि हेंथायै सोरबा सोरबाया गोखा गोखा बिबुंथि लाखिनो हमदों। आं बिसोरखौ (Artist Society) खावलायो फैदो नोगोरारि सोदांफिन्नाय आइनखौ लानानै सोमजिनाय गुलुं गुजुं थासारिनि सोमोन्दै सावरायलायदिनि। जायखौ लानानै दिनै माखासे दुथां आखल आखुनि सुबुंआ गोरोन्थि लामाजों फोसावनानै सुबिदा लानायाव नांथाबदों।
गुबुन फारसेथिं जाय भारतीय जनता पार्ति सुंद'यै बि जे पि नि मावफुं आफादगिरि (BJP Working President) जगत प्रकाश नाड्डाया गुवाहाटी नोगोरमानि खानापारायाव बि जे पि दोलोनि बुथ सनमिलन हाबाफारियाव बाहागो लाफैगोन। दोलोनि मन्थ्रि ,एम एल ए गुबुन सुबुं थान्दै फोरा बाहागो लाफैगोन होन्ना फोरमायो।
