गोदान बोसोरावबो राज्योनि सोरबिथिं नोगोरारि सोदांनाय आइन बेरेखा सोमावसारनाय सोलिगासिनो दं
Kokrajhar: हादोरसानि सोरबिथिं नोगोरारि सोदांफिन्नाय आइन ( Citizenship Amendment Act) नि हेंथायै बेरेखा हाबाफारि सोलिगासिनो दं। राज्योनि दाब दाब जायगानि बादि बर'लेण्ड हायुंआरि गौथुम (BTC) नि गाहाइ सदर थावनि कक्राझाराव गोख्रों फिनजाथाय सोमजिदों। कक्राझार हायेनारि जनजाति बियाबनि बारग' सांसद (Former MP ) आरो बड' नेसनेल कन्फारेन्सनि आफादगिरि (President) सानसुमा खुंगर बैसोमुथियारिया बुङो दि बि जे पि दैदेननाय सोरखारा राज्योनि सिङाव थानाय गुबुन गुबुन थागिबि हारिनि फारसे अल'खद लाबोनो नागिरदों। सि ए ए आ थागिबि सुबुं (Indigenous People's) नि गांनाय उखैनाय, मोनथायाव फोजोबस्रांनाय लाबोगोन।
राज्यो-राजाया बोसोर बोसोरनिफ्राय भुगिनानै थानांनाय जेंना जेंगोना (Long Pending Problems) खौ बोस्रांनायनि सायाव गोनांथि होनायनि सोलायै दासान्दि सोरखारा गावनि दुगालु आखल आखु दिन्थिनानै संबिजिद बेरेखा खामानिनि फारसे सिगांलांदों। लोगोसे बिथाङा दाजाबनानै आरोबाव बुंबावो दि गोबां बोसोरनिफ्राय दिन्दां जानानै थानांनाय जेंना जेंसिखौ सिनायनानै सुस्रांनायनि राहा लाहैनो मिरु सोरखारनिसिम हांख्रायहरो।
लोगोसे बैसोमुथियारि बिथाङा बुङो दि मंगलियान फोलेरनि सुबुं माहारिया आलादा बर'लेण्ड दाबिजों सोमावसारनाय हाबाफारि आवगायलांबाय थागोन। राव हारिमु समाजखान्थिखौ फोजोबस्रांनायनि लामानि फ्राय रैखाथि होनो थाखाय नागारनाय गैयि राजखान्थियारि जांख्रिखांनाय आवगायलांनाय जागोन।
Lakhimpur: नोगोरारि सोदांफिन्नाय आइनखौ बेरेखा खालामनानै सोरबिथिं दुंहाव थासारि सोमजिनाय समावनो नलबारियाव फरायसा आफाद आरो असम जातीयताबादि युब सात्र परिषदनि मावथि (Students Worker's) फोरनि सायाव बुफाय बुसि जाथायखौ लानानै लक्षिमपुर जिला दुलाराय आसाम फरायसा आफादनि दैदेनगिरि मोना गोख्रों फिनजाथाय सोमजिदों।
मख'जाथावदि गिबि मन्थ्रि (Chief Minister) सर्बानन्द सन'वाल बिथांआ गुवाहाटीनिफ्राय सर्थेबारिनि नक्षत्र आश्रमाव थांनाय लामायाव नलबारि जिलानि सिङाव थानाय धर्मपुर बिधान सभा बियाबनि बेन्दोंनि दाहुदि ओनसोलाव माखासे मावथि (Students Worker's) फोरा नोगोरारि सोदांफिन्नाय आइननि हेंथायै ओंखारफैनानै गोसोम फ्लेक दिन्थिनायाव पुलिस रैखाथि हान्जाया हेंथा होदोंमोन। मावथिफोरनि सायाव अना खानायै बुफायदोंमोन।
बै जाथायखौ गोख्रों रावजों सोंखारिनानै लक्षिमपुर जिला दुलाराय आसाम फरायसा आफादनि दैदेनगिरि मोना बुंथियो गोहो बोलो नारसिन्नानै सोरखारा , खुंथाइ गोहोनि संखिखांनाय दिन्थिनानै दबथायनो नाजादों। नाथाय जों बेबादि गादबनायाव एसेबो खेरखेराया एबा आखाय हमथानानै थाया। सोरखारा सि ए ए नि लाबोनायनि गेजेरजों डिभिसिभ राजखान्थि गेलेनायाव नांथाबदों। जिल्ला फरायसा आफादनि आफादगिरि प्रानजित गगै बिथाङा बुङो दि सोरखारनि सुबुंदारारि खान्थिजों सोमावसारनायनि सायाव फोथायनाय गैया। उननि समाव अराय समनि थाखाय बोखारहराब्ला गोख्रों निफ्राय गोख्रों सिन सोमावसारनाय हाबाफारि दिन्थिफुंनाय जागोन होन्ना फोरमायो।
