Guwahati : नोगोरारि सोदांनाय आइननि हेंथायै राज्योनि सोरबिथिं दुंहाव एबा गुलुं गुजुं थासारिया जोबनानै थाङाखै। बे समावनो गिबि मन्थ्रि सर्बानन्द सन'वाल दैदेननाय हादोरसा सोरखारा माखासे दैदेनगिरि फोरखौ गादबनो नाजादों बेयो रोखाथारसिन जादों। कृषक मुक्ति संग्राम समिति सुंदयै के एम एस एस नि दैदेनगिरि अखिल गगैखौ निया नि आन्दोआव सान 10 लानायनि समावनो आरोबाव गोजोन सावराय आल्फानि दैदेनगिरि जितेन दत्तखौ बुधबार खालि हर गेजेराव खर'सा आसामनि तिनसुकिया जिलानि सिङाव थानाय मार्धेरिटायाव थानाय आर एस एस मावखुलिखौ थांनाय 12 डिसेम्बराव जालाखार बिलाखार खालामनायनि दायाव ग्रेप्तार खालामनाय जायो।
आसाम पुलिसनि सुलुं (Source) आव मोनथिनाय खौरांनि बादिब्ला सावराय गोजोन हान्जा आल्फानि दैदेनगिरि (Pro Talk ULFA Leader) जितेन दत्तखौ बायदिसिना आइन आब्रुथि बेरेखा खामानियाव थोंजोङै लोब्बा थानायनि सन्देह'जों गुवाहाटी नोगोरमानि काहिलिपारायाव थानाय आसाम पुलिसनि जुनिया बादा (Special Branch) सिम बांसिनै नायबिजिरसंनाय (Investigation) थांखियै लाबोनाय जादों। दासिम हालागै दैदेनगिरि बिथांनि हेंथायै भारतारि पेनेल कड (Indian Panel Code) नि सिङाव दफा 120 (B), 147,148,149, 353,454,427 आरो 435 नाम्बाराव मार्धेरिटा पुलिस थानायाव गसर थिसननाय जादों। पुलिसनि बिबान गोरा मिथिहोनाय खौरांनि बादिब्ला गासै सानथामनि थाखाय पुलिसनि जिम्मायाव लाखिनाय जागोन।
बेनि सिगाङावबो अदेबानि 15 डिसेम्बर खालि तिनसुकिया जिलानि उफ्रा गाहाइ पुलिस बिबान गोरा रिपुन्जय काकति नि दैदेनलांनायाव फाइखि हान्जासे लानानै गोजोन हान्जा आल्फानि दैदेनगिरि (Pro Talk ULFA Leader) जितेन दत्तखौ बोखांना लाबोदोंमोन। मख'जाथावदि दत्त बिथाङा थागिबि अस'मिया सुबुं समाज नि राव हारिमु दोहोरोम समाजखान्थिखौ फोजोबस्रांनो हाथाव नोगोरारि सोदांनाय आइननि हेंथायै गोख्रों सोमावसारनाय हाबाफारिखौ थोंजोङै दैदेनलांनायनि सन्देह'आव दायनिगिरि आसामि बादि एरेष्ट खालामनानै लाबोदोंमोन।
बेरा फारसेथिं जाय गोजोन सावराय आल्फानि दैदेनगिरि जितेन दत्त बिथाङा खौरांगिरिनि सिगाङाव फोरमाय हरनानै बुङो दि अस'मिया समाजनि गाहाम सान्नानै साफ्रोमबो राज्यो-राजाया लैहोर लैहोर बाहागो लाफैदों। आसामनि खना खनलायाव नोगोरारि सोदांनाय आइननि हेंथायै राव दोहोरोम सायख'वालासे बयबो जाउरिखांदों। जोंखौ पुलिसनि गोहो बोलो नारसिन्नानै एबा गिखांहोनानै सुग्लायहोनो हानाय नङा। जोंनि आइन आब्रुथि गोनां , अहिंसा लामाजों सोमावसारनाय हाबाफारिया सोलिलांबाय थागोन जेब्ला हालागै नोगोरारि सोदांनाय आइनखौ बोखारहरनायनि मोनबो राहा लामा लाया।
Also Read : राज्योनि थाखाय मोजां खौरां , सानै राफोद थुनलाइगिरिया आवग्रिबाय थुनलाइ एकादेमीनि बान्था
Also Watch: RD Junior College Students Stage Massive Protest against CAB