गुवाहाटिः आसाम सोरखारा दै बानाजों साग्लोबजानाय सुबुंफोर जायफोरा बै समाव रेलिफ बादायाव थानो गोनांजादोंमोन बिसोरनि फान्दखौ मानो होआ? जायनि थाखाय बेफोर जेंना सुस्रांनायनि बिमा महरै दिसपुरानो, जायफोर सुबुंफोरा दै बानाजों लोम्फावजानानै जेंना सोमजिदोंमोन सोरखारा बिसोरजों सैसोफानांगौमोन।
नांगौ समाव दै बानाजों लोमसावजानाय रेलिफोरनि थाखाय फान्द गथायिआ आसाम सोरखारनि मोनसे गेदेर बावगारग्रा जेंना। हादोरसायाव दै बानाजों लोमसावजानाय रेलिफोराव थानाय सुबुंफोरनो नांगौ बादियै जि जोम आरो गोनां जानाय मुवा बेसादफोर बायनायनि मुंआव रां आजावो। रेलिफ फारिथिफोरखौ संनानै, हादोरसा सोरखारा बे बोसोराव बेखौ रोखा खालामदोंमोन जायानि थाखाय हारसिं आरो नखरनि थाखाय जायफोरा रेलिफ बादायाव थानो गोनां जाबाय बिसोरनो जि जोम बायनो आरो बायदि बायदि मुवा बेसादफोर बायनायनि मुंआव 3,800 रां होगोन होनना। थार जाथाय दिन्थिबादियै 90 जौ खोन्दोनि गेजेरावनो जायफोर नखरफोरा थांनाय दै बानानि लोमसावनायाव रिलिफ बादायाव थानो गोनां जादोंमोन रां मोननायनि फोरसावथिखौ मोनदोंमोन बिसोर दा मोननो दं। बेनि नोजोरजोंनो नुनो मोनो 80 जौ खोन्दो गेजेराव जायफोर सुबुंफोरनि नफोरा बे बोसोरना दै बानाजों खहा खालाम जाबाय बिफोरनि खहा सुफुंनो लानाया दाबो बेदिनो दं।
बे नि जाहोन बादियै हादोरसाया मोनसे आरजाथाव गैयि आरो रां बिथिंनि सायाव रोखा नंआ।
मावखुलि फुंखा बादियैब्ला जायफोर सुबुंफोरा एबा नखरफोरा दै बाना रेलिफ बादायाव थानांगौ जादोंमोन बिसोरनो मोन्थिसार होनाय बादि 3,800 रां होनायाव 40 कौटि रां खरसा जानायनि हादोरसानि रांआरि बिफानाव दं होनना फोरमायदों।
हाबा खान्थिखौ नायसंनाय बादिब्ला हादोरसा थाखोनि आफादफोरा गाहाय नेहाथारिनि गेजेरजों जेसेबां रेलिफ बादायाव दंमोन बिसोरनि थाखाय मुं फारिथि खालामनायखौ नाजावनाय खामानिखौ मावनाय। सुबुंनि मेगनाव दान मोननायनि थाखाय मुंफोर दैखना लांनाया हादरसा थाखो आफादा बिसोरजों नुजायाखै, लोगो हमाखै आरो जा मोननांगौ अनसुंथाय दान बेफोरखौबो मोननांगौ दं बेखौ नुदों।
बेखौबो नुनो मोन्दों, हादोरसायाव गोबां हाफोरा खहा जादों, सरासनस्रायै 1.5 लाख हेक्टर आबाद फोथार हाफोरा बे बोसोरनि दै बानाजों खहा खालामजादों। बेखौ फोथाय बा दा फोथाय, खहा जानाय हा फोरा दाबो जिल्लाफोराव गोग्लैसोना दं। सा से आबादारिखौ सहाय होनो हायैआ गोहोम खोलैदों। सोलिनाय खान्थि बादियै नस्थ जानाय न आरो आबादफोथारफोरखौ जायगायावनो लाटमान्डालसनि गेजेरजों नायफिननाय जागोन, जाया दान मोनगिरिफोरनि फारिथिखौ बिसोरनि जिल्ला बेंगिरिफोरनो हरबाय। जिल्ला बेंगिरिया बे फारिथिखौ सानग्रा बिफाननि नेहाथारिनो हरगोन। आरो बेखौ रेभ्युन्य बिफानाव हरगोन। रेभ्युन्य बिफाना बेफोर गुबुन गुबुन निफ्राय फैनाय फारिथिफोरखौ नाजावनानै रां होनायनि थाखाय रांआरि बिफाननिसिम हरनांगौखौ फोरमायदों।
राजखान्थिआ सोना लानाय दान मोनगिरिफोरनि, नालिस होनाय बादियैब्ला आखायनि रांआरि होनाया आवथायाव गैया। सैसोनो गोनां जानाय आरो गोबाव खालानाया दै बानाजों सैसोनो गोनां जानाया थखाय जानाय मानसि बादि जादों। थारैनो दिसपुरा बे बादि जाथाय जानायखौ समान्थि खालामनायाव एबा बेफोर बादि खान्थिखौ फोजोबनो लागोन ने ?
