बर' कसारि गावखुंथाइ गौथुम सोरजिनायनि दाबिजों सोरखारनि हेंथायै धेमाजियाव गोख्रों सोमावसारदों

Kokrajhar :मिरु खौसेथि बर' सुबुं गौथुम (United Bodo People's Organisation) नि दैदेनगिरि मोना फैगो आसाम बिधान सभानि गोजां बोथोरनि जथुमाव बर'लेण्ड जारखुंथाय गौथुम (Bodoland Territorial Council) नि बायजोआव थानाय थागिबि बर' सुबुंफोरनि राव थुनलाइ , हारिमुजों लोगोसे रांखान्थियारि, राजखान्थियारि , समाजारि थामोन्थाखौ रैखाथि होनायनि थाखाय गावखुंथाइ गौथुम दाफुंना होनांगौ नि थाखाय दाबि दैखाङो। मैया अदेबानि मंग'लबार खालि धेमाजि जिलानि सानजारि नोगोराव थानाय रुंसारि सतिस चन्द्र बसुमतारी गोसोखांथि गोजौ फरायसालिनि गेलेग्रा लांगोनायाव गेदेर सुबुं गौमायाव जांख्रिखांनायजों सोरखारखौ सोंखारियो। जेराव खर'सा आसामनि लक्षिमपुर, धेमाजि, डिब्रगड़,सराइदेउ आरो तिनसुकिया जिलानि गोबां खौसेथि बर' सुबुं गौथुम (UBPO) नि मददगिरि राज्यो-राजाया लैहोर लैहोर बाहागो लायो।

मिरु खौसेथि बर' सुबुं गौथुम (UBPO) नि आफादगिरि (President) मिहिनिश्वर बसुमतारीया बिथाङा खौरां गिरिनि सिगाङाव फोरमाय हरनाय खौरांनि बादिब्ला आसाम सोरखारा थागिबि बर' हारिया गोलाव बोसोरनिफ्राय दाबि खालामफैनाय जेंनाखौ सुफुंनो थाखाय आगानसे सिगांलांङाखै। बि टि सि नि बाहिरानि बर' राज्यो-राजाजों गथ' बुरखायनाय बादि गोखा राजखान्थि गेलेदों। सोरखारनि बे गोहैलो आखल आखु दिन्थिनाय आरो जेंनाखौ गोसो गोर्बोजों मोजांङै मोजां अरायथा राहा लामा आजावनानै बोस्रांलांनायाव आंखालथि गोसोनि थाखाय दासिमाव गोख्रों सुबुंदारारि सोमावसारनाय हाबाफारि आखायाव लानो बाध्य जादों होन्ना दैदेनगिरि मोना मिथिहोयो।

रायखांनो गोनां दि बर'लेण्ड हायुंआरि गौथुम (Bodoland Territorial Council) नि बायजोआव थानाय बर' राज्यो-राजाया सोरखारनि बायदिसिना जौगालु मावबिथांखिनि मुलाम्फा आरो सुबिदा मोन्नायनिफ्राय जानगाराव थानांगौ जादों। बि टि सि नि बायजोआव थानाय आसामनि थागिबि ट्राइबेल बर' हारिया रांखान्थियारि, राजखान्थियारि मोनथाय आरो राव हारिमु थुनलाइ, दोहोरोम जौगाखांहोनायाव सोरखारा फेलें जादों होन्ना फोरमायो। लोगोसे हादोरसानि दाब दाब खना खनलायाव थानाय बर' ट्राइबेल बेल्ट आरो ब्लक हा खोन्दो रैखाथि होनायावबो फेलें जादों होन्ना बुंथियो।

जों जालांनाय बिसायख'थियाव भारतीय जनता पार्ति सुंद'यै बि जे पि दोलोखौ जोबोद गोसो गोर्बोजों फोथायनानै लैहोर लैहोर बि जे पि गसंथेनाय बिजाथिखौ देरहालांदोंमोन। नाथाय खुंथाइ गोहोआव जिरायनाय भारतीय जनता पार्ति आ उननि समाव दिन्दां जानानै थानांनाय जेंना जेंगोनाखौ गोख्रों राहा लामाजों सिगांलांनायाव फैमाल जादों। बे गिदिर सुबुं गौमा हाबाफारियाव नुजाथिनानै मिरु खौसेथि बर' सुबुं गौथुम (United Bodo People's Organisation) नि गाहाइ नेहाथारि (General Secretary) अनिल बसुमतारी बिथाङा बुङो दि गोदान गावखुंथाइ गौथुम बानायनायनि थाखाय थाबैनो राहा लानांगौ। नङाब्ला बि जे पि खौ होनाय मदद बोखारनायनि थिरांथा लानांगोन होन्ना फोरमायो। मख'जाथावदि बि टि सि नि बायजोआव थानाय बर'फोरनि थाखाय जर'खा बर' कसारि गावखुंथाइ गौथुम (Boro Kachari Autonomous Council) थाबैनो सोरजिनांगौनि दाबियाव गुवाहाटी नोगोरमानि दिसपुरनि लाष्ट गेट लांगोनायाव 26 नबेम्बराव धर्ना हाबाफारि लानाय जागोन होनना मोनथिनो होयो।

Also Read: मिरु न’खर मन्थ्रि अमित चाहजों ए जे पि दोलोआ केब नि सोमोन्दै सावरायगोन

Also Watch: Congress party and Rahul Gandhi must apologize to the country: Assam BJP