अस'मियाखौ हादोरसायारि राव महरै गायसंलांनो बि जे पि नि एम एल ए मोना गिबि मन्थ्रिखौ नारसिनदों

Guwahati : नोगोरारि सोदांनाय आइननि हेंथायै राज्योनि सोरबिथिं दुंहाव थासारिखौ नोजोर लाखिनानै मैया बि जे पि नि माखासे एम एल ए मोना सर्बानन्द सन'वालखौ लोगो हमहैयो। लोगोसे आसाम गोरोबथानि दफा नं 6 नि सायाव सावरायो।

आसामनि खुंथाइ गोहोयाव जिरायनाय भारतीय जनता पार्ति सुंद'यै बि जे पि नि खायफा एम एल ए मोना गिबि मन्थ्रिखौ लोगो हमहैना बृहस्पतिबार खालि थांनाय सप्ताहयाव हादोरसानाङै जालांनाय गुलाय गुजाय थासारि एबा दुंहाव आबहावाजों लोगोसे जारिमिनारि आसाम गोरोबथानि दफा नं 6 नि सायाव गुवारै गावनि बिबुंथिखौ लाखियो। सुबुंथान्दै हान्जाया फोरमायो हरदों दि थागिबि अस'मिया सुबुं माहारिनि राव हारिमु दोहोरोम समाजखान्थिखौ रैखाथि (Security) आरो थामोन्था (Existense) बासायनायाव आगान लानांगौनि थाखाय नारसिन्नो। बेजों लोगोसे अस'मिया रावखौ हादोरसायारि राव (State Language) महरै गायसननाय बेलायाव सावरायनाय जायो।

आसामनि गिबि मन्थ्रि (Chief Minister) सर्बानन्द सन'वाल बिथांखौ लोगो हमनायाव सतिया बिधान सभा बियाबनि बि जे पि एम एल ए पद्म हाजरिका बिथाङा गावनि बिबुंथियाव बुंथियो दि अस'मिया सुबुं समाजा नोगोरारि सोदांनाय आइन मोगथां महराव जाफुंसार जायोब्ला गावनि जोनोमथिलियावनो हालाय हाफाय थासारिजों गावखौनो गाव भुगिनांनो गोनां लामायाव नुजाथिफैगोन। राव ,हारि , हारिमु, दोहोरोम समाजखान्थिखौ फोजोबस्रांनानै अल'खद सफैगोन होन्ना गिखांदों। बेयो थारैनो जाबसिन जायोब्ला गमामायैनो हा हु, नं बां गासैबो बिथिङाव हेंथा सोमजिगोन। जोंनि इयुन आथालनि फारसे गिख्रंथाव आबहावाजों मुगा मुगि जालांनो गोनां जासिगोन।

सरासनस्रा राज्यो-राजानि गोसोआव एरैबाय गिखांनाय सोमजिदों दि अस'मिया रावखौ फसंजायाब्ला नोगोरारि सोदांनाय आइननि उननि समाव लासै-लासैनो समनि फाखनाव फोजोबस्रांनायनि लामायाव आन्दायगोन। ओंखायनो केबिनेट जथुमनि मेलाव अस'मिया रावखौ सानफ्रोमबोनि थाखाय हादोरसायारि राव महरै गायसंलांनायनि सायाव जर'खा सावराय लायनाय नांगौनि गोनांथि दं। लोगोसे जारिमिनारि आसाम गोरोबथानि दफा नं 6 खौ मावफुंनायजों लोगोसे अस'मिया सुबुं माहारिनि रैखाथि थामोन्थाखौ बासायनायाव गोनांथि होनांगौ।

जारिमिनारि आसाम गोरोबथानि दफा नं 6 खौ मावफुंनायनि बिथायाव दाजानाय गोजौ थाखोनि कमिति थाबैनो मोनसे फोरमायबिदां गथायहोनो नांगोन। लोगोसे राज्योनि गासैबो बिथिङाव जौगाखांनायनि थाखाय मिरु सोरखारा आसाम गोरोबथानि दफा नं 7 नि बिथायाव हरनायनि खोथा सावरायनाय जायो।

सतियानि एम एल ए पद्म हाजरिका बिथाङा गावनि दाजाबदेर बिबुंथियाव फिन बुंथियो दि गोलाव बोसोरनिफ्राय दाबि खालामनाय दोलो गौथुमफोरखौ राज्योनि मोनद' हारि हारिसाया सिडियुल ट्राइबनि गनायथिनि दाबियाव माखासे नंखाय बाखाय अ'जद दैखांनानै आगोलनिफ्राय एस टि मानदान्दा गनायथि मोनबावनाय हारिखौ दुथां सुबुंनि जोहै नंखाय खौरां फोसावदों। ओंखायनो एस टि मानदान्दा दाबिग्रा दोलो आफादनि दैदेनगिरि हान्जाजों थाबैनो सावरायज्लायनायनि गोनांथि दं।

Also Read : नोगोरारि सोदांनाय आइननि बेरेखा आल्फानि दैदेनगिरि जितेन दत्तखौ दिगबैनिफ्राय गुवाहाटीआव लाबोबाय

Also Watch: AASU Rally Against CAA 2019 in Kokrajhar