Kokrajhar : आफां आसामनि गंसे गोजौ सोलोंथाइनि फसंथान बर'लेण्ड मुलुग सोलोंसालि गोबां बोसोरनिफ्राय दाबि खालामफैनाय जेंनाया जाफुंसार जाबाय। मख'जाथावदि बर'लेण्ड हायुंआरि गौथुम नि गाहाइ सदर थावनि कक्राझार बिखायाव जारिमिनारि बर' गोरोबथा नाजावनानै 2009 मायथायाव गायसन जानाय बर'लेण्ड मुलुग सोलोंसालि इउ जि सि 12 बि मानदान्दा मोनहैनो हाबाय। प्रफेसार पि पि आयानिनि मासि सामलायनाय जथुमनाय आफादा मुलुग सोलोंसालि अनसुंथाइ आयोग (University Grant Commission) नि साब्रै सोद्रोमा गोनां जर'खा आफादनि थान्दै हान्जाया बर'लेण्ड मुलुग सोलोंसालि नायगिदिंनायनि उनाव सुक्रबार खालि सोलोंसालि अनसुंथाइ आयोगा हादोरनि राजथावनि गोदान दिल्लीआव जथुमनाय मिथिंआव 12 बि नि मानदान्दा आवथेनो हानायाव आफां आसामजों लोगोसे बै गोजौ सोलोंथाइ लांगोनायाव गोजोन्नाय लाबोदों।
मख'जाथावदि सोलोंसालि अनसुंथाइ आयोग 12 बि मानथाखोआव सोदेरफालासे बै सोलोंथाइ फसंथान सामलायनायाव गोबां जेंना जेंगोनाजों मुगा मुगि जानांदोंमोन आरो बै मानदान्दा मोनालासे गोलाव 9 बोसोर सम जोबोद गोब्राब थासारिजों जुजिनो गोनां जादोंमोन। बर'लेण्ड हायुंआरि गौथुम नि गाहाइ मावफुं सोद्रोमा हाग्रामा महिलारि आरो लेङाइ गाहाइ मावफुं सोद्रोमा खाम्फा बरगयारि सानैया हादोरसा सोरखार आरो मुलुग सोलोंसालि अनसुंथाइ आयोग (University Grant Commission) बिबाननारि थान्दै हान्जा जों जानाय सावराय जथुम्मायाव गोबां खेब बे आयदानि सायाव गुवारै सावरायदोंमोन आरो 12 मानदान्दा मोननांगौ नि थाखाय बि टि सि खुंथाइ निफ्रायबो लाइजाम गथायदोंमोन।
बेनि अनगायैबो 12 बि मानथाखो आवथेनायाव गोनांथार खान्थि ,लान्दां जायगाफोरखौ सुफुंनो थाखाय गोनां थांखिफोरनग खामानि जाफुंसार महरनि राहा नाजावनो थाखाय हाग्रामा महिलारि आरो लेङाइ गाहाइ मावफुं सोद्रोमा खाम्फा बरगयारि बिथांमोना बिथोन होदोंमोन। मख'जाथावदि बर'लेण्ड जारखुंथाय गौथुमनि गाहाइ मावफुं सोद्रोमा हाग्रामा महिलारिनि नांथाबनायनि गोख्रों नाजानायाव आरो बर'लेण्ड मुलुग सोलोंसालिनि बिबान बानसनाय रेबथुमगिरि प्रह्लाद बसुमतारी नि थार साननायाव बै गोजौ सोलोंथाइ फसंथान गेदेर मानथाखो आवग्रिनो हानायाव सोलोंथाइनि बिथिङाव जौगाखांनायनि फार्से आवगायगोन होन्ना मिजिंथिनाय जादों।
बर'लेण्ड मुलुग सोलोंसालिया 12 बि स्टेटास मोननायाव बिहोमा होलांनाय मुलुग सोलोंसालि अनसुंथाइ आयोग नि सोद्रोमा ड° किरन हाजरिका, बर'लेण्ड मुलुग सोलोंसालिनि फालांगि बिफाननि बिबुंगोरा गाहाइ राजेश बर्मन, बर'लेण्ड मुलुग सोलोंसालिनि मावफारिया गौथुम, फरायसा आफाद, गाहाम हास्थायगिरि मोनखौ गाहाम हामलायथि बावहरग्रोयो आरो लोगोसे बर'लेण्ड मुलुग सोलोंसालिया इउ जि सि नि फ्राय 12 बि मानदान्दा मोननायाव फैबाय थानाय समफोराव जौगानायनि जांख्लायाव आगान दावखोलांनो हागोन होन्ना मिजिंथिनाय जादों।
Also Read : आसाम अलेम्पिक जथाय गौथुमा खालि जायगायाखौ थिसनबाय
Also Watch: Two extremists gunned down by security forces under Soraibil BOP in Gossaigaon