Kokrajhar : बर' बिजोंनि सोलोंथाय थाखो दाइन (Class 8 th) नि उनाव इंराजि आयदायाव फरायनाय आयदाखौ लानानै बर'नि गुबुन गुबुन दोलो आफाद फोरा बे थिरांथा खौ बेरेखा खालामबाय थानाय समावनो बर'लेण्ड हायुंआरि गौथुम नि लेङाइ गाहाइ मावफुं सोद्रोमा खाम्फा बरगयारि बिथाङा थांखिखौ मदद खालामनाय नुनो मोनदों।
बुधबार खालि कक्राझार नि सोरखारि फोरोंगिरि सोलोंथाइ फरायसालिमा (Government College of Teachers Education) नब्लांयाव सानसेनि मेहेर गोनां बेंखन सावराय जथुम हाबाफारियाव गोदान सोलोंथाय खान्थि (New Education Policy) नि सायाव गुवारै सावरायनाय जायो जेराव माहारियारि थाखोनि गौथुम (Nationalist Organisation) खौ हांख्राइ हरनाय जादोंमोन। बरगयारि बिथाङा बाहागो लानानै बुंथियो दि गोजौ थाखोनि बादायलु आन्जादफोराव फेरफाथिनो थाखाय भार्नाकुलार बिजोंनि सोलोंथायनि सावरायलायनाय जायो। दानि बादायलु मुगायाव इंराजि बिजोंनि सोलोंथाय हानायमानि बोजबना लानायनि सम सफैदों, दावगानायनि लामायाव आगान सुरलांङोब्ला इंराजि बिजोंआव फरायनायनि गोनांथि दं होन्ना बुंथियो।
मख'जाथावदि आसामनि सिगां सारिनि गागि मेलेमजिबि (Intellectual) बर' बिजोंनि सोलोंथाय थाखो 8 नि उनाव इंराजि बिजोंआव गुरस्लायनो नांगौ होन्ना सुबुरुन होलांदों, बे बादि सोलोंथाइ आजावनाया सोलिबाय थायोब्ला गुबुन गुबुन गोजौ थाखोनि बादायारि आन्जाद (Competitive Examination) आव नुजाथिनाय नि गोबां जेंनाजों मुगा मुगि बुब्लिजों जुजिनांगौ जायो।
रायखांनो गोनां दि बर'लेण्ड जारखुंथाय गौथुमनि लेङाइ गाहाइ मावफुं सोद्रोमा (Deputy Chief Executive Member) खाम्फा बरगयारि बिथाङा समाजारि फोसाव बिजों (Social Media) नि गेजेरजों राज्यो-राजानिसिम गोसार जानाय नंखाय खौरांनि थाखाय उपेन्द्र नाथ ब्रह्म एकादेमी सोलोंथाइ फसंथाननि बिथोनगिरि (Director) खौ दाय हमो। बरगयारि बिथां बे आयदानि सायाव मोनसे गिदिर बेंखन सावराय जथुम (Seminar) खुंफुंनायनि खोथा सानदोंमोन नाथाय बै समावनो नंखाय खौरां दैसारजादों होन्ना बुङो।
