Kokrajhar: बर'लेण्ड जारखुंथाय गौथुम सुंद'यै (Bodoland Territorial Council) नि दाब दाब जायगायाव जौगाखांनायनि खामानि मावलांनाया जोबोर गोख्रोंङै आवगायलांनायखौ नुनो मोननाय जादों। बेनि बाहागो महरै मैया अदेबानि बुधबार खालि चिरांनि जिला गुदि सोलोंथाइ मावख'गोरा (District Elementary Education Officer) आरो फरायसालिनि नायदिंगोरा मावख' (Inspector of Schools) उदांयै अन्थाइ खाम्फा (Foundation Stone) गायसन्ना होयो बर'लेण्ड हायुंआरि गौथुम नि लेङाइ गाहाइ आरो सोलोंथाइ बिफाननि मावफुं सोद्रोमा खाम्फा बरगयारि बिथाङा। मख'जाथावदि बे गुदि सोलोंथाइ मावख'गोरानि मावख' बेखेवनाय हाबाफारियाव बर'लेण्ड जारखुंथाय गौथुमनि लेलिस्लेटिभ एसेम्बलिनि बारग' बुंथिगिरि (Former Speaker) पानिराम ब्रह्म , सोलोंथाइ बिफान (Education Department) नि गोजौ थाखोनि बिबानगोरा मोनजों लोगोसे गोबां जायगानि बि पि एफ दोलोनि मावथि सोद्रोमामोना नुजाथिफैयो।
रायखांनो गोनां दि बै जिल्ला गुदि सोलोंथाइ बिफाननि मावख'गोरा मावख' बेखेवलांनायनि उनाव बि टि सि नि लेङाइ गाहाइ (Deputy Chief of Bodoland Territorial Council) खाम्फा बरगयारि बिथाङा बुङो दि बे गोदानै लुफुंजानाय बिल्डिं न'आ चिरां जिल्लायाव फैबाय थानाय समफोराव सोलोंथाइ बिथिंनिफ्राय गुबुन गुबुन आयदायावबो जौगाखांनायनि मोनसे दाजाबथाइ आबहावा सोरजिनायाव बिहोमा (Contribution) होलांगोन होन्ना बुंथियो।
सोलोंथाइ बिफान (Education Department) नि सुलु़ं (Source) निफ्राइ मोनथिनो मोननाय खौरांनि बादिब्ला गोदानै बेखेवजानाय बिल्डिं न' लुफुंजानायाव 2.57 कौटि रां खरसा जायो। रायखांनो गोनां दि बे न'खौ 2019-2020 माइथाय समनि ष्टेट अउन प्राअरिटि देभेलपमेन्ट (State Own Prirority Development) मावबिथांखिनि सिङाव लुफुंनाय जादों। सुलुंनिफ्राइ मोनथिनो हानाय खौरांनि बादिब्ला G+ 1 थाखोनि बिल्डिं न'आ गासै जिब्रै खथा दंबावो, बेफोरनि गेजेराव दं फारियै जेरेरेल ब्रान्स, सावराय जथुम हल, ष्टर रुम, आर एम एस ए, स्टेटिस्टिक आरो प्लेनिं, जिला गुदि सोलोंथाइ मावख'गोरा (District Elementary Education Officer) आरो फरायसालिनि नायदिंगोरा मावख' (Inspector of Schools) रां हिसाब सानग्रोनाय खथानि खामानि सामलायनाय जागोन होनना मिथिनो मोननाय जादों।
लोगोसे अन्थाइ खाम्फा गायसन्नायनि उनाव खौरांगिरिनि सोंनायनि फिन्नायनि मुगा मुगि बुब्लियाव बर'लेण्ड हायुंआरि गौथुम नि लेङाइ गाहाइ मावफुं सोद्रोमा (Deputy Chief ,BTC ) खाम्फा बरगयारि बिथाङा बुङो दि कक्राझार संसदारि बियाबनि उदां सांसद (Independent Parliamentarian , Kokrajhar HPC) नब' कुमार सर'नियानि नांथाब नाजानायाव गोदानै दाफुंनाय गण सुरक्षा पार्टिया बुर्जा अन्जिमानि मासि (Seats) आव देरहानानै सोरखार दाफुंगोन होन्ना बुंनाय बिबुंथियाव बिथांनि दोलोखौ राज्यो-राजाया मदद खालामोब्ला फिन आगोलनि बादि दुंहाव थासारि (Tense Situation) सोमजिगोन होन्ना बुंथियो। जेराव फरायनायनि आबहावा गैयामोन नाथाय जोंङो फरायनायनि गोजोन थासारि लाबोबाय। बेरा फारसेथिं जाय हादोरसा सोरखारनि खुंथाइ गोहोयाव जिरायनाय बि जे पि आरो ए जि पि दोलोजों जोंनि खौसेथि आरो गोरोबलायनाय सोलिबाय थागोन होनना बरगयारि बिथाङा बुङो।
